Vahhainduj

Laeuj fiz mbouj baenz vah,

Lwg yah hozndat lai.

Ngoenzneix dou gyauyuz,

Lwnh hawj vunzlai dingq.

Dwen daengz bouxlaeujfiz,

Mbanjmbanj yaek miz caez.

Seizseiz gwn laeuj fiz,

Ciengzciengz nyouh dwk vaq.

Vunzlai doengzcaez geiq,

Raeuz itdingh aeu gaiq.

Sai:

Bouxsai mbouj gwn laeuj,

Daeuj lajmbwn guh maz?

Cog dai moh hwnj haz,

Ma bae gwnz set nyouh.

Mbwk:

It wnggai gaiq laeuj,

Vunz gaeujraen mbouj ndei.

Haemhlawz gwn laeuj fiz,

Beij vunzngawz lij huk.

Sai:

Bouxsai aeu gwn laeuj,

Hek daeuj gingq guh caz.

Mbouj miz laeuj bae nda,

Baenz gijmaz baengzyoux.

Mbwk:

Ngeih mbouj ngah gwn laeuj,

Vunz gaeuj raeuz daiq yaez.

Haemh ninz din mbouj swiq,

Guh vunz mbouj seuqcingh.

Sai:

Danghnaeuz miz hek daeuj,

Aeu laeuj magyau cingz.

Haemhlawz mbouj swiq din,

Gou lingh ninz gizwnq.

Mbwk:

Sam wnggai gaiq laeuj,

Vunz gaeuj mbouj hwnj da.

Laeuj fiz da couh va,

Maxloh dang aencongz.

Sai:

Haemhlawz ndaej gwn laeuj,

Caeg daeuj gou mbouj lau.

Laeuj fiz ninz henz cauq,

Caeg lau mbouj gamj daeuj.

Mbwk:

Seiq wnggai gaiq laeuj,

Hek daeuj gangjum’um.

Caengz gangj couh vad fwngz,

Guengz gvaq vunz gvaq mbwn.

Sai:

Bouxsai mbouj gwn laeuj,

Daeuj ndaem naz guh maz?

Miz cienz mbouj aeu baz,

Youq lajmbwn fouz yungh.

Mbwk:

Haj wnggai gaiq laeuj,

Vunz gaeuj raeuz mbouj hwnj.

Aeu yah hix mbouj baenz,

Mwngz raen loeng mbouj loeng.

Sai:

Baengh di laeuj miz heiq,

Baengh di laeuj miz rengz.

Mehmbwk gangj vah mengz,

Doxceng lai fouz yungh.

Mbwk:

Roek wnggai gaiq laeuj,

Caengz miz yah couh yiemz.

Laeuj fiz fatbag dem,

Yah ienqhoij haq mwngz.

Sai:

Danghnaeuz miz hek daeuj,

Mbouj miz laeuj mbouj baenz.

Byaekmaenz soengq souh saw,

Baenz gijmaz baengzyoux.

Mbwk:

Caet wnggai gaiq laeuj,

Fatheiq daeuj mbouj ndei.

Lwg yah de mbouj ngeix,

Hangzlaeuj byaij cien mbat.

Sai:

Bouxsai mbouj gwn laeuj,

Gangj daeuj hix mbouj ndei.

Haemhlawz laeuj mbouj fiz,

Miz hong cungj mbouj guh.

Mbwk:

Bet wnggai gaiq laeuj,

Yah daeuj de hix lau.

Gwn laeuj fiz couh nauh,

Lau mbouj miz mingh ma.

Sai:

Gwn laeuj couh muengh fiz,

Guh hong couh muengh miz.

Caih laeuj fiz couh fiz,

Hongranz gou cungj guh.

Mbwk:

Gouj wnggai gaiq laeuj,

Vunz gaeuj baenz gaujvaq.

Gvaq giz cungj dwgcaengz，

Caenyoux bouxboux haemz.

Sai:

Gwn laeuj cij miz rengz,

Rengz hung guh hong ak.

Ak guh ndaej fatcaiz,

Caih gou gwn laeuj hom.

Mbwk:

Cib wnggai gaiq laeuj,

Hai ci cungj mbouj you.

Capci baenz gyayouz,

Gyaeuj ngunh roengz laj loh.

Sai:

Mbouj gangj gou caemh rox,

Hwnj loh cix aeu geiq.

Hai ci bae gizlawz,

Itdingh mbouj gwn laeuj.

Mbwk:

Daj seizneix hainduj,

Baeznaengz aeu gaiq laeuj.

Hek daeuj cij ndoet di,

Naekcingz yiengj vuenyungz.

Vahsat

Sai caeuq Mbwk:

Geij coenz fwen gaiq laeuj,

Bouxboux cungj aeu rox.

Gwn laeuj lai mbouj ndei,

Vunz gag rox cij baenz.

Baeznaengz laeuj mbouj gwn,

Hek ndei daeuj daengz ranz.

Doengz cimz di laeuj ndei，

Gangj riu angqfofo.

Vunz naeuz cingzngeih naek,

Gim caen beij mbouj gvaq.