7 nyied 30 hauh banringzgvaq, gih raeuz bi 2016 Sawcuengh Vahcuengh suijbingz gaujsi youq Guengjsae Minzcuz Dayoz gauj. Baez gaujsi neix gungh miz 430 boux bauqgauj, ndawde, cogaep 152 boux, cunggaep 181 boux, gaugaep 97 boux, saedsaeh camgya gaujsi 376 boux. Gaujseng cujyau daj Namzningz、 Liujcouh、 Fangzcwngzgangj、 Ginh- couh、 Gveigangj、 Baksaek、 Hozciz、 Laizbinh、 Cungzcoj daengj 9 aen si gak gaep gihgvanh、 giyez saehnieb danhvei、godij gunghsanghhu daengj daeuj. Gaujseng mboujdan miz Bouxcuengh, hix miz Yauzcuz、 Mauznanzcuz、 Gwzlaujcuz、 Mulauj- cuz daengj gaujseng saujsu minzcuz, lij miz mbangj gaujseng Bouxgun dem. Gaujseng boux ceiq geq dwg Guengjsae Yisuz Yozyen boux gyausou duiyouh Nungz Gvangh gaenq ndaej 79 bi lo, boux ceiq oiq dwg hagseng Namzningz Si Yunghningz Gih Minzcuz Cunghyoz ngamq ndaej 16 bi.

Baez gaujsi neix dwg bi daih’it Swcigih Yinzminz Cwngfuj baecinj Sawcuengh Vahcuengh suijbingz gaujsi cugyamq haiguh hong cangzdaiva, Swcigih Minzyijveij gaenxmaenx boiqhab guh swcigih cizsuz gak gvendaengz danhvei、 gak si bumwnz guhhong vah minzcuz haenx gvangqlangh senhconz fatdoengh, cujciz haiguh hong gvendaengz bauqgauj caeuq hongsaeh gaujsi. Gaujsi ngoenzhaenx, Swcigih Minz- yijveij fucujyin Veih Yungjhungz、 fusinzsiyenz Yiz Feih caeuq Guengjsae Minzcuz Dayoz gvendaengz lingjdauj cunzyawj gaujciengz.

Ciuq cam rox, daj bi 2012 buenq bi laeng doxdaeuj, Namzningz Si Yinzsegiz、 Cizgaijban、 Gyauyuzgiz doiq lauxsae cungh siujyoz、gyau- yenzyenz gak gaep guhhong sonhag Cuengh Gun song vah saw haenx bingz cizcwngh seiz, boux gaenq gauj ndaej Sawcuengh Vahcuengh suijbingz gaujsi mbawcingq mizgven daengjgaep haenx ndaej mbouj yungh gauj cizcwngh vaiyij; Namzningz Si Minz- yijveij ciusou loegyungh bouxvunz camgoeng、 yienzlaiz Vujmingz Yen Gvangjbo Densidaiz ciu bouxboqyaem lanzmoeg Vahcuengh cungj iugouz boux bauqgauj itdingh gauj ndaej Sawcuengh Vahcuengh suijbingz gaujsi mbawcingq mizgven daengjgaep haenx; Swcigih Gyauyuzdingh、 Guengjsae Minzcuz Dayoz、 Guengjsae Swhfan Yozyen daengj doiq hag- seng gvendaengz conhyez camgya Sawcuengh Vahcuengh suijbingz gaujsi nem daengjgaep cingzcik hix guh ok gangjmingz gveihding. Gwnz- biengz yungh gij cingzcik Sawcuengh Vahcuengh suijbingz gaujsi haenx cugyamq ndaej daengz gwnzbiengz gak hangz gak nieb nyinhhawj.

(Swcigih Minzyijveij)