Daxboh gou miz bonj ceksiengq seiziq,

Baihndaw cang miz mbawsiengq seiziq de,

Haha, gij siengq caen ndeiriu,

Siengj mbouj daengz daxboh gou hix gaenq

baenzneix iu gvaq.

Mwngz yawj de gwih maxfaex,

Vangyenjging venj youq naj aek,

Fag cungqdinj iq he venj youq laeng hwet,

Yienghceij gig cingsaenz, caen lumj boux cienggun

he nei.

Ceiq vadgei couhdwg mbaw siengq neix lo,

Daxboh gou daenj buhraez, ngauz beiz iq ndeu,

Cingq hawj doengzhag de biujyienj siengswngh,

Mbaw siengq haenx engqgya hawj vunz angq,

Daxboh gou youq gwnz haijdan cawj byaek hawj

caezgya,

Gwnz naj uqnga’nga,

Bakgenbuh lij deng coemh ok aen congh hung daeuj

dem.

A, gou caen haenh daxboh gou,

De miz aen seiziq gig angq,

Lij miz bonj ceksiengq neix dem,

Ciengxlwenx buenx de.

Gou engqgya maqmuengh daxboh gou,

Dauq hawj gou aen seiziq angq ,

Hawj gou ndaej daj ndaw byasaw byaij okbae,

Bae raenraen seizcin rog cueng.

Hoeng neix hix cij ndaej siengj ndwi.

Seizneix gou hix miz lwg lo,

Gou rox ciengz daiq de ok rog bae guhcaemz,

Ingj geij mbaw siengq saek,

Doeklaeng cuengq haeuj bonj ceksiengq seiziq bae,

Caj de majhung le,

Hawj seizgan seiziq hix ndaej ce youq henzndang de.