Cuengq roengz soujgih le, Vangzsam gamjdaengz swhgeij mbouj miz maz bonjsaeh, youh riengz gyoengqvunz ndoet geij boi laeuj. Caiq hai song gienh laeuj, Vangzsam gaenq fiz yaek dai lo, ndwn mbouj maenh, ninz youq gwnz sahfaz lo. Geij boux baengzyoux myox da, caez gwed Vangzsam cuengq youq naj bakdou suzse Siujyingz bae.

Ngoenz daihngeih mbwn loq rongh seiz, Vangzsam singj gvaqdaeuj, fatyienh swhgeij ninz youq bakdou suzse Siujyingz, roxnyinh catsaij lo, sikhaek hwnj ndang buet deuz. Byawz rox goenglaux fat saenq hwnj ndaej caeux, de yienznaeuz dava, lij raebrez dwk yawjraen Vangzsam daj bakdou suzse Siujyingz byaij roengzdaeuj.

“Vangzsam, mwngz caeux ha!” Goenglaux sing hung dwk naeuz, lauheiq Vangzsam dingq mbouj ndaej nyi dem.

“Daxgoeng caeux!” Vangzsam sing daemq han, couh buet ma suzse lo.

“Seizneix bouxcoz caen vuen- yungz!” Goenglaux ngauz gyaeuj gangj.

Ngoenzhaenx Vangzsam cingj- gyaj youq ndaw rug youq.

Baezlaeng, gyoengq baengzyoux mboujguenj miz maz saeh, cungj cingj Vangzsam bae ndoet laeuj, baeznaengz cungj siengj banhfap hawj Vangzsam fiz bae, couh gwed de bae daengz naj bakdou suzse Siujyingz cuengq roengz. Gyanghaet mbouj dwg Lij daxgoeng yawjraen, couhdwg deng Cangh dax- buz bungz raen.

Mbouj geij nanz, ndaw danvih cungj rox Vangzsam gyanghaet ciengzseiz daj bakdou suzse Siujyingz byaij “okdaeuj”. Bouxlawz siengj daeuj caeuq Siujyingz gyau baengz- youx haenx dingqnyi aen siusik neix cungj lizhai lo. Vangzsam hix gaijbienq gij mauzbingh swhgeij najmong lai, ra lijyouz bae caeuq Siujyingz gangjgoj, gunghcoz seiz ciengzseiz bangcoh Siujyingz.

“Doiq neix caen doxgyaez ha!” Vunz ndaw danvih cungj gangj.

Gvaq bi ndeu, gyoengqvunz sou ndaej mbaw cingjdiep Vangzsam caeuq Siujyingz doxaeu lo.

（sat）