Geij bi neix daeuj, Mungzsanh Yen Cangzbingz Yauzcuz Yangh Cangzbingz Cunh haenqrengz guh ndei hong swnghdai lajmbanj, youq henhoh ndei bya heu raemx saw le, cix gonqlaeng roengzngaenz 4000 lai fanh maenz hwnjguh “yinh raemx Mbaujyauz”, cang moq rog ranz, coih roen, cang lengj song henz dah, hawj yiengh mbanj bienq moqsag gyaeundei. Bi 2014 Mbanjyauz Bingzdung ndaej Guekgya Minzveij dingh guh “Cungguek aenmbanj daegsaek saujsu minzcuz”, bi 2015 “yinh raemx Mbaujyauz” Cangzbingz ndaej bingz baenz hajsinggaep lijyouzgih lajmbanj.

Vaxheu、ciengzhenj、cueng’va、laeuzcanx … Youq ndoengfaex doenghnaz ndaw mbanj Cangzbingz menhmenh byaijcet, couh miz gij fungcingz Mbanjyauz daegbied haenx roemx haeuj lwgda, gij gingjsaek gyaeundei yawjraen haenx hawj vunz yawj mbouj gaeuq haenh mbouj dingz mbouj sij dauqbae. Gwnz bya, ndoengfaex baenz benq baenz ndoi heuswd mwncup; dinbya, gij roen benjrin gaeuqgeq haenx lienzswnj daengz aen dem aen laeuzcanx moq, caeuq aen giuzndojfwn gig miz daegsaek haenx doxdaengh doxingj, lumj fuk veh gyaeundei raeuh ndeu yap haeuj lwgda vunzraeuz.

Bi 2013, Cangzbingz Cunh gaenxmaenx boiqhab yangh dangjveij cwngfuj yiengq baihgwnz ceng’aeu hanghmoeg, caemhcaiq dingh Mbanjbingzdung guh diemjguhyiengh hwnjguh segih lajmbanj moq, guh rog ranz cang moq, bu roen benjrin, guh giuzndojfwn, ruqdah cingjceih caeuq dieggingj ndaem faex cang lengj doenghgij hanghmoeg neix. Seizneix, daengx mbanj ndaem faex hoemqcw baenz 93%, swlaizsuij haeuj ranz、cunh mbanj doeng roen 100%, roen suijniz ciemq 80% doxhwnj. Doengzseiz baengh gij swhyenz lijyouz lai yiengh dangdieg, guh ndei hong lijyouz, caep fai laengz raemx, guh diemq hekninz diemq gwnngaiz, lij fatdoengh gak ranz ndaem gosamgakmoiz、goliuxhenjgim doengh go faex va neix, hawj dieggingj engq gyaeundei aenmbanj engq lengj.

Yiengh mbanj bienq gyaeundei le, vunzmbanj uk lingz sim gvangq lo, maqmuengh saedceij bi beij bi fouqmiz vuenyungz, hix engq haenqrengz dwk guh ndei gak cungj swnghcanj, reihnaz comz hwnjdaeuj co hawj lauxbanj ganq bungzhung ndaem byaekgve, ra lauxbanj daengz ndaw mbanj hwnjguh le song aen diemq hekninz, lij doxgap guh le nungzgyahloz, haifat vwnzva Yauzcuz saedgingj yienjok; mbangj vunzmbanj lij dawz gij hongdawz conzdungj Yauzcuz okdaeuj, daemj baengz caiznyib ndangdaenj Yauzcuz, sanseuj daehva、vengqdox doenghgij doxgaiq Yauzcuz neix, mboujduenh demlai souhaeuj, angqcoux saedceij siujgangh.