Diuzroen bingzbwd cinghseuq, ranzlaeuz sang gvangq baenz baiz baenz coij, ndaw raemxdah sawrwenx dauqdingq ingj miz ngaeuz ciiq giuziq caeuq gofaex gova, hawj vunz laihnaeuz dwg byaij haeuj le aenhaw gyaeundei Gyanghnanz. Gijneix couhdwg cwngzgoj hungloet mbanj guhyiengh hwnjguh lajmbanj moq Mbanjsiujduhbwz Gyauzlauj Cunh Gujlingz Cin Majsanh Yen.

Mbanjsiujduhbwz dieg youq henz goengloh ngeihgaep Majsanh daengz Sanglinz haenx, baihsae liz yienhsingz Majsanh 10 goengleix gyae, baih- doeng liz diegyouq cin cwngfuj Gujlingz 8 goengleix gyae, dwg rangh gyangsim Majsanh Yen Ngomx Runghlaj Swnghdai Lijyouzgih, Bi 2013 ndwen 10, Namzningz Siveij、 Si Cwngfuj dingh Mbanjsiujduhbwz guh mbanjguhyiengh cunghab haeuj- coengh hwnjguh. Riengzlaeng bi ndeu ndawde, aen mbanj neix guh le bet daih hanghmoeg, baugvat ranz、roen、ciengzdieg gunghgung、hawjraemx baizraemx、dienh、sezsih gunghgung、gingjyawj benqfaex suenva、hong dajndaem dajciengx doengh gijneix. Daengz bi 2014 nienzdaej, gij ranz ndaw mbanj cungj longz hwnj geubuh ciengzhau vaxmong, baihrog ciengz veh miz gij doz loekraemx, gig miz daegsaek ranzyouq Mbanjcuengh; henz Dahgyauzlauj guh miz aendiengz aendaiz、loekraemx、roen youzbyaij、roen ngomx diuzdah gwih danci, ndaem miz gofaexcuk caeuq gova; ndaw mbanj guh le laeuz cunhveij, guh miz lanzgiuzcangz caeuq ciengz- dieg lienhndang guh’angq, hawj yiengh mbanj ngoenz moq gvaq ngoenz.

Mbanjsiujduhbwz aeu aen mozsi ginghyingz “gihdi + ciennieb hoz- cozse + nungzhoh” neix, youq ndaw mbanj guhsat le riuzcienj reihnaz 300 moux, cauxlaeb swnghdai nungzyez gihdi, ndaem miz biekgyoij 100 moux、moeggva 60 moux、byaekheu 80 moux, vunzmbanj mboujdan moix moux moix bi ndaej ngaenzco 500-600 maenz, lij miz 80 vunz bae ndaw nungzyez gihdi guhhong, moix vunz ndwen ndaej 1800-3000 maenz ngaenzhong, caiq mbouj yungh ok rog dajgoeng ra ngaenz lo. Vunzmbanj Veiz Yinz bae Sinhcin Fuswgangh guhhong baenz roek bi, bi 2014 ndwen 9 de dauqma ndaw mbanj cauxnieb. De naeuz, seizneix mbanj- ranz baenz gyaeundei, miz hong guh lai, daengzcog hwngfat ndaej engq ndei.

Mbanjsiujduhbwz caeuq hwnj- guh ngomx Runghlaj swnghdai lij- youzgih giethab hwnjdaeuj, gaem- dingh hwngfat baenz “segih couhdwg gingjgih、haeuj mbanj couhdwg lijyouz”, cauxlaeb aen gihdi gvaq saedceij seizhwng “gwn youq byaij、youz caemz cawx” doxcomz guh ndeu. Youq swnghdai nungzyez fuengmienh, ndaw mbanj yaek guhbaenz aen gizdieg guhyiengh yendai nungzyez youqndwi swnghdai ndeu, baenz aen fouz goenghaih byaekgve dajndaem gihdi、makbakhom gihdi、noucuk dajciengx guhyiengh gihdi caeuq lajmbanj youqndwi lijyouz, guh ndei bien faenzcieng swnghdai nungzyez caeuq lijyouz hwngfat doxgiethab neix. Youq lijyouz hwngfat fueng- mienh, haenqrengz cauxlaeb Dah- gyauzlauj rangh yawj gingj “diuz dah song hamq” neix, youq haenzdah hwnjguh aendaiz depraemx、roen youqndwi youzbyaij caeuq roen danci ngomx dah ngomx bya、diengz yawj gingj doengh gijneix, cauxbaenz aen binjbaiz daegsaek “mbanjranz loek- raemx”.

Seizneix, byaij haeuj Mbanj- siujduhbwz, yiengh mbanj yiengh ranz cang gyaeu ndeiyawj, goengq bya laeng mbanj gofaex gocuk heuswd mwncup, yienj ok fuk dozveh gyaeundei “bya raemx ingj nungzgya, sei veh Siujduhbwz” ndeu, yinx gyoengq hekyouz doxcaeh bae youz- cet, baenz le yienghndei nungzyez youqndwi lajmbanj lijyouz ciepnyez.