Mbanjdaih miz mehbaj ndeu heuhguh Bajsam, bineix 56 bi, de boux vunz nyen gwn nyen yungh. Bajsam miz daeglwg he 35 bi youq diegrog guh hong. Bineix Bajsam yungh bae dingzlai cienz ngamq hawj daeglwg de coux ndaej bawxmoq. Daeglwg Bajsam doxaeu ndaej ndwen he youh dauq bae rog ra cienz daeuj boiz caiq. Vah sug gangj ndaej deng——“Bouxvunz ranz gungz maz cungj mbouj lau, cij lau miz bingh.”

Miz ngoenz he, bawx Bajsam sawqmwh baenz bingh. Bajsam vazmuengz bae camyaz, heuh Yahsien daeuj ranz gyaep fangz, yungh bae geij bak maenz. Hoeng, bingh dahbawx de mbouj raen ndei saek di. Bajsam cijndei daiq dahbawx bae mwnzcinj seivunz dajcim geij ngoenz, youh sai bae geij bak maenz ngaenz, bingh dahbawx hix mbouj raen ndei. Caezgya cungj naeuz:“Bajsam ha, hoj gaej saenq mingh, bingh gaej saenq fangz. Ceiq ndei daiq bawx mwngz bae ndaw si yihyen yawj mbat he, nanz lai bingh lauheiq gya naek bw.”

Bajsam cijndei bae ciq caencik baengzyoux ndaej 4000 lai maenz caeuq dahbawx de bae ndaw si aen yihyen ceiq hung ceiq okmingz haenx yawj bingh.

Ngoenz haenx, song boux de youq ndaw yihyen baizdoih gvaqhauh、genjcaz……Buenq ngoenz gvaqbae, couh yungh bae 2000 lai maenz lo. Canghyw heuh bawx Bajsam youq ndaw yihyen yw geij ngoenz dem, gyau 10000 maenz gonq. Naengh cij cawx yw couh aeu 3200 maenz. Bajsam baez dingq, doeksaet caez, de naeuz:“Cienz mbouj gaeuq, dou bae ciq daeuj gonq.”

Bajsam songde dawz ndei vayendanh、bonjsijbinghcingz daengj doxgaiq naj nyaeuq doeknaiq byaij ok bakdou yihyen. Hai, dieg seng vunz mbouj sug, bae gizlawz ciq cienz? Song boux de naengh youq gwnz eij gunghgyauhcan caj ci, yaek dap cigunghgyauh bae cehcan. Sawqmwh miz boux yah he 40 lai bi gvaqdaeuj unqswnh dwk cam Bajsam miz maz saeh naj baenzneix saep. Bajsam raen de simndei, couh cigsoh gangj hawj de nyi, lij dawz bonjsijbinghcingz hawj de yawj. Yah haenx yawj le naeuz:“Gij bingh neix caeuq bingh gvan gou doxdoengz. Gwn cungj yw neix ndei gig vaiq. Hoeng yw bengz di, bingz he 500 maenz. Gwn 4 bingz couh bingh ndei duenxrag, gvan gou gaenq gwn bae 3 bingz, seizneix gou dauq daeuj cawx bingz ndeu dem.” De gangj sat dawz bingz yw he hawj Bajsam yawj. “Caen dahraix? Gizlawz miz gai?” “Gou yaeuh mwngz guh maz, youh mbouj dwg gou gai yw. Saenq mbouj saenq youzcaih mwngz. Baihnaj 100 mij, miz aen diemq gai yw he miz gai.” Bawx Bajsam naeuz:“Hawj gou sawq gwn mbat he yawjyawj.” “Yw bengz lai, gou mbouj ndaej hawj mwngz sawq gwn. Mwngz bae cawx daeuj gwn, buenq diemj cung sikhaek miz yauq!” Seizde, ci daeuj lo, boux yah haenx hwnj ci bae lo.

Bajsam caeuq dahbawx de dox- yaeng: Youq yihyen cawx yw aeu 3200, neix cij aeu 2000, couh cawx gij yw ba. Yihyen caen rox ngaek vunzbingh. Song boux de gig angq, cungj naeuz bungz raen vunz gviq lo, sikhaek gvaqbae cawx yw. Dahbawx Bajsam sawq gwn mbat he, gvaq yaep he, bingh de lumj ndei di dahraix. Yienghneix song boux de couh cawx 4 bingz yw, angqvauvau dap ci lienzhaemh dauq ranzmbanj lo.

Dauq ranz le, bawx Bajsam caiq gwn gij yw haenx mbat he, bingh caen ndei dahraix. Hoeng, caiq gwn couh mbouj miz maz yungh lo, bingh dauqfanj gya naek. Seizneix gyoengq- de cij rox deng vunz yaeuh lo, gij yw neix dwg yw gyaj. Bajsam mbouj ndaej mbouj dauq ciq cienz dawz bonjsij- binghcingz caiq bae aen yihyen gaxgonq cawx yw dauq, dahbawx de gwn le bingh cij ndei. Bajsam dawz yw gyaj bae doiq, bouxvunz gai yw mbouj hawj, Bajsam hoz gig ndat. De ngeix gonq siengj laeng, gig ienqhoij sai bae 2000 maenz ngaenz.

Gyoengq beixnuengx, seizneix youq henz bakdou yihyen daih roxnaeuz gwnz haw cungj miz vunz- rwix cang yaeuh bouxbingh. Caezgya aeu geiq ndei: Huq ndei mbouj bienzngeiz, bienzngeiz huq mbouj ndei; sim dam yungzheih cangqdangq. Miz bingh lijdwg bae yihyen cingqsik yw bingh ndei lai vaiq bw!