Gaenh geij bi neix daeuj, Bingzgoj Yen Swdangz Cin roengzrengz muenxcuk gyoengq vunzlai saujsu minzcuz lajmbanj lai fuengmienh cingsaenz vwnzva yaek yungh haenx, laemxsim cauxlaeb aen hawsingz vwnzmingz daengx guek, haenqrengz hengzguh vwnzva leih minz gungh- cwngz, mboujduenh laebcaez caeuq gaijndei vwnzva fugsaeh sezsih, caux hwnj gij vangjloz vwnzva hozdung cwgoemq cin、mbanj, vih saujsu minzcuz vut gungz baenzfouq gvaq hwnj saedceij vuenyungz demlai saek- rongh.

Gaijndei gunghgung vwnzva giek- daej sezsih hwnjguh. Aen cin neix gig yawjnaek giekdaej sezsih hwnjguh, geij bi daeuj, itcig dawz gunghgung vwnzva giekdaej sezsih hwnjguh liedhaeuj vih beksingq banh saedsaeh hanghmoeg, doenggvaq “it saeh it yaeng” caeuq ndawbiengz gien ngaenz daengj fueng- sik, hwnjguh daizheiq、 lanzgiuzcangz miz daeng rongh daengj cunh gaep vwnzva hozdung ciengzdieg.

Bangcoh cunh gaep doihyienjheiq. Aen cin neix gaenxmaenx bangcoh cunh gaep doihyienjheiq, vatcimh caeuq hwngfat vwnzva yisuz ndaw- biengz, cujciz canghheiq ndawbiengz camgya gak cungj beizyin, roengzrengz swnjcienz vwnzva yisuz minzsuz ndawbiengz. Ciuq cam rox, daengx cin gungh miz 12 aen doihyienjheiq yezyiz 150 lai boux bouxyienj, gyoengq bouxyienj gaenxmaenx boiqhab fueng- cim cwngcwz caeuq guhhong cungdenj dangj caeuq cwngfuj gak seizduenh guh vwnzyi senhconz, ciengzseiz gag bien gag yienj siujbinj、 vaiqbanj、 gofoux、 Heiqcuengh daengj gij cezmuz vunzlai haengj yawj gyaez dingq haenx, senhconz fuengcim cwngcwz dangj, coicaenh lajmbanj cingsaenz vwnz- mingz hwnjguh, fungfouq vunzlai vwnzva saedceij.

Gyavaiq ranzsaw lajmbanj hwnj- guh. Seizneix, daengx cin miz 12 aen mbanj hailaeb ranzsaw lajmbanj, moix aen ranzsaw miz 2000 lai bonj saw, neiyungz nangqdaengz minzcuz cwng- cwz、 nungzyez gisuz、 vwnzva gyauyuz、 saedceij gohgi daengj, vih beksingq hag gohgi、 yungh gohgi daezhawj bangcoh gig hung.

Vunzlai vwnzva hozdung lai cungj lai yiengh fungfouq le beksingq vwnzva saedceij aen cin neix, rengzrwd coicaenh lajmbanj vwnzva huzndei hwnjguh caeuq vunzlai vwnzva saehnieb cangqheiq hwngfat.

(Vuz Anhginh/吴安军)