Mbanjgujbuz dieg youq Gujli Cunh Bwzgwngh Yangh Yinhcwngz Yen, aenmbanj sam mbiengj byasang hophumx, ranzcaep dwg yiengh ranzcanx Bouxcuengh gig denjhingz de, gij yiengh aenranz seuqset ndeiyawj, daepdoq gig miz daegsaek, gaenq miz geij bak bi lizsij, dwg yiengh caizliu caensaed yenzgiu vwnzva Bouxcuengh mbouj raen miz geijlai aen ndeu, caemh dwg gizdieg ceiqndei guh lijyouz daegsaek fungcingz Bouxcuengh ndeu.

Mbanjgujbuz daengx mbanj miz 47 ranz 128 vunz, vunzmbanj cungj dwg Bouxcuengh, cienz- bouh dwg singq Vuengz. Ranghdieg baihnamz mbwn hwngndat fwndoek lai, seiqlengq cumxcwdcwd, lij ciengzseiz miz raemxrongz cungdongj roengz- daeuj. Bwzgwngh Yangh dwg rangh diegbya, miz liuhrin lai, gij ranzcanx ndaw mbanj, caengzdaej gaq hoengq, aeu saeurin guh diuzgaq cix mbouj deng nduknaeuh, saeurin roxnaeuz saeufaex dingjdaemx gij naekcaem gwnz bam, seiq mbiengj mbouj caep ciengz, aeu daeuj ciengx bitgaeq、cwzvaiz、mou yiengz caeuq dong fwnzhaz cuengq haeuxraeh haeuxyangz doengh gijneix; gwnz bam cix aeu saeufaex daemx youq gwnzsang, hawj vunz youq, yienghneix guh le, gawq ndaej re cumx, caemh ndaej fuengz duznyaen, ndaej miz haujlai yiengh yungh bw. Seizneix Mbanjgujbuz miz 32 aen ranzcanx louzce ndaej haemq ndei.

Ranzcanx youq ndaej cwx- caih, hoeng refeiz、baizraemx、veiswngh doenghgij neix cix mbouj ndei guh geijlai, doengh bi neix daeuj vunz ndaw mbanj menhmenh ndaej vut gungz ndaw daeh miz ngaenz le, couh miz vunz cek ranzcanx gaeuq hwnj ranzlaeuzcien lo, ranzcanx gaeuqgeq cug bi gemjnoix. Doiq gijneix, vunzlai ndaw mbanj caeuq ndaw yienh mizgven bumwnz cix cien fueng bak geiq siengj banhfap comz ngaenz baujhu gij ranzcanx gaeuqgeq dijbauj Bouxcuengh raeuz neix, cimhra diuzroen gawq ndaej hawj vunz diegbya miz dieg hwnjguh ranzmoq youh mbouj yungh ceklid ranzcanx gaeuqgeq bae, hawj faenh yizcanj dijbauj ciuhgeq Bouxcuengh louzce roengzdaeuj neix daihdaih cienz roengzbae.