Gaxgonq miz boux lwgnyez ndeu heuhguh Dwzgangh, bohmeh de buenq vaiz, ndaw ranz haemq miz ngaenz, gwndaenj mbouj you. Dwzgangh dwg lwgdog, bohmeh dawz de dangq baenz naedcaw youq gwnz fwngz, gijmaz hong hix mbouj hawj de guh. Yienghneix Dwzgangh couh gvaq cungj swnghhoz haeux daeuj aj bak gwn, buh daeuj iet fwngz daenj, baenzngoenz mbouj you mbouj heiq, coengzlaiz caengz cimz gvaq dungxiek dwg baenzlawz.

Ranznden Dwzgangh miz boux lwgsai ndeu heuhguh Siujyungz, nienzgeij caeuq Dwzgangh ca mbouj lai, song boux de dwg doengzdoih ndei, ciengzseiz youq itheij guhcaemz. Bohmeh Siujyungz ndaem reihnaz, ndaw ranz haemq gungz. Siujyungz ngoenzngoenz gyanghaet cungj gaen bohmeh de bae guh hong, banringz gvaq le cij ndaej bae guhcaemz. De maz cungj rox guh, naengzganq raixcaix.

Miz ngoenz he, Dwzgangh roxnyinh mbwq raixcaix, couh bae ra Siujyungz guhcaemz. Byaij daengz buenq roen yawjraen Siujyungz gwed fag gvak daj ndaw reih dauqma. De byaij gvaqbae, rag fwngz Siujyungz, naeuz:“Siujyungz, vaiq, cuengq fag gvak roengz, caeuq gou bae guhcaemz.” Siujyungz naeuz:“Mbouj ndaej, gou caeuxcaeux couh bae guh hong, aen dungx iek yaek dai lo, gou ma ranz gwn haeux gonq.” Dwzgangh mbouj rox iek dwg maz, hix mbouj rox iek miz geijlai hojsouh, caenh rag faj fwngz Siujyungz mbouj cuengq. Siujyungz naeuz:“Gou iek dwk souh mbouj ndaej lo, gou gwn song vanj haeux sikhaek caeuq mwngz bae guhcaemz.”

Dwzgangh cijndei caj de. Seizneix Dwzgangh siengj: Dungxiek dwk souh mbouj ndaej bae, dauqdaej dungxiek dwg baenzlawz ne? Gou vihmaz mbouj rox ne? Gou yaek dungxiek baez ndeu yawjyawj. Caenh siengj caenh siengj, Siujyungz okdaeuj lo. Dwzgangh lwnh aen siengjfap de hawj Siujyungz nyi, Siujyungz dingq le, bek aek naeuz:“Mwngz siengj bae ra iek, gou ngoenzcog daiq mwngz bae, baujcwng mwngz ra raen.”

Ngoenz daihngeih haetromh, Dwzgangh lij caengz gwn haeux couh angqvauvau bae ra Siujyungz, Siujyungz gaenq youq ndaw ranz deq de lo. Siujyungz dawz fag gvak ndenq hawj Dwzgangh. Dwzgangh ciep gvaq- daeuj gwed youq gwnz mbaq, hemq naeuz:“Bae lo, bae ra iek lo.”

Daeuj daengz henz reih haeux- yangz, Siujyungz doiq Dwzgangh naeuz:“Gou guh maz mwngz couh gaen guh maz, yienghneix mwngz couh ra raen iek lo.” Dwzgangh naeuz:“Ndei a, ndei a, gou dingq mwngz.” Gangj sat, gyoengqde couh ndai reih haeuxyangz lo.

Daihgaiq gvaq miz song aen cungdaeuz, Dwzgangh sawqmwh gveng fag gvak naengh roengzdaeuj, naiqnueknuek dwk naeuz:“Siujyungz, gou guh mbouj ndaej lo, gou siengj gwn haeux.” Siujyungz byaij daengz henz ndang de, naeuz:“Ndei a, mwngz ra raen iek lo, roxnyinh baenzlawz caengz?” Dwzgangh naeuz:“Gou rox dungxiek dwg baezlawzyiengh lo, ndaw dungx ‘gulu gulu’ heuh, bouxvunz mbouj miz saek di rengz, hojsouh dangqmaz, vaiqdi ma ranz gwn haeux.” De doq gangj doq ndwn hwnjdaeuj baema ranz ra doxgaiq gwn lo.

Siujyungz gwed song fag gvak gaen youq baihlaeng Dwzgangh. De doiq Dwzgangh naeuz:“Mwngz mbouj rox lu, gou ngoenzngoenz cungj dengj dungxiek. Cij miz dungxiek gvaq, cij rox naed haeux faen ngaenz daeuj ndaej mbouj yungzheih, cij rox swnghhoz swhgeij miz gwn miz daenj couhdwg gvaq ndaej ndei, cij rox bae gaenx guh mbaet yungh.”

Doeklaeng, Dwzgangh ngoenz- ngoenz cungj gaen Siujyungz bae guh hong, guh hong dauqma le couh gwn song sam vanj haeux. Ciemhciemh dwk, de yied maj yied miz rengz, caeuq Siujyungz doxdoengz maz hong cungj rox guh, naengzganq dangqmaz. Bohmeh Dwzgangh engq maez lwgdog roxsoq lo.