(ciep geiz gonq)

Gyanghwnz, roeglaej Dahvangh siuq daiq baenz bang roeglaej daeuj yawj Dahvangh, naeuz: “Daxcej ndei gou, mwngz dwgrengz lo! Gou caeuq gyoengq roeglaej baengzyoux gou daeuj yawj mwngz, mwngz miz maz gunnanz, gangj okdaeuj, dou ndaej bang mwngz gaijgez!”

Dahvangh naeuz:“Docih daihgya! Seizneix gou mbouj miz maz gunnanz. Ha! Hwnz lo, caezgya dungx haengj- dingh iek lo, daeuj gwn di doxgaiq ba.” De doq gangj doq vanq gij haeux caeq hawj roeglaej gwn, naeuz:“Gwn ba!” Gyoengq roeglaej gwn sat gij haeux caeq, yienzhaeuh heuh dwk:“Caiqraen! Caiqraen!” Baenzneix couh cungj mbin ok rog lo.

Haet daihngeih, boux caizcawj lauxyez caeuq yahsien daeuj yawj, raen haeux caeq mbouj miz lo, ngeiz dwg Dahvangh caeuq lwgsai yaek aeu bae caeq caeg gwn, couh sing hung dwk hat naeuz:“Sou caen hab dai, aeu ndeindei gyaudaih, vihmaz caeg gwn gij haeux caeq?” Dahvangh damzdingz han naeuz:“Gou mbouj caeg gwn gij haeux caeq gvaq.” Boux caizcawj lauxyez naeuz:“Mwngz mbouj nyinh, dou couh buq naeng dungx mwngz okdaeuj yawj.” Gangj sat, youh laeglemx heuh vunzhoiq bae caeuq Dahvangh naeuz:“Mwngz dapwngq guh yahnoix lauxyez gou, couh mienx deng buq dungx.” Dahvangh mbouj nyienh, buq naengdungx lij ndaej biujmingz bonjfaenh mbouj caeg gwn gij haeux caeq, couh naeuz: “Buq couh buq ba!”

Vunzlai youq gizhaenx cungj vih Dahvangh gvih roengzdaeuj, caeuq boux caizcawj lauxyez neix gouzcingz, roeglaej Dahvangh siuq hix daiq daeuj baenz bang roeglaej youq gwnz gyaeuj vunzlai mbin bae mbin dauq, heuh dwk:“Gij haeux caeq dwg dou gwn, yaek buq naengdungx couh buq dou, Dahvangz mbouj miz coih!” Hoeng baenzlawz gouz hix mbouj miz yungh.

Boux caizcawj lauxyez mingling vunzhoiq de aeu cax bae buq dungx Dahvangh, vunzlai raen ndaw saej caeuq ndaw dungx de mbouj miz saek naed haeux, cungj daejnga’nga. Gyoengq roeglaej hix heiqhwnj foeg- foeg. Gyoengqde doxcomz youq gwnz go faex hung he haihoih. Roeglaej Dahvangh siuq doiq gyoengq roeglaej gangj:“Daxcej Dahvangh sim lumj raemxmboq saw, yienghceij lumj va gyaeundei, aen gwnzbiengz gyuek- gyak neix mbouj boiq guh diegmoh de, raeuz caez ram seihaiz de bae gwnz ronghndwen cangq ba!” Gyoengq roeglaej cungj doengzeiq gij yigen roeglaej Dahvangh siuq, couh sikhaek hengzdoengh hwnjdaeuj.

Gij sing daej vunzlai hawj gwnznamh saenqdoengh, gingdoengh le bohmbwn. Seizhaenx, rumzhaenq bongj, fwnraq doek. Caj daengz fwn dingz le, seihaiz Dahvangh gaenq mbouj raen lo.

Ngoenzhaenx dwg liggaeuq caet nyied ngeihcib, gyoengq roeglaej duenq, baezlaeng moix bi liggaeuq caet nyied ngeihcib, roeglaej nienzcoz rengzrwd cungj mbin hwnj gwnz ronghndwen bae ram gouhbenj Dahvangh bae cunzyouz.

Dahvangh dai le, vunzlai gig siengjniemh de, couh dingh moix bi caet nyied ngeihcib, couhdwg ngoenz- geih Dahvangh, ranzranz cungj aeu gaj gaeq gaj bit daeuj caeq hoenz Dahvangh. Gwn ngaiz seiz, ga bit ga gaeq cungj aeu ce daengz ronghndwen swng hwnjdaeuj, yawj gyoengq roeglaej ram gouhbenj Dahvangh okdaeuj cunz le cij ndaej hawj lwgnyez gwn. Doeklaeng, vunzlai couh gvidingh ngoenz liggaeuq caet nyied ngeihcib guh cietdahvangh, itcig daengz Cungguek moq laebbaenz gaxgonq, Majsanh、Dava、Duh’anh、Bingzgoj daengj ranghdieg Dahhoengz, vunz Bouxcuengh moix bi cungj gvaq aen ciet neix.（sat）

（Vangz Gyanghmyauz hoiz）