Mbanjgeq Cungzsanh, youq baihdoengbaek yienhsingz Yungjfuz dieg 20 goengleix gyae haenx, geij bak bi daeuj, vwnzva cwkrom nanwt, daihdaih ok vunzcaiz, miz aen cwngheuh ndei “ranz ndeu sam (boux) cinsw, bohlwg haj (vunz) gaujhwnj”. Ranz singq Leix ndaw mbanj, dwg gyoengq canghvehveh youq ndaw guek mizmingz ndeu, gwnzbiengz cwng dwg “bitveh lumj ndoengfaex”, Ciuhcingh boux canghvehveh okmingz Lij Gizsou maegndaem veh vamoiz gag miz daegsaek, ndaej heuhguh “fwngz- maenh vamoiz”. Bi 2011, aen mbanj neix ndaej senj haeuj buek daih’it aenmbanj okmingz vwnzva lizsij Guengjsae.

Mbanjcungzsanh dwg diegcoj boux canghsawveh okmingz Ciuh- cingh Lij Cihyenz, youq Ciuhmingz nienzgan Vanliz hwnjguh, daengx mbanj miz singq Leix singz Vuengz song singq vunz, ranz singq Leix daj Huzbwz senj daeuj, ranz singq Vuengz daj Hoznanz senj daeuj. Gij ranzgaeuq ndaw mbanj seizneix dwg gij ranzlauxgaeuq、coengceiz ranz singq Leix, caiq gya 20 lai aen ranzgaeuq wnq gyoebbaenz. Gij ranzgaeuq ranz singq Leix youz roek aen ranz hongh bingzbaiz gyoeb- baenz, iqhung doxdoengz, sang hix doengzbingz, naengh sae yiengq doeng, namzbaek gvangq 600 mij, doengsae laeg 750 mij, ciemq dieg miz 5 fanh bingzfuengmij, mienhcik ranzcaep 30 fanh bingzfuengmij baenzneix. Aen honghlaux ranz Leix neix ndaej hawj bak lai vunz youq, youz haj aen ranzhung caeuq gyanghongh ciengzgvaengh nem laeuzdoulaux hopgvaengz baenz benq. Cungqgyang laeuzdoulaux caeuq aending, miz diuz roen benjrin ndeu doxdoeng, gwnz benjrin miz song coij doz gaekdeu, baihswix ndit cik ranghbya, baihgvaz rongh ronghndwen ciuq doenghnaz. Ndaw ding gvangqyub sangvid, faqciengz song mbiengj cienheu hoi hoz, byaiyiemhranz ngaeugoz bongh hwnj, gyaeujmax doxdaeb gvaq dingj- sanranz. Ranzlaux miz gonqlaeng sam gan, cungqgyang miz diencingj caeuq luengqroq doxlienz, dwg Yungjfuz Yen benq ranzgeq louzce ndaej ceiq ndei ndeu. Ndaw naz baihnamz aen mbanj louz miz aen coengceiz Ciuhcingh hwnjguh haenx, gungh miz sam gan ranz bingzbaiz doxlienz, caih rumz bongj fwn duh, daengjdwt soengzyouq.

Ranz singq Leix daj Ciuhcingh nienzgan Genzlungz (bi 1768) Lij Su’gyauz gaujhwnj gijyinz le, daengz bi 1902 Lij Cwnghvaz doxdauq, mboujduenh miz vunz gaujhwnj, miz 14 vunz gaujhwnj gijyinz, 5 vunz gaujhwnj gungswngh, Lij Gizsou daeglwg roek Lij Cihyenz neix daengx ranz vunz miz haj vunz gaujhwnj gijyinz, “ranz ndeu sam (boux) cinsw, bohlwg haj (vunz) gaujhwnj” cix daihdaih riuzmingz. Lij Cihyenz dwg boux canghvehveh byaraemx, dwg boux saefouhcoj vehveh ranz Leix, gij veh de cangqcoek nanwt, gag miz daegsaek. Daih cienz daih roengzdaeuj, gij sawveh ranz Leix, youq Ciuhcingh ndawgvaengz vehveh Guengjsae ciemq miz aen diegvih youqgaenj ndeu. Souh bancoj yingjyangj, daengz seizneix ndaw mbanj vehveh lij gig hwnghoengh.