Ciuhgonq, youq aen mbanj iq he, miz song beixnuengx, daeggo gik raixcaix, daegnuengx gaenx dangqmaz. Gyoengqde lij iq seiz, bohmeh cungj dai lo, baengh ndaw mbanj gyoengq boux sim ndei hawj gyoengqde gij gwn, cij maj hung baenz vunz.

Daeggo gik guh hong, youh gyaez guhdoj, hoeng de mbouj miz geijlai ngaenz, bae guhdoj mbouj ndaej geij nanz, ngaenz couh deng sai sat lo. Yienghneix de couh siengj yaeuh daegnuengx gai aen ranz vaih bae, ndaej ngaenz bae guhdoj. Daegnuengx mbouj doengzeiq, aenvih ranz yienz- naeuz vaih lo, hoeng lij dangj ndaej rumzfwn, mienx deng ndit dak, gai bae couh mbouj miz giz youq lo.

Miz ngoenz ndeu, daeggo doiq daegnuengx naeuz:“Raeuz caez dox- dax ba, aemq aen daeh naek dox- doengz bae bin baihnamz goengq bya ceiq sang haenx, bouxlawz bin daengz gwnz dingj bya gonq, aen ranz couh duh bouxlawz, ndei mbouj ndei?”

Daegnuengx han naeuz:“Bin bya couh bin bya, hoeng mwngz siengj dawz aen ranz bae gai, gou mbouj hawj!”

Daeggo gangj naeuz:“Daeg- nuengx mwngz siengj lai lo! Raeuz gaenq maj hung lo, hix aeu faen ranz dwg mbouj dwg? Couh aeu gij fap neix bae faen ranz. Mwngz gangj, raeuz aemq maz doxgaiq ndei ne?”

Seizneix, gwnz dingj go faex hung fwt dwk ndwn miz boux sien ndeu, de daengx gyaeuj hausaksak, gij mumh hau raez daengz naj aek, de doiq song de riu naeuz:“Gou hawj gyoengqsou boux he aen daeh he.” Gangj sat couh gvengh song aen daeh roengzdaeuj, gwnz daeh he sij miz “leih gyoengqvunz”, lingh aen he sij miz “leih swhgeij”. Song aen daeh naek doxdoengz.

Daeggo buet gvaqbae, gip dawz aen daeh “leih swhgeij”, daegnuengx menh byaij gvaqbae, couh gip aen daeh “leih gyoengqvunz”.

Ngoenz daihngeih, doxdax hai- nduj lo, boux sien daeuj hawj song beixnuengx neix dang bingzveij. Youq gwnz roen, daegnuengx mboujduenh daj ndaw daeh dawz gij doxgaiq okdaeuj, bangcoh gyoengq vunz henz roen, gyoengq vunz gujli daegnuengx haenqrengz bin, yienghneix daeg- nuengx bin bya bin ndaej engq soeng engq vaiq lo. Daeggo cingq caeuq daegnuengx doxfanj, de raen gijmaz doxgaiq ndei couh dwk roengz ndaw daeh, gimngaenz、gienzleih ndeinyauq gijmaz de cungj aeu, baenzneix aen daeh de couh yied daeuj yied naek, de bin bya hix engq dwgrengz lo， daengzlaeng baeg lai couh menh roengzdaeuj lo.

Doeklaeng, daegnuengx bin daengz gwnz dingj bya, hoeng daeggo ngamj bin daengz byongh bya couh laemx roengzbae, de hix mbouj sij ndaej cuengq aen daeh de aemq haenx, doek daengz dinbya dai lo.

Bouxsien gangj naeuz:“Aensim bouxlawz cij ngeix ‘leih swhgeij’, yawjraen ndeicawq couh ciengj aeu, gij rap de couh yied daeuj yied naek, doeklaeng de couh deng at laemx lo.”