Vangzsam youq swyez danvih gunghcoz, bingzseiz gig launyaenq, gaenq ndaej 30 lai bi lo, bungz raen dahsau naj lij hoengzfwdfwd, ngaem- gyaeuj byaij gvaqbae, caj dahsau byaij bae gyae le, lij nyaenx mbouj ndaej ngeux gyaeuj dauq laeng yawjyawj. “Lau maz, beixnuengx. Ciuq mwngz baenzneix guh, mbouj rox daengz seizlawz cij aeu ndaej mehyah ndeu ne?” Ndaw danvih gyoengq beix- nuengx cungj gip dwk, ciengzseiz gienq de. Hix miz gyoengq mehmbwk gaisau dahsau hawj de, hoeng daihgya caez gwn caeuz seiz, Vangzsam yawj hix mbouj gamj yawj dahsau, cijgoq ngaemgyaeuj gwn ngaiz. Dahsau couh nyinhnaeuz ndaek bouxsai neix caen huk, danghnaeuz mbouj dwg huk couhdwg miz bingh, seizneix dahsau lawz cingznyienh caeuq cungj bouxsai neix gvaq saedceij ha! Vangzsam hix lau, lau yawj aen aek dahsau sangngaungau caeuq fajnaj hausaksak. Doeklaeng, Vangzsam lij boux dog saeg buh cawj ngaiz, gyanghaemh gag bek nyungz.

Vangzsam ciengzseiz ninz youq gwnz mbonq naemj: Seizlawz cij miz bouxbuenx ne? Baezlaeng itdingh mbouj lauq bae lo! Vangzsam haeb heuj, dik aen congz geij baez, ninz ndaek bae lo.

Duenhgonq ndaw danvih miz dah sau ndeu heuh Siujyingz, ngamq diuh haeujdaeuj, aen daiz bangungh de couh caeuq Vangzsam doxdoiq, Vangzsam mbouj gamj cingqmienh bae yawj saek baez. Vangzsam cij raen dahsau byoemgyaeuj ndaemndatndat, lij dingqnyi gij sing’yaem dahsau gig ndei dingq. Couh baengh haenx, Vangzsam youq ndawsim swhgeij gag ngeix fajnaj dahsau luenzlili, fouq lwgda rox gangj vah caeuq gij heuj hausaksak.

“Danghnaeuz caeuq dah sau neix gvaq saedceij, couhsuenq hwnj bya sang, roengz ndaw haij, gou hix cingznyienh!” Vangzsam baeznaengz raen dahsau byoem ndaemndatndat haenx, ndawsim gag ngeix.

Ngoenz ndeu roengzban le, Vangzsam raen Siujyingz byaij haeuj suzse cizgungh le, ndawsim hoengq- langlang. Vangzsam sawqmwh gamj- daengz swhgeij mbeiiq lai, hozndat dwk dik aen rin iq henz loh.

Gyanghaemh, beixnuengx cingj Vangzsam bae ndoet laeuj, Vangzsam ndoet laeuj mbouj haenq, mbouj siengj bae. “Mwngz siengj bae gyaep Siujyingz lwi? Mbouj siengj couh gaej daeuj!” Beixnuengx naeuz. Beix- nuengx youh nem youq aen rwz Vangzsam son de baenzlawz bae gyaep Siujyingz. Vangzsam baez dingq daengz “Siujyingz” song cih neix, ndawsim couh unq liux.

Gwn caeuz seiz, rongh daeng yapmyad, singmax mboujduenh. Lienz ndoet sam boi le, Vangzsam naj hoengzfwdfwd, lumj gaeqmeh ngamq ok gyaeq nei. Song gienh laeujbiz ndoet liux lo, Vangzsam gaenq luenh gangj sam ciengz, luenh diuq luenh ciengq lo.

“Vangz daeggo, seiqgyaiq baenz- neix gvangq, couh mbouj miz saek boux dahsau mwngz hab’eiq ha?” Gyoengqvunz gangjriu naeuz.

“Miz…… miz …… dwg…… miz, hoeng……hoeng……” Vangzsam wij dwk naeuz.

“Bouxlawz ha?” Youh miz vunz cam.

“Couhdwg Siujyingz ha, boux dahsau danvih gou ngamq daeuj!” Miz vunz bang de han.

Vangzsam doeksaet dwk, vueng dwk naeuz:“Sou cungj rox la?” Miz vunz naeuz:“Maij couh maij lo, danghnaeuz maij couh bae lwnh de nyi ha.” “Gojnwngz de hix maij mwngz ne?” “Sikhaek dwk denva.”

Vangzsam yied dingq yied gamj- daengz miz dauhleix, sikhaek dwk denva hawj Siujyingz.

“Vei! Mwngz ndei, gou dwg Siujyingz, mwngz dwg bouxlawz?” Soujgih baihhaenx cienz daeuj gij sing’yaem seuqdangq haenx. Vangzsam dingq gij sing’yaem haenx, laeuj fiz lumj singj bae dingz ndeu, sikhaek naeuz:“Mwngz ndei ha! Gou dwg Vangzsam ha! Siujyingz mwngz gwn caeuz caengz?” “Mwngz ra gou miz maz saehcingz ha?” “Mbouj miz, mbouj miz, dan dwg siengj coh mwngz camndei ndwi.” “O, yienghneix ha, docih mwngz. Gou nyaengq lo, ndaejhoengq caiq gangj! Caiqraen!” “Caiqraen!”

（caengz sat）