Gaxgonq, youq ndaw Mbanj- cuengh gyawj Dahhoengz, miz dah sau ndeu heuhguh Dahvangh. De gig gyaeundei, ndang mbouj biz mbouj byom, naj lumj cehgve nei soem, bwnda giuz, lwgda ronghsagsag, cenjlaeuj diemzswd, hwet saeqiq, singgwz lingzlaeux, sing ndeidingq, ndeigyaez raixcaix. De lij gaenx guh mbeilaux, coengmingz lingzleih, sim lingz fwngz giuj, ceiq rox siuq va. Gij va、nywj、bya、roeg de siuq haenx lumjlili.

Miz ngoenz ndeu, Dahvangh siuq duz roeglaej he, ngamq siuq ndaej aenndang roeglaej, mboujcaengz siuq aen lwgda hwnjbae, hoeng ndang roeglaej couh ning hwnjdaeuj. Doek- laeng, de mbouj siujsim, deng cim baek haeuj fwngz bae, caek lwed hoengz ndeu lae okdaeuj, doek daengz giz yaek siuq lwgda roeglaej haenx, couh bienqbaenz lwgda roeglaej lo. Sawqmwh, roeglaej de siuq daj ndaw baengz mbin okdaeuj, “cici caca” heuh bae heuh dauq, youh coh dahsau ngaekngaek gyaeuj, naeuz: “Daxcej gou ha, docih mwngz! Mwngz fwngz giuj dajsiuq ndei, hawj gou ndaej okseng. Docih!” Roeglaej de siuq gangj sat, couh daj ndaw cueng mbin ok rog bae youz. Mbouj geij nanz, de youh mbin dauqdaeuj, naeuz:“Daxcej gou ha, gou daeuj caeuq mwngz guhcaemz, hawj mwngz gaijmbwq.” De caeuq Dah- vangh guhcaemz geij aen cungdaeuz, youh mbin ok rog bae lo.

Daengz banringzgvaq, Dahvangh sawqmwh dingqnyi rog cueng “bwng” dwk sing cungq yiengj ndeu, ciepdwk, youh dingqnyi “ba” sing ndeu caeuq sing gyangz “Gouqmingh ha, gouq- mingh ha!”. Dahvangh gaenjgip iet gyaeuj ok rog cueng bae yawj, raen roeglaej de siuq deng sieng laemx youq gwnz namh. De muengz bae hai dou buet okbae aeu soujgaen hau siujsim dwk duk roeglaej de siuq hwnjdaeuj, yaek dawz dauq ranz yw.

Couh youq seizneix, boux goenglaux yaek ndaej 70 bi ndeu, youq song boux vunzhoiq henhoh lajde byaij daengz naj Dahvangh. Ndawde boux vunzhoiq he sing hung naeuz: Duz roeglaej neix dwg lauxyez ranz gou dwk roengzdaeuj, mwngz mbouj ndaej aeu bae!” Dahvangh mbouj leixlangh de. Boux goenglaux neix couhdwg boux caizcawj aen mbanj neix, vunz laux sim mbouj laux, ndaw ranz de gaenq miz boux yah ndeu caeuq sam boux yahnoix, lij siengj ra dahsau oiq ndeu daeuj guh yahnoix dem. Seizneix de raen Dahvangh nienzoiq youh gyaeundei, myaiz laelili, siengj aeu Dahvangh bae guh yahnoix. De raen Dahvangh mbouj leixlangh vunzhoiq, hix mbouj hozndat, cijdwg menhmenh naeuz:“Dahsau, mwngz haengj duz roeglaej deng sieng neix, gou couh nyiengh hawj mwngz, hoeng mwngz aeu dapwngq gou aen diuzgen ndeu, couhdwg haq hawj gou guh yahnoix.” Dahvangh mbouj swt de, biq gaemz myaiz ndeu, cienq ndang couh buet haeuj ndaw ranz bae.

Ngoenz daihngeih, goenglaux baij vunz dawz gaen nohmou ndeu daeuj daengz ranz Dahvangh camyah, naeuz gvaq sam ngoenz couh heuh vunz ram giuh daeuj coux Dahvangh bae ranz guh yahnoix de. Bohmeh Dahvangh naeuz:“Gij saeh neix youz Dahvangh de gag gietdingh, dou guh bohmeh mbouj ndaej guhcawj.”Dahvangh ciepdwk naeuz:“Gou baenzbaenz cungj mbouj haq hawj gij vunz gaenx gwn gik guh haenx. Danghnaeuz de baij vunz daeuj gaemh gou bae, gou couh gaggaj.”

Boux caizcawj lauxyez neix rox mbouj ndaej apbik Dahvangh haq hawj de, couh naemj: Mboujyawx yungh gij fuengfap lumj aeu gebdiet gaeb duznyaen daeuj aeu de guh yahnoix gou. Baenzneix de couh cang guh mbouj aeu Dahvangh guh yahnoix lo, laeglemx caj gihvei baez daengz couh suenqgeiq Dahvangh.

Bihaenx mbwn rengx, ndaw reih ndaw naz gomiuz reuqroz lo. Ciuq gij fungsug Bouxcuengh, danhfanz bungz bi rengx, couh aeu caeq byajvuengz. Caeq byajvuengz seiz, itdingh aeu doiq lwgsai caeuq lwgsau ndeu bae caeq. Caizcawj yawj gihvei daeuj lo, couh caeuq yahsien yuk ndei, boux lwgsau aeu Dahvangh bae caeq ceiq ndei.

Mboujguenj bohmeh Dahvangh baenzlawz gouz yahsien, gyoengq beixnuengx hix daeuj bang gouz, cungj mbouj miz maz yungh. Seizneix, boux caizcawj lauxyez neix cienz ok vah: “Guh yahnoix gou, couh mbouj yungh dang boux lwgsau bae caeq byaj- vuengz lo.”

Dahvangh nyienh dai hix mbouj nyienh bae guh yahnoix boux caizcawj lauxyez neix, de siengj: Seizneix mbwn rengx, danghnaeuz bae caeq byajvuengz, doek fwn le, gomiuz ndaej gouq, vunzlai mbouj dai iek,