Youq lajmbanj, mbanjmbanj cungj raen miz doenghboux gyaeu ndaej bet goujcib bi haenx. Gyoengqde lanlaenj baenz gyoengq, youq ranz yiengjfuk, vuenyungz gvaq bigeq.

Ngoenznaengz, doenghboux goeng laux yah geq neix cungj miz vunzranz buenx de, mbouj dwg lwgsai lwgmbwk couhdwg lanmbauq lansau, bang de aeu ngaiz aeu raemx, daengh de gangjgoj guhcaemz, byaij ok rog bae cetyouz.

Geij bi neix dou ciengzseiz deng roengz Mbanjgorenh bae guhhong, baezbaez roengzbae cungj roeb boux daxau ndeu gaex aen eijloek ndeu, naihlaux geq ndeu naengh youq gwnz eijloek, nanz mbouj nanz lij raen daxau haenx gaemz gyaeuj roengzbae gyawj naihlaux haenx, youq gokrwz de gangjsebseb, gwnz naj naihlaux gaenq cib nyaeuq bet nyaeuq, seiz mbouj seiz cix loh ok riunyumj. Naihlaux neix couhdwg bouxlaux ceiq geq Mbanjgorenh, de gaenq gyaeu ndaej bak bi lo, coh heuhguh Veiz Yicangz, boux daxau gaex eijloek haenx couhdwg daeglwg byai de Banh Gicaiz, dwg boux lauxsae duiyouh ndeu.

Naihlaux neix miz 3 daeglwg, linghvaih 2 boux dwg guhnaz, hong nyaengq lailai, mbouj miz geijlai seizgan buenx mehlaux, gijneix Banh Gicaiz cungj rox, cungj yawj ndaej hai. Naihlaux nyuenz gag youq fungh ranz gaeuq ndeu, vih liux haethaemh ndaej engq ndei bae hauqswnh caeuq ciuqgoq bouxgeq, Banh Gicaiz hixnaengz ciep naihlaux daeuj aen ranzmoq de caez youq. Miz vunz cam, de dap naeuz:“2 boux daeggo bi daengz byai hong cungj nyaengqnyi’nyi, ngoenznaengz cawz le soengq ndaej saek di haeux caeuq byaek gvaqdaeuj le, couh mbouj miz maz seizgan daeuj buenx mehlaux lo. Mehlaux nienzgeij geq lo, cix mbouj ndaej hawj de gudan gag youq ha, couh hawj de nem gou guhdoih youq. Fanjcingq gou gaenq duiyouh lo, mbouj miz maz hong guh, couh lai buenx mehlaux saek di ba. ”

Banh Gicaiz gag lwnh naeuz, de ngoenzngoenz cungj dwg fifi fwdfwd guhgak gij hongranz bonjfaenh le, couh bae henz ndang naihlaux buenx de. Daek ngaiz caem caz hawj de, daek raemx hawj de swiq naj, bang de rieg buhvaq uq, lij gingciengz bang de fou gyaeuj、roi byoem、raed ribfwngz、roq baihlaeng、naenx ga. Dingzlai seizgan dwg buenx de gangjgoj、ngonz densi. Mwh ngonz densi, aenvih naihlaux dingq mbouj roxyiuj Vahgun, Banh Gicaiz lij ciengzseiz bak nam- byoegbyoeg gejgangj hawj naihlaux nyi. Cawj ngaiz cawj byaek gaxgonq, Banh Gicaiz cungj dwg cam naihlaux gonq, cam de siengj gwn gijmaz, ciepdwk couh ciuq naihlaux gangj bae cawj, cinjseiz cawj ndaej byaek feih ngaiz hom dawz daeuj daengz dangqnaj naihlaux, caenhliengh hawj nauhlaux sim’angq、 rimhoz. Ban Gicaiz couhdwg yienghneix baenz le bouxhoiq cienmonz fugsaeh naihlaux ndeu.

Ranz Banh Gicaiz liz Hawnaz- heuj ngamq miz saek goengleix gyae, mwh mbwn ndei mbouj hwngq mbouj nit, Banh Gicaiz haengj yungh eijloek gaex naihlaux youq ndaw mbanj cet saek geij gien, roxnaeuz bae gwnzhaw cet yaep ndeu, bae doenghnaz henz mbanj mupmup gij hoengheiq singjsien. Moix daengz mwhde, naih- laux cungj haengjheiq raixcaix.

Roengzmbanj dauqma le, gou gag guh liux 2 hot fwen, raiz ndei le baij youq najdaiz gou, mbouj rox baij geilai nanz lo, gou cungj mbouj sij ndaej beuj deuz. Hot fwen haenx dwg yienghneix：

Vunzmbanj lumj go’ndoek,

Laj goek maj rim rangz；

Miz bouxlaux henz ndang,

Lwglan angq bae hauq.

Miz laux cij miz coz,

Ndawhoz aeu geiq maenh,

Loekrumz riengz rumz baenq,

Bouxboux haenh naeuz ndei.