Doenghbaez, youq aen mbanj he miz boux vunz he heuhguh Mijciz, ranz de mbouj miz maz ngaenz. De daengz 40 geij bi ngamq aeu ndaej bawx.

Yah de gig gik, baenzngoenz cij rox gwn caeuq youz ndwi, gaiq wnq gijmaz saeh cungj mbouj guh. Ndigah hongranz cungj dwg Mijciz bae guh. Mijciz moix ngoenz caeuxcaeux couh aeu hwnq, cawj doxgaiq gwn, daengz yah de hwnqdaeuj, gwnz daiz gaenq baij hwnj haeux caeuq byaek lo. Danghnaeuz saek ngoenz mbouj miz huq ndei gwn, couh sikhaek ndaq Mijciz lumj duzma duzmou nei.

Moix baez Mijciz coenz vah ndeu hix mbouj gangj, laeglemx okbae, coh ndaw ndoeng byaij bae. Mbouj gvaq geij nanz, de couh daj ndaw ndoeng gwed dauq haujlai nohnyaen, lumj- baenz nohroegraeu、nohngwz、noh- duzlinh daengjdaengj. Caezgya cungj roxnyinh geizheih dangqmaz, dauq- daej Mijciz daj gyawz gaemh ndaej baenzneix lai nohnyaen dauq ne? Miz vunz bae cam, de cijdwg riu mbouj gangj maz, nanz liux caezgya cungj rox cam de hix cam mbouj ok maz, couh mbouj cam lo.

Gaxgonq Mijciz baez gwed nohnyaen dauq ranz, yah de angqvauvau. Hoeng, gvaq mbouj ndaej geij nanz, de gwnz nywnx nohnyaen youh hainduj ndaq Mijciz naeuh, mbouj ndaej hawj de gwn ndei daenj ndei. Mijciz hix mbouj ok sing, youh laeglemx byaij ok rog bae. Daengz gyanghaemh de gawqyienz youh dawz dauq haujlai nohnyaen caemh- caiq lij miz geij geu buh lengj dem, yah de riu ndaej aenbak cungj haep mbouj hwnj. Nanz liux yah de couh ngeiz Mijciz baenzlawz ra ndaej baenzlai doxgaiq dauq. De cam Mijciz geij baez, hoeng Mijciz cungj mbouj gangj, baenzneix de couh menhmenh haeujsim Mijciz bae gyawz lo.

Youq haemh doek fwn he, Mijciz dauq ranz haemq haemh, dawz dauq haujlai nohmou、nohcwz. Seizhaenx yah de gaenq iek ndaej dingj mbouj ndaej lo, coi Mijciz vaiq di cawj noh hawj de gwn. Hoeng, cingqngamj seizneix ndaw ranz mbouj miz saek geu fwnz, yah de couh ndaq de. Mijciz naeuz:“Mbouj yungh gip, gou miz banhfap daeuj cawj doxgaiq. Hoeng, cijdwg mwngz aeu ok rog yaep ndeu, caj gou guh baenz heuh mwngz dauq daeuj mwngz caiq dauq, gou mbouj heuh couh mbouj ndaej haeuj ranz, engqgya mbouj ndaej haeuj bakcauq.” Yah de dingq Mijciz baenzneix gangj, buenq saenq buenq ngeiz hoeng vanzlij byaij ok rog bae. Yah de baez byaij ok, Mijciz couh gaenjgip gven bakdou ranz hwnjdaeuj, haeuj bakcauq, caiq gven dou bakcauq hwnjdaeuj.

Yah de gig geizheih, de byaij ok daeuj liux yied siengj yied roxnyinh gienh saeh neix mbouj deng. Youq baihrog ranz cienq gien ndeu, couh laeglemx haeuj ndaw ranz bae. Ndaw ranz mbouj diemj daeng, laepsaeng- saeng, hoeng nyouq ndaej feih noh hom. Ndaw bakcauq miz geu rongh yienh ok, de siengj yawj baihndaw miz maz saeh couh hai dou bakcauq, coh ndaw byaij bae. Baez haeuj ndaw, de couh swenj hwnjdaeuj lo.

Yenzlaiz de yawjraen ciengzgingj hawj de gig lau, Mijciz cingq guh mo, aeu fwngz bonjfaenh guh fwnz, cuengq haeuj ndaw cauq, feiz coemh fwngz de hwnjfwdfwd. Sing swenj de ging- doengh liux Mijciz, Mijciz siengj ndaep feiz bae, hoeng feiz gaenq mbouj dingq de mo lo, laebdaeb youq gwnz fwngz de coemh, lij coemh daengz gwnz ndang de bae. Mbouj geij nanz Mijciz couh bienqbaenz gyoengz feiz he lo. De doq cak doq cwnj, ndaq yah de baenzlawz mbouj dingq de gangj, de guh mo daengz dingz couh dauq. Yah de deng ciengzgingj neix hwk daengz lo, gvaq yaep ndeu cij fanjying doxdauq, de hwnjbae siengj bang Mijciz ndaep feiz, hoeng gij feiz mbouj rox vihmaz cungj dwg ndaep mbouj bae, doeklaeng Mijciz couh deng coemh dai lo.

Itcig daengz haemhhaenx, gyoengqvunz cij rox Mijciz vihmaz cungj ndaej dawz haujlai doxgaiq dauq ranz, yenzlaiz de rox guh mo, sojmiz doxgaiq cungj dwg de guh mo bienqbaenz, gangjdaengz de bae gyawz hag ndaej guh mo couh mbouj miz vunz rox lo.