Lingzsanh Yen Fuzswj Cin Daluz Cunh benq ranz gaeuqgeq gvangq, gezgou goengnaengz caez- cup, suijbingz gveihva haemq sang, swnghdai vanzging maenhndei, vwnzva fungsug ndawbiengz romlouz lai; louzyo miz haujlai vwnzvuz gaeuqgeq, louzce miz mbangj fungsug sibgvenq “bae gyae cib leix mbouj doxdoengz”, buek canghheiq diuq- foux ciengqgo ndawbiengz ndeu lij seiz mbouj seiz youq gwnz gai gyaeuj mbanj yienjheiq. 2005 nienz ndaej Guekgya Lizyouzgiz bingz hawj “diemjguhyiengh nungzyez lijyouz daengx guek”, 2007 nienz, youh ndaej Guekgya Gensezbu caeuq Guekgya Vwnzvuzgiz bingz baenz “aencunh okmingz vwnzva lizsij Cungguek”.

Daluz Cunh youq baihdoeng yienhsingz Lingzsanh dieg 8 goeng- leix gyae haenx, daengx cunh miz 19 aen cunhminz siujcuz, gungh 930 ranz 5300 lai vunz. Ndaw mbanj gungh miz 10 benq ranzgeq seiz Ciuhmingz、Ciuhcingh hwnjguh haenx, ciemq dieg 22 fanh bingz- fanghmij, rangh baujhoh 45 fanh bingzfanghmij, gvaengzlaengx gvangq yiengh hungloet, romlouz vwnzva lai, mingzdaeuz “ranzcaep geq、vwnzva geq、gofaex geq” ndaej lied haeuj Guengjsae raeuz sam aen mbanj gaeuqgeq ndawde baiz daih’it. Ndaw gij ranzgeq neix lij louzce miz 305 fouq doiqgeq, fouqdoiq neiyungz aeu cingqndang、ciengxranz、caux- nieb、bauqguek guh cujyau daeg- diemj, doiq daihlaeng miz gij yiyi son’gyauq caeuq coiguh、 daezsingj laeglwd haenx. Ndaw mbanj lij doengzseiz louz miz buek faexcueng geq、faexbiz geq maj ndaej 300 lai bi ndeu, dauqcawq ndaej raen gij gomaklaehcei maj baenz bak bi doxhwnj haenx. Daengx mbanj seiz- neix dan gomaklaehcei ndwensam hoengz couh miz 8000 lai moux, moix bi gai ndaej maklaehcei 150 lai fanh goenggaen, vunzmbanj moix bi moix vunz bingzyaenz gai maklaehcei souhaeuj 1700 lai maenz. Binaengz 5-6 nyied, hekyouz cungj doxcaeh bae daengz ndaw mbanj, gawq ndaej yawjngonz gij ranz geq doiq geq faex geq haenx, youh ndaej bae ndaw suenmak caenfwngz mbaet cimz gij maklaehcei ndwensam hoengz singjsien、naeng mbang、noh na、raemx lai diemzvan haenx, swnh- bienh daiq di mak he ma hawj vunzranz caencik baengzyoux cimz feih, dauqcawq cungj ndaejnyi gij sing riu goksasa diemzsubsub haenx.

Doengh bi neix daeuj, Lingz- sanh yawjnaek haifat ndei Daluz Cunh, gonqlaeng roengzngaenz mauhgvaq it cien fanh maenz hwnjguh sezsih lijyouz, caensaed henhoh ndei gij ranzgeq、doiq geq、faex geq ndaw mbanj. Seizneix, ndaw mbanj gaenq baenz aen gingjgih lijyouz gyoeb comz miz ranz gaeuqgeq gaujguj、yawj lizsij vwnzva yisuz、fungsug fungcingz ndawbiengz、nungzyez swnghdai yawjngonz、cwx- caih epbya guh’angq、mbaet lwg- mak mbaet byaekheu doengh gijneix, aeu gij fungsug fungcingz gaeuqgeq、sohsed、geizheih、daegbied de yinx gyoengq hekyouz ndaw guek rog guek doxcaeh bae youzcet.