Gaxgonq, ndaw mbanj raeuz miz daegmbauq ndeu heuhguh Daeg- gvangh, de ngoenzngoenz cungj bae guhcaemz. Baeznaengz daxmeh heuh de bang guh hong, de cungj dwg ra gak cungj lijyouz daeuj doi, miz seiz naeuz hwet naet, miz seiz naeuz gyaeuj dot, daxmeh dawz de mbouj miz banhfap, couh caih de doeng youz sae youz.

Miz ngoenz ndeu, gwn haeux- caeuz sat, Daeggvangh byaij daengz baihlaeng daxmeh de, yaengx gaemx- gienz hwnjdaeuj bang daxmeh de dub hwet. De itmienh dub itmienh naeuz:“Daxmeh, mwngz ngoenzneix bae gvej haeux dwgrengz lai lo, gou bang mwngz soeng hwet.” Daxmeh raen daeglwg roxsoq dangqmaz, miz di geizheih, couh naeuz:“Yu, haemhneix daeglwg gou baenzneix roxsoq.” Daeggvangh byaij daengz baihnaj daxmeh de, riuhihi doiq daxmeh de naeuz:“Daxmeh, gouh haiz gou gaenq vaih lo, mwngz cawx gouh moq ndeu hawj gou, ndaej lwi?” Gangj sat lij iet fajdin hawj daxmeh de yawj gouh haiz vaih de.

Daxmeh de ngaem gyaeuj baez yawj, raen gouh haiz daeglwg gaenq sik dwk “aj bak riuvauvau” lo. Gizsaed daxmeh de caeux couh rox lo, gaenq cawx gouh haiz moq ndeu ma lo, cinjbi ra aen gihvei hawj Daeggvangh. Daxmeh de daegdaengq doeksaet, naeuz:“Yo, gouh haiz daeglwg gou vaih lo, gou yaek cawx gouh moq he hawj de cij ndaej lo.” Gangj sat lij lumh aen gyaeuj Daeggvangh geij baez, caiq hozunq dwk naeuz:“Lwg a, haiz moq gojyij cawx hawj mwngz, hoeng mwngz yaek caeuq daxmeh guh gienh saeh he gonq cij ndaej.” “Ndaej a ndaej a, daxmeh, vaiq gangj dwg maz saeh?” Daxmeh de naeuz:“Gwnz ciengzdakhaeux miz dong haeux ndeu caengz dak gvaq, ngoenzcog daengngoenz hwnjdaeuj mwngz couh bae dak, guh ndaej lwi?” Daeggvangh yienznaeuz miz di mbouj cingznyienh, hoeng vihliux gouh haiz moq hix couh sikhaek hanbak lo.

Ngoenz daihngeih, daxmeh de caeuxcaeux couh bae ndaw reih guh hong lo. Daengngoenz hwnjdaeuj lo, ndit ciuq dwk gwnz ciengzdakhaeux ndatfawqfawq. Daeggvangh byaij daengz henz dong haeux, dawz gaiq daengqbeh hwnjdaeuj cinjbi dak haeux. Seizneix, de youh gik hwnjdaeuj lo. De siengj： Dong haeux baenzneix hung, ngoenzlawz cij dak liux, yunghrengz lai lo, gou mbouj dak lo. Caiq gangj, daxmeh seizneix youh mbouj youq gizneix, de daengz haemh cij dauqma, youh mbouj rox gou dak caengz dak. Caj haemhneix daxmeh guh hong dauqma, gou caiq lwnh de nyi haeux gaenq dak lo, daengngoenz roengz bya gou couh yo haeujbae lo. W, couh yienghneix guh. Doeklaeng de couh bae guhcaemz baenzngoenz lo.

Daengngoenz doek congh lo, Daeggvangh ma daengz ranz ngamq ndaej yaep he, daxmeh de hix souhong dauqma lo. Daeggvangh vaiq buet daengz dangqnaj daxmeh de, bauq naeuz:“Daxmeh, ngoenzneix gou gaenq dak haeux lo, gou guh dwk buh dumz liux.” Daxmeh nai de naeuz:“Mbouj youqgaenj, daeglwg gou bienq ndaej naengzganq raixcaix, ngoenzcog caiq dak ngoenz dem couh miz haiz moq daenj lo.” Daeggvangh dingq le gag laeglemx riu.

Ngoenz daihsam, Daeggvangh ciuqlaeh youh bae guhcaemz baenz- ngoenz mbouj dak haeux. Banhaemh, Daeggvangh ma daengz ranz, ngamq byaij haeuj ndaw ranz, couh yawjraen daxmeh de cingq cawj haeux. Daxmeh de raen Daeggvangh ma lo, couh cam:“Lwg a, dong haeux dak hawq la?” Daeggvangh han naeuz:“Daxmeh cuengqsim, gou dwgrengz song ngoenz, haeux gaenq dak hawq lo.” Daxmeh de yenzsuz dwk naeuz:“Lwg a, mwngz gaej yaeuh gou lo, mwngz gaenbonj mbouj bae dak haeux gvaq, gij gik mwngz daengz seizlawz ndaej gaij gvaqdaeuj a?” Daeggvangh dingq le nyaenq dwk naj hoengz caez.

Haet daihseiq, daxmeh de caj Daeggvangh gwn haeux imq le, daiq de bae daengz ciengzdakhaeux dak haeux. Mehlwg song boux caez caenh baz, yaep he dong haeux couh dak yaek liux, lij lw di he, Daeggvangh yunghrengz baez baz, sawqmwh daengqbeh baz ndaej daeh doxgaiq ndeu. De dawz hwnjdaeuj baez yawj, ndaw daeh cang miz gouh haiz moq ndeu. Sikhaek, de fwt singj gvaqdaeuj, roxnyinh swhgeij gaxgonq guh loek lo, caen doiq mbouj hwnj daxmeh de. Lij caengz caj daxmeh de hai bak gangj vah, Daeggvangh byaij daengz dangqnaj daxmeh de, naeuz:“Daxmeh, gou rox mwngz gig gyaez gou, coengzlaiz mbouj sij ndaej hut gou fad gou gvaq, mbouj hawj gou guh hong naek gvaq. Seizneix heuh gou guh hong dwg lau gou gik lai doeklaeng mbouj miz gijgwn gijyungh. Baezlaeng gou itdingh caeuq mwngz gaenx guh hong, mbouj caiq caeggik lo.” Gangj sat doq gotumj daxmeh de.

Daxmeh de hix gaenjgaenj gotumj daeglwg, got haujlai nanz haujlai nanz, got dwk Daeggvangh raemxda doekbyoegbyoeg bae.