Denzdungh Yen Bingzmaj Cin Bwzguz Hungzginh Cunh dieg youq ndawgyang luegdah Dahyougyangh, diegrogsingz yienhsingz Denzdungh. Aenmbanj miz vwnzva lizsij gwzming gig lai, gingjdenj lijyouz saeknding lai cungj lai yiengh; daegsaek swnghdai nungzyez doedmauh, fungsug fung- cingz ndawbiengz lajmbanj naek- gywg; gingjsaek henz Dahyougyangh gyaeundei doenghgij daegdiemj neix, gonqlaeng ndaej dingh guh swcigih gaep gyaezguekcujyi gyauyuz gihdi caeuq si、yienh dangjyenz ganbu gyauyuz beizyin gihdi、hagsib Siz Ginbingz cungjsuhgi baenzdauq youqgaenj gangjvah cingsaenz gihdi daengj, aeundaej Swcigih minzcuz doxgiet cinbu senhcin cizdij、Baksaek Si seveicujyi lajmbanj moq hwnjguh gohyoz hwngfat cunh(mbanj) mingz- singh、Denzdungh Yen cauxlaeb senhcin ceng’aeu maenhndei senh- cin gihcwngz dangjcujciz doenghgij mingzdaeuz ndei neix.

Bwzguz Hungzginh Cunh miz gij conzdungj gwzming gig miznaj haenx, bi 1926, ndaw mbanj miz haujlai bouxcoz camgya gwzming hozdung. Bi 1929, ndaw mbanj gag cujciz le nungzminz hezvei caeuq nungzminz swveiginh, caemhcaiq laebbaenz Cunghgung Bwzguz Cunh Siujcuj, mbeilaux dwk dingjhoenx Gozminz- dangj fanjdungbai. Dwng Siujbingz、Cangh Yinzyiz、Leiz Ginghdenh doengh boux lingjdauj Baksaek Gijyi neix caemh daengz ndaw mbanj sonyinx gwzming gvaq, caiqlij miz Veiz Bazginz、Yiz Saugez、Veiz Yuzsanh daengj ciengzseiz daengz ndaw mbanj senhconz gwzming lijlun. Dangseiz, daengx mbanj 86 ranz vunz, cawz ranz dicuj ndeu le, gizyawz 85 ranz gungh miz 131 vunz camgya cizveiginh caeuq hungzginh, ndawde miz 69 boux ndaej bien haeuj Hungzcizginh 21 Swh 62 Duenz, 9 vunz camgya Hungzcizginh cangzcwngh bae baihbaek, ndawde miz 16 vunz vih saehnieb gwzming Cungguek soengqok diuzmingh dij- bauj bonjfaenh. Youq gizdieg miznaj caeuq saenzgeiz neix, lij ganqciengx ok boux ciengginh Cunghvaz Yinzminz Gunghozgoz ndeu—nyuenz Nanzgingh Ginhgih Canghgyazbingh swhlingyenz Cuh Hoyinz saucieng. Vunzraeuz gingqcungh aeueiq senh- lez, caez heuh dieg yinghyungz neix guh “Mbanj Hungzginh”.

Bwzguz Cunh ndaw gyaiq miz 9 aen cunhminz siujcuj, gungh 512 ranz 1850 vunz. Daj bi 2008 gvaqdaeuj, gij hwngfat ndaw mbanj ndaej bouxlingjdauj dangj caeuq guekgya simhoengz gvensim daengz. Vunz- mbanj cix ciuq gij vahdaengq caeuq maqmuengh bouxlingjdauj bae doxgiet roengzrengz guh, doenggvaq diegdeih riuzcienj fuengsik yinxhaeuj gaqbungz ndaemganq gvehoengz、makyungz 200 moux, guhbaenz yiengh vunqsik canjyez daegsaek aeu haeuxnaz、byaekcou byaekdoeng dajndaem guhcawj, ciengx mou、guh diemqgwnngaiz、nungzcanjbinj gyagoeng、hai ci daehhuq doengh gijneix guhbouj haenx, coicaenh nungzyez demhwnj caeuq nungzminz demsou, bi 2015 daengx mbanj nungzminz moix vunz bingzyaenz cinghsouhaeuj 10038 maenz.

Geij bi neix daeuj, Bwzguz Cunh haenqrengz ca ndei hong hwnjguh gihcuj sezsih, roengzngaenz 300 lai fanh maenz guh le Laeuzbanhgoeng Mbanj Hungzginh、Sigbei Mbanj Hungzginh、Aenranz Baijlied Hungz- ginh、Roen Hungzginh、Doulaux Mbanj Hungzginh、Hungzginh Lezsw Ginenbeih doenghgij gunghcwngz daiq “hoengz” neix, lij guh le “ranzsaw nungzgya”、 “funghranz saenqsik nungzyez gohgi” dem, hengz ndei lajmbanj hozcoz yihliuz moq、lajmbanj sevei ciengxlaux baujyienj moq gak hangh cwngcwz ik vunzlai neix, vanzlij laebbaenz le “Bwzguz Hungzginh Cunh Bouxlaux Habciengqduenz” caeuq “Bwzguz Hungzginh Cunh Bouxcungnienz Bouxcoz Vwnzyidui”, hawj vunzlai sim’angq gvaq saedceij ngoenz- ngoenz cungj vuenyungz.