“Bouxbing doiqvuj Liu Yinjbangh, bang- coengh hoihfwen caen daihfueng，Majbingz bingz baenz mbanj Fwencuengh, goenglauz Yinjbangh mbouj ndaej lumz.” Youq aen mbanj ndaej bingz baenz “Mbanj Fwencuengh Guengjsae” Sieng- couh Yen Majbingz Cin haenx，moix baez miz vunz daez hwnj bouxbing doiqvuj Liu Yinjbangh，couh haengj yungh hot fwen baihgwnz ciengq haenh de. Aenvih haengj eu Fwencuengh，caiq cienzsim cienzeiq swnjcienz feihvuzciz vwnzva yizcanj Fwencuengh，Liu Yinjbangh ndaej bingz baenz Fwencuengh yenzgiuhvei veicangj Maj- bingz Cin， caiq ndaej souh’iu camgya aen hoih hung Laizbinh Vwnzlenz Daibyauj，aeundaej aen cwnghauh ndei“Fwenvuengz Guengjsae”. De doiq gij vwnzva Fwencuengh gig yiedsim，ciensim guh boux swnjcienz Fwencuengh ndeu, gonqlaeng ndaej Guengjsae Densidaiz、Laizbinh Densidaiz daengj sinhvwnz danhvei caijfangj baudauj lai baez.

Liu Yinjbangh 1957 nienz seng, de daj iq couh souh vwnzva Fwencuengh yingjyangj，1979 nienz daengz 1983 nienz 11 nyied，Liu Yinjbangh souh guekgya haucau，haeuj ginhdui guh bing，bienqbaenz boux bing benhfangz budui ndeu. Aenvih de youq ndaw budui gaenx hag buek lienh，gvaq mbouj nanz, de couh ndaej dang daengz banhcangj lo，vanzlij camgya le ciengzciengq swvei fanjgiz. Doiqvuj dauqma mbanjranz le，de guh lauxsae daiqgoq gvaq，gvaqlaeng caiq guh seng’eiq. De dawz gij cingsaenz gaenx guh、buek guh、mbeihung youq ndaw budui lienh baenz haenx，yungh daengz guh seng’eiq ndawde， doenggvaq sawqlienh nem yunghsim roengzrengz guh sengeiq，de ginghyingz baenz aen diemqgwnngaiz cawj nohyiengz ndeu，cauh’ok aen binjbaiz Majbingz“Nohyiengz Raemxsaw”, gonqlaeng youq haj aen yienh henzgyawj hai guh le faendiemq, caiq roengzngaenz haiguh diemqgwnngaiz、hawciengz nungzmou daengj lai cungj hangznieb. Mbouj- lwnh de guh gijmaz hangznieb， guh gijmaz hong，de cungj genhciz eu Fwencuengh，caenh swhgeij naengzlig coicaenh hwngfat vwnzva Fwencuengh.

Liu Yinjbangh dwg boux youq Mbanjcuengh doekseng、 youq Mbanjcuengh majhung ndeu，de daj iq couh haengj yungh Vahcuengh daeuj eu fwen. Youq ndaw Majbingz Cin，yungh Vahcuengh eu fwen miz lizsij haj bak lai bi lo，Fwencuengh dwg cungj fwen caeuq fwen diegwnq mbouj doengz he，de yaemlwd ndeidingq，yaemsaek naeknwd, doengsug genjdanh, caenciet gamjdoengh，dwg cungj vwnzva daegbied Mbanjcuengh Guengjsae ndeu. 1986 nienz，Guengjsae Bouxcuengh Swcigih vwnzva bumwnz haivat Fwencuengh gij vwnzva daegbied neix，hix souloeg haeuj yenci bae，2008 nienz caiq ndaej senj haeuj swcigih feihvuzciz vwnzva yizcanj baujhoh mingzloeg. Liu Yinjbangh daj iq couh eu fwen，ndigah de cibfaen yawjnaek baujhoh Fwencuengh gij vwnzva daegbied neix，caemhcaiq yawjnaek swnjcienz nem hwngfat aen vwnzva yizcanj neix.

2006 nienz，Liu Yinjbangh vih daeglwg de gawjbanh vaenlaex seiz，de cienmonz ciuq gij fungsug gietvaen Bouxcuengh haenx gawjhengz vaenlaex, yungh civaiz bae ciep bawxmoq，eu Fwencuengh ciepcaen soengqcaen，cingj cangh- fwen daeuj daengz yienhciengz eu fwen Laengzdou、fwen raixcaz、fwen gingqlaeuj，vaenlaex yienhciengz dauqcawq miz sing fwen，nauhyied raixcaix. Gij guhfap Liu Yinjbangh maij Fwencuengh、gaenxmaenx swnjcienz Fwencuengh，ciuyinx le Guengjsae Densidaiz nem Gveicungh Densidaiz caijfangj baudauj、caemhcaiq miz haujlai sezyingjgyah daeuj ingjsiengq， caiq guh baenz le aen ciendaezben ndeu.

Liu Yinjbangh guh seng’eiq fatcaiz baenz- fouq le，engqgya yawjnaek hwngfat vwnzva Fwencuengh. Vihle hawj feihvuzciz vwnzva yizcanj——Fwencuengh ndaej swnjcienz nem hwngfat, moix bi de dawz ok it daengz song fanh maenz ngaenz，gawjbanh hoihfwen Fwencuengh，miz seiz gij ngaenz banh hoihfwen mbouj gaeuq le， de couh cimh gyoengqvunz fouqmiz he ok ngaenz bangcoengh guh，moix bi cungj comz ndaej haj fanh lai maenz haiguh hoihfwen Fwencuengh doxdax. Linghvaih，moix bi cietheiq cienzdoengj Bouxcuengh —— sam nyied sam、bat nyied cibngux、ciet gouj nyied gouj cungzyiengz、ndwencieng seiz, de cungj cujciz haiguh hoihfwen Fwencuengh. Moix baez gawjbanh aen hozdung neix，de cungj caenndang senj ciengzdieg，ndacang hoihciengz, couzcomz ngaenzcienz，fat dunghcih, cimh bingzveij，hix swhgeij ok it fanh maenz cawx yaemyiengj、ingjsiengq、guhbaenz gvanghdez fat hawj doenghboux haengj Fwencuengh haenx. Cibgeij bi daeuj，de doiq swnjcienz nem hwngfat vwnzva Fwencuengh guh le haujlai saeh ok le haujlai rengz.

Aenvih bouxbing doiqvuj Liu Yinjbangh cienzsim cienzeiq guh saeh swnjcienz nem hwngfat vwnzva Fwencuengh，2013 nienz Majbingz Cin ndaej swcigih hawj aen cwnghauh ndei“Mbanj Fwencuengh”，Majbingz Cin caemh ok le sam boux fwenvuengz Guengjsae，boux vunz swnjcienz Fwencuengh ndeu，canghfwen caemh daj gaxgonq samcib geij vunz demlai daengz seizneix miz sam bak lai boux lo. Aenvih gij cingzgvang yienghneix，Majbingz Cin laebbaenz le aen Fwencuengh Yenzgiujvei ndeu, Liu Yinjbangh ndaej senj dang veicangj，cauhlaeb le aen gihdi swnjcienz Fwencuengh ndeu. De doenggvaq hwngvuengh vwnzva Fwencuengh，gij ginghci Majbingz Cin ndaej hwngfat, cauh ok le gij vanzging yinzvwnz gyaeundei，caiq deng Yinzminz Yizbau baudauj seiz haenh baenz boux doiq coicaenh hong swnjcienz nem hwngfat vwnzva Fwencuengh miz goenglauz hungmbwk ndeu.