Daegsaez:

Gangj lai mbouj miz yungh,

Vunz ndawdoengh mieng raeuz,

Lwg geiq meh aencingz,

Gwnz yiengz mbouj doxnyinh,

Laj yaem gou raen mwngz,

Caiq denz meh aencingz,

Meh neix vaiq bae haq,

Daj neix bienq vunzseng,

Mbouj hawj ndaq baenz lai,

Raemx myaiz dumh vunz dai,

Lwg gou lij noix lai,

Mbouj siengj hawj mieng dai,

Hoh meh ndaej vuenyungz,

Daj goek ndei daengz gyaeuj,

Gaej lumj faex go’ndoek ,

Baez daengz byai couh gungj.

Liuzsaez:

Yahmaiq baez bae haq,

Lumj Hangyij gvaq dah,

Cek ruz cungj baenz bah,

Dad rek youh dad dawh,

Mbouj hawj ce dauqma,

Lohlaeng cienzbouh canj,

Nyaen heuh mbouj nyeux gyaeuj,

Caen dwg siengsim lai,

Gyaez lwg gyaez yaek dai,

Sinhoj buenq ciuh vunz,

Laihnaeuz lai yiengjfuk,

Dauqfanj gyaep okdou,

Ngoenzneix gou bae haq,

Danghnaeuz de mbouj gyaez,

Gou gvaq mbouj ndaej ndei,

De dai beij ma cienh.

Vunz gvaq loh gyap:

Sam nyied daeuj daengz naj,

Yahmaiq ndauq gvaq vaiz,

Mbouj miz boux lauxsai,

De caeux fatvangh dai.

Vunz gvaq loh iet:

Cib nyied daeuj daengz hwnz,

Goengmaiq geng baenz fwnz,

Mbouj miz boux yahmaiq,

Caeux couh giet ak dai.

Roegga gwnzmbwn:

Dekdek caca youh gvaq bi,

Ranz laeuz mbouj youq youq ranzhaz,

Daihloh mbouj byaij byaij haenznaz,

Miz ngoenz mwngz couh dai ndaw

nywj.

Liuzsaez:

Mingh caeuq mbwn doxhaek,

Duzdaek hix hangz gou,

Raemxda mbouj miz yungh,

Vaiq bae seiqgyaiq wnq.

4. Ranz Goenglungz

Daeglungz:

Raen gangj naeuz Liuzsaez,

Guh mehlaeng hawj raeuz,

Daxboh caen dwg ndauq,

60 guh gvanmoq,

Cij lau ndang daiq mbang,

Daj sang doek roengz max,

Beg boiz fouq guencaiz,

Ceijhaiz coemh yieng moq.

Yahlungz:

Aen neix dauj mbouj gangj,

Vunz gangj yah Liuzsaez,

Bouxvunz couhdwg ma,

Haq boux sienseng gonq,

Ndaq gvan ndang haeu maeg,

Caiq haq boux swnghcanj,

Youh laih gvan haeu hanh,

Gai ma daeuj cawx ma,

Baedaeuj cungj dwg ma,

Siengj aeu ma vuenh vaiz,

Naemj daengz fat daraiz,

Gwn ngaiz aeu vanjlungz,

Guh hong couh soengzndwn,

Nip byaek gwn haujlai,

Yaengx gvak couh menh nek,

Haq gvaq 16 gvan,

Gvangvan gyaep de deuz,

Lumjbaenz boux lauxgawj,

Vuenh gvan dangq gwn bouj,

Ngoenzneix haq ranz raeuz,

Mwngz aeu doengh ukgyaeuj,

Naemj fap hawj de deuz.

（caengz sat）