Gaenh geij bi neix daeuj, Cingsih Si baengh swhyenz ywdoj fungfouq、 diegnamh biz caeuq dienheiq ndei daengj mizleih swhyienz diuzgienh, haenqrengz fatdoengh vunzlai daj- ndaem ywdoj, hawj canjnieb mbouj- duenh hwngfat guhhung, bang vunzlai dieg saujsu minzcuz demsou.

It dwg okdaiz cwngcwz, daezsang dajndaem yiedcingz. Aen si neix gvidingh noengzhoh dajndaem ywdoj caemhcaiq mienhcik lienzbenq daengz 10 moux doxhwnj, moix moux roengz ngaenzgoek 1000 daengz 5000 maenz, ndaej laebdaeb 3 bi bued hawj boujdiep moix moux 300 maenz, gikfat le gij yiedcingz vunzlai dajndaem ywdoj.

Ngeih dwg cingjhab bumwnz swhyenz, gyahung beizyin ligdoh. Gaenxmaenx cingjhab bangrex、 minz- cuz、 gohgi、 gyauyuz daengj bumwnz swhyenz hengzguh beizyin dinfwngz dajndaem ywdoj, doenggvaq banh banbeizyin、 banh hoihyaenglwnh、 yienhciengz sonyinx daengj hingzsik, doiq vunzlai dajndaem ywdoj guh cienzmienh beizyin.

Sam dwg gaem ndei canjsiu fugsaeh, gaijgez youheiq noengzhoh. Aen si neix yungh “gunghswh+gihdi+noengzhoh” caeuq “gunghswh+hozcozse+gihdi” doxgap vunqsik, doenggvaq vunzlai ok diegnamh、 goengrengz haeujguj, gunghswh ok cehfaen、dinfwngz haeujguj daengj hingzsik guh doxgap hwngfat, laeb diegguhyiengh lienzbenq dajndaem ywdoj 16 aen, yinxhaeuj Guengjsae Cwngdaz Ywdoj Hwngfat Mizhanh Gunghswh daengj giyez, gyagoeng gij ywdoj vunzlai ndaem okdaeuj haenx, saedhengz baujgyaq dinghdan caeuq leih’ik doxcug, gyangqdaemq vunzlai dajndaem fungyiemj, baujcang diuz roen gai huq, gaijgez youheiq vunzlai.

Ciuq cam rox, aen si neix yamqlaeng yaek caenh rengz hwngfat dajndaem ywdoj mienhcik daengz 10 fanh moux doxhwnj, souhaeuj daengz 3.2 ik maenz doxhwnj, hawj canjnieb ywdoj baenz diuz roenloh youqgaenj vunzlai dieg saujsu minzcuz demsou baenzfouq he.(Yangz Boz/杨 博)