Hot Daihsam——Duet buhbing roengz seizhaenx

第三首——脱下军装的那一刻

Seizhaenx daeuj daengz baenzneix dumdeng

Couh lumj gyanghaet ngamj dauqndiu

Bouz vunz, lij youq ndaw loq haemhlwenz

Gij cingzciet

Caeuq lwgda gyawj raeuh, caeuq seizgan gig gyae

Mienh geiz he

Lij youq rog swhsiengj seuqcingh

Deng rumz cifofo

Henz rwz, sing aenhauh baenzneix gok

Seizhaenx

Gou, lumjbaenz lij youq cancangz cung

Cungqgangh youq fwngz, cungcig youq aek

Duj va he

Cingq youq laj din gou

Hai ok gij gyaeundei de, yienh ok najriu de

Gobing baenzneix hungmbwk

Seizhaenx

Gou, lumjbaenz lij youq ndaw duivuj

Ngiengxgyaeuj enjaek

Cungj heiqseiq gaenq cungbyoengq gwnzmbwn

Youq laj mbwnlamz fwjhau

Daihdangq doxhwnj, doxhwnj

Ingjciuq, gwnz cauhcangz sug

Ngaeuzndang yamq hung coh naj byaij

Seizhaenx, lumhlumh gij cieng venj youq gwnz mbaq

Lumhlumh gij veih venj youq hozbuh

Lumhlumh, gij doxgaiq gvendaengz bouxbing

Raemxda gou, lae ndaej baenzneix myigmyan

Lij miz gyoengq canyouj

Cungj caeuq gou doxgot

Gig yunghrengz,

Lumj boux vunz he

Caeuq lingh boux vunz

Habbaenz boux vunz he, doxyungz hwnjdaeuj

Seizhaenx, gou caen dwk yaek lizbae lo

Dang sing digheiq caiq yiengj hwnjdaeuj

Baihnaj gou, mongsaengsaeng

Vadvad fwngz ba

Canyouj ndeigyaez, ginhyingz gou faengz

Ciuhvunz neix caeuq mwngz

Miz baez he duenq ciuhgonq

Gij siengjniemh gou

Cawqdingh lij yaek caeuq mwngz

Youq bakroen baihlaeng, caiq doxbungz