Youq Sinhdwz Cunh Mungzhih Cin Gveibingz Si gih raeuz, miz gizdieg ndeu caemdingh, singjsat, cwxcaih lumj seizcin nei, gizhaenx couhdwg Mbanjsingzgeq ndaej vunz- raeuz haenh dwg gizdieg biengzsien neix.

Sinhdwz Cunh dieg youq baihsae Gveibingz Si, liz gyanghaw Gveibingz 15 goengleix gyae, ing bya dep raemx, gofaex heuswd mwncup, roeg heuh va hom, baenz bi raemx lae mbouj gat. Mbanjsingzgeq dwg aen mbanj swhyienz ndaw Sinhdwz Cunh ceiq hung ndeu, daengx mbanj mienhcik 8 bingzfueng goengleix, 2000 lai gyaeujvunz. Ciuq 《Yenci Gveibingz》 geiq naeuz, Mbanjsingzgeq youq seiz Ciuhnanzsung couh hainduj miz vunz youq lo, youq rangh dieg Mbanj- singzgeq lij vat ok cungdoengz、aennyenz doenghgij vwnzvuz neix gvaq.

Mbanjsingzgeq miz diuz dah- hensingz roek caet mij gvangq ndeu hopngomx gvaengz ndeu, doeng sae namz baek gak hai miz aen bakdou hung ndeu, rog bakdou hung miz giuzdiuq hawj vunzmbanj haeujok, riengzdwk bi’ndwen bienqboek, seizneix dahhensingz gaenq deng boengznaez saekdimz rimmwd.

Byaij haeuj Mbanjsingzgeq, caenh raen gij ranz gaeuqgeq swnh diuz roen iq daengj baiz youq song henz, gwnz ciengz sangvid haenx veh miz roeggungjcoz、funghvuengz、roeg- gacak、duzsaeceij、duzgeizlaenz doenghgij vehdat ndeiyawj caiqlij gak cungj gak yiengh haenx, gwnz faqdou lij sieng miz vengq vadeu, yiemh- ranz ngaeungat gwnz dingjranz gaek- veh baenz gak cungj gak yiengh. Youq ndaw ding aen ranzgaeuq ndeu, cawjranz baij le buenz geizciengh ndeu, baihhenz cuengq song aen daengqgeg, henzde miz aen cingj ndeu raemx sawndikndik, couh deq baengzyoux daeuj le cimq guenq caz ndei ndeu, caez dwkgeiz beij ukvaenq, cwxcaih soengse!

Gij ranzcaep ndaw Mbanjsingz- geq, aen ceiq gaeuq de ndaej cimh daengz Ciuhcingh nienzgan Genz- lungz bae, gaeuq laux lo. Gij vadeu sieng gwnz doufaex haenx gyaqciq ndeiyawj; gij vehdat gwnz ciengz, yienznaeuz gvaqbae haujlai bi, cawz mbangj caengzbae loenqdoek le, gij saek vehdat lij yienhsag lumj moq, gij deugaek gwnz liengz caemh lumj gij caen nei, gyaeundei raixcaix. Gij yiengh gaeuqgeq、gingjsaek swhyienz gyaeundei aen- mbanj, yinx haujlai hek bae ndaw mbanj youzcet. 1998 nienz, gyoengqvunz goepingj denyingj 《Daibingz Denhgoz》couh bae ndaw mbanj goepingj aeu gingj ndei gvaq.

Vunz Mbanjsingzgeq simsoh gaenxhong, moix bi ndwencieng roxnaeuz gvaq ciet hung, ndaw mbanj cungj guh dwk lamzgiuz doxdax、yienjheiq daegbied dwg heiqmoegyou hozdung, doengzseiz hoengh banh hoihmiuh, vunzlai mbanj henzgyawj cungj doxcomz youq ndaw miuh, caez caeqbaiq goengbaed goengcoj mbaenj ndaw bi fwn yinz rumz swnh.

Seizneix, Sinhdwz Cunh cingq comz ngaenz hwnjguh hanghmoeg lijyouz lajmbanj, yaek baengh gij gingjsaek gyaeundei caeuq gij daej cwkcomz vwnzva lizsij haenx, cauxguh aen dieg ndei cwxcaih lijyouz lajmbanj gag miz daegsaek bonjfaenh ndeu, hawj vunzlai demlai souhaeuj saedceij vuenyungz.