Baeuqcaet 60 lai bi lo, lij ngoenzngoenz bae reihnaz guh hong. Gyoengq vunz ranznden raen de mboujlwnh guh yiengh hong lawz cungj fwngz saenz ga saenz caez, couh gienq de naeuz mbouj yungh guh lai lo, miz hong ce song daeglwg bae guh. Baez nyi vunz hauhneix gangj, Baeuqcaet couh diemj doengz ien ndeu “ba ba ba”ndoet hwnjdaeuj, song coij raemxda youq fajnaj nyaeuqnguxngeux lae roengzdaeuj.

Gangj daengz song daeglwg Baeuqcaet, baenzlawz mbouj hawj Baeuqcaet yousim ha! Gangjnaeuz Baeuqcaet daengz 35 bi cij aeu yah, gvaq sam bi miz song daeglwg. Vunz geq ndaej lwg, bonj dwg saeh ndei, ndigah de gyaez song daeglwg raixcaix. Byawz rox, couhdwg gyaez mauh bae, song daeglwg daj iq daeuj couh mbouj guh hong, ngoenzngoenz gwn liux ninz ninz liux gwn, daengz ndaej 20 lai bi lo, lij gaenx gwn gik guh. Baeuqcaet baez siengj daengz gij saeh neix, hozndat mbouj rox daj gizlawz ok, cungj ienqhoij gaxgonq mbouj rox son lwg!

Ngoenz ndeu, Baeuqcaet raen dungxin, couh bae yihyen yawj. Canghyw genjcaz liux doiq de naeuz, baezneix dauq ranz le yienghlawz baenz gwn couh gwn, saeh lawz caengz banh couh banh lo. Baeuqcaet dingqnyi gij vah neix, ndawsim rox de mbouj miz geij nanz couh yaek dai lo. Ngoenzde, de couh bae haw cawx gvak. Youq gyanghaw, de bungz daengz nuengxbiuj de, nuengxbiuj cam de cawx gvak guh maz, de couh lwnh gij vah canghyw hawj nuengxbiuj nyi, lij naeuz:“Cawx gvak dauq bae vat gumz, song daeglwg gik lai, lau gou dai liux mbouj miz gumz moek!” Gangj liux raemxda doeksasa. Nuengxbiuj raen de doeknaih lai, hix ndaeng soemj lo, hoeng mbouj rox baenzlawz gienq de, couh gaij gangjriu naeuz: “Gangj mbouj dingh mwngz vat gumz liux bingh couh ndei lo, daengz seizhaenx gou bang mwngz ra faex bae ndaem coq gizde, roxnaeuz gvaq geij bi song beixnuengx raeuz lij rox faenz faex bae gai ndaej ngaenz gwn laeuj bw!” Baeuqcaet rox nuengxbiuj gangj neix dwg gangj danq. Hoeng nyi daengz ndaem faex gai, Baeuqcaet faemxfwg siengj daengz maz, couh caeuq nuengxbiuj dajdingq gij saeh ndaem faex daeuj.

Haemhde Baeuqcaet heuh song daeglwg daeuj gangjgoj, de naeuz, seizneix miz cungj faex ndeu, rag faex rox ra gim, fanzdwg gizlawz miz gim, ndaem gij faex neix roengzbae, daengz seiz faex maj hung lo, gij rag faex gag rox geuj gij gim. Song daeglwg dingqnyi le couh mizyinx hwnjdaeuj, cam daxboh aeu yiengh faex neix daeuj ndaem. Baeuqcaet cam:“Sou siengj ndaem?” Song daeglwg mwngz yawj gou gou yawj mwngz, gvaq yaep ndeu lwglaux rag fajnaj guh raezlanglang naeuz:“Daxboh mwngz ndaem, daengz bae sou gim seiz dou caiq bae bang mwngz sou.” Baeuqcaet dingqnyi couh hoz daengjfofo, naeuz: “Sou cungj deq gou gwn, danghnaeuz gou dai bae sou baenzlawz suenq?” Song daeglwg raen daxboh hozhwnj le, couh mbouj gangj mbouj hoed lo. Baeuqcaet cijndei ndoet ien gaemz beij gaemz hung.

Gvaq mbouj ndaej geij nanz, Baeuqcaet bingh naek lo. Ngoenz ndeu, de ing youq gwnz mbonq, cangznaek doiq song daeglwg naeuz: “Gou yaek bae raen cojcoeng sou lo, gou ciuhvunz gaenx guh hong, canh ndaej di ngaenz, vuenh baenz gim, hoeng gou lau vunz caeg bae, couh dawz bae gyangreih gyangnaz moek hwnjdaeuj, seizneix gou geq lo, moek youq gizlawz gou lumz liux, daengz gou dai le, sou yaek bae ra gij gim haenx doxdauq, danghnaeuz ra mbouj raen ne, sou couh ndaem gij gofaex gou gangj gvaq haenx, daengz gofaex hung le couh rox bae ra gij gim haenx lo, gij dinfaex geij ngoenz dem aubiuj sou couh rox soengq daeuj.” Gangj liux couh duenhheiq lo.

Baeuqcaet oksang liux ngoenz daihsam, nuengxbiuj de couh soengq dinfaex daeuj lo. Song daeglwg Baeuqcaet dawz gvak dawz canj bae vat reihnaz, byawz rox vat bae vat dauq, fanzdwg reihnaz ranz de cungj deng vat caezcienz, hoeng lij caengz vat raen gij gim daxboh gyoengqde moek. Song beixnuengx couh siengj daengz rag gofaex rox ra gim. Gauhneix, song beixnuengx couh dawz dinfaex bae ndaem coq reihnaz lo. Song beixnuengx yunghsim bae ganq gij faex ra gim.

Ngoenz rangh ngoenz bi rangh bi. haj bi gvaqbae lo, song beixnuengx raen gofaex maj hung lo, couh faenz bae, vat gij rag okdaeuj. Hoeng, cungj mbouj raen gij ragfaex geuj miz saek di gim. Song beixnuengx couh ngeiz daengz dwg mbouj dwg daxboh de yaeuh gyoengqde lo. Yawj aen gang haeux, raen gij haeux daxboh ce roengzdaeuj yied daeuj yied noix, song beixnuengx daejngaungau hwnjdaeuj.

Laeng song beixnuengx doxdag naeuz bae ra aubiuj, aenvih gij dinfaex dwg aubiuj soengq gvaqdaeuj, goulau de rox daxboh gyoengqde vihmaz yaeuh gyoengqde ndaem gij faex, gangj mbouj dingh lij rox daxboh gyoengqde moek gij gim youq gizlawz dem. Gauhneix, song beixnuengx couh bae ranz aubiuj cam. Aubiuj caeuq song beixnuengx naeuz:“Boh sou caen ce gim hawj sou lo, sou yawj, sou faenz gij faex haenx, danghnaeuz dawz bae gai le, gij ngaenz canh ndaej mbouj couhdwg gim? Danghnaeuz sou gai liux youh ndaem faex moq, gvaq geij bi youh faenz bae gai canh ndaej ngaenz, ciuhvunz sou couh mbouj you lo!” Song beixnuengx daengz seizneix cij rox, daxboh gyoengqde gangj naeuz miz gim moek youq reihnaz, couhdwg yaeuh de song boux bae vat reih vat naz, ndaem doenghgo, daengz baenz seiz faenz bae gai vuenh ngaenz.

Gvaqlaeng, song beixnuengx gauq ndaem faex gai faex ndwenngoenz gvaq ndaej yied daeuj yied ndei. Song beixnuengx cij rox daxboh gyoengqde yunghsim son hawj song de aen dauhleix ndeu gig deng: Gaenx guh hong, couhdwg gimngaenz.