Daeglungz:

Mehyah gaej luenh gangj,

Gou roxnaj Liuzsaez,

Yienznaeuz vunz mbouj lengj,

Cij haq gvaq gvan ndeu,

Ciengz lak gyoengqvunz gaex,

Gyong vaih vunzlai daem.

Daxboh miz mbouj deng,

Raeuz gaej caeuq vunz boq,

Ndoengcoengz geij bak moux,

Fwngz daxboh daeuj ganq,

Daj ndoi fwz baenz ndoeng,

Yungh bae geijlai goeng,

Lae bae geijlai hanh,

Neix dij geij bak fanh,

Canh ndaej ngaenz raeuz yungh,

Aen laeuz daxboh hwnj,

Raeuz ndaej youq cwxcaih,

Gaej aeu luenh fatheiq,

Gou dwg boh ciengx hung,

Gaej aeu luenh gangj vah,

Ngoenzneix boh aeu yah,

Gag de bae dajleix,

Raeuz dang lwg dang bawx,

Cijndei youz bouxlaux,

Yahmaiq caiq haq vunz,

Couhdwg aen swyouz,

Faplwd mingzbeg naeuz,

Raeuz baenzlawz bae byah？

Yahlungz:

Haq deng gvan yiengh bwnh,

Vunz raen riungaenngaen,

Laihnaeuz ndoengcoengz cungj duh

raeuz,

Mbouj ngeix yahmaiq hix daeuj ceng,

Bouxgvan mbouj ngeix mehyah naemj,

Bak fanh ndoengcoeng mbouj hawj

baen,

Canj deuz yahmaiq mbouj doxyaeng.

(Cienq daengz rug Goenglungz)

Boh mwngz 60 bi,

Vihmaz baenzneix auq,

Aeu duzma rieng raez,

Hawj vunz gangj mbouj sat.

Goenglungz:

Lwgnyez bing duhhenj,

Bouxlaux hix ndoet myaiz,

Sou doiq haeuj doiq ok,

Lumj duzmbaj yaemyieng,

Boh yienznaeuz bi laux,

Godan hix hojyouq,

Ngoenzneix ra vunz buenx,

Raen ngwz ndaej aeu damj,

Guhcaemz ndaej gaem fwngz,

Yawj lwg naj nyaeuqrad,

Nanzdauh miz yigen？

Yahlungz:

Gou miz aen yigen,

Mwngz heuh Liuzsaez deuz,

Gaej daeuj haq ranz raeuz,

Mwngz yaek hozgyaez de,

Ndaw ndoi bae raen de.

Goenglungz:

Yienghneix gangj mbouj deng,

Gou caeuq de doxaeu,

Cwngfuj goep yaenq nding,

Bonj cwngq ndinghoengzhoengz,

Dwg habfap gvanbaz,

Banngoenz gig ronghsag,

Vihmaz lumj guhcaeg,

Bae ndaw ndoi doxraen,

Mehlaeng miz mbouj deng,

Yawj daengz aen naj gou,

Gaej doxndaq doxceng,

Yawj daengz gou laux lo,

Gaej doxceng doxdaeuq,

Hawj vunzrog riu gaeuq.

Yahlungz:

Dah dumh mbouj ndaej ndoeng,

Bawx guenj mbouj ndaej goeng,

Gangj dai mwngz mbouj dingq,

Yawj nyapnyaj doek da,

Mwngz couh beij ma cienh.

（caengz sat）