Doenghbaez, Mbanjcuengh miz boux yahmaiq ndeu heuhguh Dahbuh, ranz youq laj dinbya. De gig sinhoj dwk ganq sam daeglwg.

Seizneix sam daeglwg cungj majhung baenz vunz lo, ndaw ranz gij hong naek haenx cungj guh ndaej. Dahbuh ndaej ciensim guh gij hong daemj de simgyaez.

Dahbuh gaenx guh、swnzsienh youh coengmingz, sim lingz fwngz giuj. Gij man de daemj, bouxboux yawj le cungj bak haenh mbouj dingz. De bi daengz byai daemj man cungj mbouj dingz gvaq, mboujdan gyangngoenz daemj, caiqlix gyang- haemh hix daemj.

Seizhaenx, lij mboujcaengz miz dendwngh, gyanghaemh daemj man cijndaej diemj yeih, hoenz yeih oenq dwk da de foeg, raemxda lae mbouj dingz. Raemxda doek daengz gwnz man, bienqbaenz daengngoenz hoengzgywggywg, bienqbaenz dujva hoengzfwdfwd, lij bienqbaenz va、nywj、gofaex、duzbya、duznon、duzroeg lumjlili. Daemj sam bi, dauqdaej daemj ok fuk man gyaeundei ndeu lo.

Ngoenz he, Dahbuh dawz ok fuk man ngamq daemj baenz youq bakdou ranz ngonzyawj. Sawqmwh, mbwn laepnyamnyam, rumzraq bongjfofo, ci deuz fuk man haenx lo. Fuk man haenx deng ci daengz dieg gyae- gyanggyang bae.

Gij doxgaiq aeu sam bi seizgan guh baenz, couh yienghneix siusaet. Dahbuh siengsim raixcaix. De giet- dingh couhcinj aeu mingh bae vuenh hix itdingh yaek ra fuk man haenx dauqma. De baij Daegdaih caeuq Daegngeih bae ra gonq, hoeng daengz haemhndaep, mboujdan ra mbouj ndaej fuk man haenx dauqma, song daeglwg de bae ra fuk man haenx hix mbouj raen dauq.

Yienghneix, de youh baij daeglwg iq de Daegcaiz bae ra song daeglwg caeuq fuk man haenx.

Daegcaiz mbouj lau hoj、mbouj lau baeg, bin bya gvaq dah, daeuj daengz gwnz Byadaengngoenz, yawj- raen aen ranz ronghmyanmyan ndeu.

Ndaw ranz cienz ok baenz raq sing go caeuq sing riu. Daegcaiz byaij daengz bakdou baez yawj, raen fuk man daxmeh de daemj haenx cingq venj youq gwnz ciengz, gyoengq dahsien baenz baiz naengh youq naj fuk man haenx, doq ciuq fuk man haenx daemj doq ciengq go.

Gyoengq dahsien raen Daegcaiz, roxnyinh gig geizheih, cam de miz maz saeh. Daegcaiz gangjmingz de vihmaz daeuj, gyoengq dahsien gig simhoengz dwk dakdaih de, louz de ninz haemh ndeu.

Haemhhaenx, dahsien lienz- haemh ciuq dwk daemj man. Miz boux dahsien daenj buh hoengz ndeu daemj sat gonq, ciepdwk couh laeglemx siuq gij siengq bonjfaenh daengz gwnz man Dahbuh bae.

Ngoenz daihngeih, gyoengq dah- sien boizhawj Daegcaiz fuk man haenx, hawj Daegcaiz dawz dauqbae.

Liggaeuq sam nyied cosam, Daegcaiz dauq daengz ranz, de baez haeuj ranz, couh sing hung naeuz:“Daxmeh, gou dawz fuk man mwngz daemj haenx dauqma lo.”

Dahbuh vuenheij dangqmaz, ganjgip ciep aeu fuk man haenx, youh siujsim sisi mbehai.

Sawqmwh, rumz cififi, fukman deng ci hai mbeok, hungloetloet, beij gaxgonq lai hung geij boix. Ciepdwk, rongh gim baez myig, aen ranz Dahbuh bienqbaenz ranz moq youh sang youh hung youh rongh. Seiqhenz ranz va moq angj hai, miz boux dahsau lengj he ndwn youq ndaw cazva.

Dahbuh byaij gvaqbae cam:“Mwngz dwg bouxlawz? Vihmaz daeuj daengz gizneix?” Boux dahsau haenx naeuz:“Gou dwg boux dahsien. Aenvih gou siuq gij siengq gou youq gwnz fuk man mwngz daemj, couh deng dawz daengz gizneix. Gou baez raen Daegcaiz couh simgyaez de lo, gou nyienh caeuq de guh gvanbaz.”

Dahbuh dingq le angqvauvau, ganjgip cingj de haeuj ranz bae naengh. Haemhhaenx, couh hawj de caeuq Daegcaiz doxaeu.

Aen siusik Dahbuh aeu ndaej dahsien guh bawx cienz doh mbanj, gyoengq beixnuengx faenfaen daeuj angqhoh. Dahsien couh guh haeuj- naengj hajsaek daeuj dakdaih daihgya. Ndawde, haj saek, dwg maqmuengh gij ndwenngoenz daengzcog couh lumj seizcin yienghhaenx hoengzhoengz henjhenj; aenvih haeuxcid niu, giet baenz ndaek le mbouj yungzheih sanq, de yienjok dahsien caeuq vunz lajbiengz gaenjmaed doxgiet, ciengx- lwenx mbouj doxbiek.

Caezgya gwn haeuxnaengj haj- saek le, roxnyinh cungj ngaiz neix gig daegbied, gig ndei gwn, feihdauh youh hom, couh cam dahsien haeuxnaengj hajsaek baenzlawz guh. Dahsien mbouj muenz saek di, ciengzsaeq dwk gangj hawj daihgya dingq. Daihgya dingq le, cungj geiq maenh gij guhfap haeuxnaengj hajsaek, doxdauq lij gangj hawj bouxwnq dingq.

Gvaqlaeng, moix bi baez daengz sam nyied cosam, couhdwg ngoenz dahsien caeuq Daegcaiz doxaeu caemhcaiq son vunzlai guh haeux- naengj hajsaek, vunz Bouxcuengh cungj guh haeuxnaengj hajsaek daeuj gwn.

(Vangz Gyanghmyauz hoiz )