Liuzsaez:

Haq daeuj cib geij ngoenz,

Dongx lwg mbouj han gvaq,

Dahbawx lumj duzdinz,

Baez ning couh ndaq vunz,

Fad buenz youh vit vanj,

Lumj ciq de fanh ngaenz,

Baenzneix gvaq saedceij,

Baenzlawz gvaq ndaej ndei?

Gvan mwngz baez ok naj,

Dangnaj gangj cingcuj,

Daxmeh miz maz loek,

Gou ndei gaij gvaqdaeuj,

Yaek fouzleix luenh nauh,

Doeklaeng couh haep bak.

Yahlungz:

Daxmeh mbouj miz loek,

Loek dwg ma rieng raez,

Ngauz rieng bi’ndadndad,

Gou yawj gag fatheiq.

Liuzsaez:

Bawx gangj neix mbouj deng,

Mwngz gangj ma rieng raez,

Yienghyiengh cwnggen miz,

Gvanbaz dou habfap,

Duzbyaj bag mbouj deuz,

Mwngz maj ndaej gig lengj,

Aeu miz di suciz,

Raeuz caemh gaiq bakdou.

Suenq gou miz mbouj deng,

Hix gaej baenzneix hut,

Suenq gou guh saeh loek,

Hix gaej baenzneix bongz.

Yahlungz:

Gou couh baenzneix ndaq,

Mwngz couh dwg rieng raez,

Daj laj ep daxboh,

Boh gwn deng noh haeu,

Cij aeu mwngz guh yah,

Siengj aeu dou nyinh mwngz,

Cijmiz bya bienq gumh,

Caj daengz ciuh baihlaj,

Ngoenzlawz boh mbouj youq,

Ndek mwngz roengz laj dat.

Goenglungz: (rag Liuzsaez deuz)

Laihnaeuz daeuj ndaep feiz,

Dauq deng feiz coemh ndoeng,

Dahbawx heiqgengen,

Nyaenx de gvaqbae gonq,

Naj laux nyiengh naj coz,

Raeuz bae ndaw rug ndoj.

Liuzsaez: (doq byaij doq ciengq)

Nyiengh mwngz sam liengx hing,

Mbouj dwg mbouj rox caengh,

Naj laux nyiengh naj coz,

Maqmuengh mwngz dingzcij,

Gaej hawj caenx roengz dat,

Mwngz ak gou hix ak,

Danghnaeuz gwnz haw moeb,

Yaep ndeu couh hingz mwngz.

Yahlungz:

Gou couh mbouj dingzcij,

Genhgez caenx mwngz deuz,

Danghnaeuz caenx mbouj gvaq,

Gou couh deuz bae haq,

Hawj Daeglungz guhdoeg,

Hawj lwg Lungz baenz gyax.

Daeglungz:

Bawx mwngz baenzneix yak,

Gaej hawj feiz coemh ndoeng,

Mehlaeng gangj ndaej deng,

Doxhuz couhdwg gim,

Nyaenx cij dwg fap ndei,

Vunzcaen huz saeh hoengh.

Yahlungz:

Mwngz caen dwg huk lai,

Bohmeh dwg bouxhek,

Beixnuengx fat daraiz,

Gvanbaz caemh cienzcaiz,

Miz ngoenz daxboh dai,

Ndoengcoengz hawj yahmaiq,

Mwngz siengj aeu couh nanz,

Ngoenzneix vih mwngz naemj,

Mwngz dauqfanj hut gou,

Vih gaiq ndoeng gocoengz,

Gou couh guh vunzyak,

Baez raen de couh ndaq,

Gyaep de lingh bae haq.

Mwngz yaek mbouj bang gou,

Gou couh gven bakdou,

Mwngz lingh ninz aen rug,

Raen mwngz couh simfanz.

Daeglungz:

Yienzlaiz dwg yienghneix,

Vih gaiq ndoengcoengz haenx,

Mehyah bienq vunzyak,

Mwngz gangj gou couh doeng,

Lau ndoeng miz vunz baen,

Doeklaeng gou bang mwngz,

Caezgya naemj banhfap,

Bik mehlaeng bae haq,

Aeu gaiq ndoeng maenhfwd.

Gaenlaeng

10 ngoenz gvaq le, Liuzsaez dai lo, aenvih ngoenzhaenx de caeuq Yahlungz doxceng, yienznaeuz Liuz- saez mbouj deng sieng gizlawz, hoeng de gamjdaengz, ranz Goenglungz de caiq hix youq mbouj ndaej roengzbae lo. Gwnzbiengz baenzneix hung, cix mbouj miz dieg hawj de youq. Ndigah, de diuq roengz dah Genzgyangh raemx fanboekboek bae lo. Daiq gij maq- muengh aicingz bae, hix daiq bae gij saetmuengh ciuhvunz bae.（sat）