Liuzsaez:

Yawj daengx mbanj dacaengz,

Lumj fagcax fagmid,

Bouxboux heiqgwngwn,

Couh lumj gwnz lwgyienz,

Gou cijdwg caiq haq,

Vihmaz sou ndaq gou,

Lwg gou lanz bakdou,

Bawx gou riuj doengjnyouh,

Lan gou daejngoungou,

Gou siuj maz hawj sou?

Daegsaez:

Gamz raemxda soengq meh,

Gouz meh gaej haeuj ranz,

Meh ngoenzneix bae haq,

Lwg hix bienq lwggyax,

Louz aen naj hawj lwg,

Ndei lwg guh ndaej gwn,

Lwg lij aeu goq lan,

Donqdonq siengj bingzciengz.

Mwngz naeuz dwg Mehsaez,

Couh gaej haih Daegsaez.

Liuzsaez:

Gou ndang ndeu ndang dog,

Ngoenneix ndoj ndaw feiz,

Raemxda roengznyeinyei,

Mbouj haq geijlai ndei.

Lwg ha lwg,

Cien loek fanh loek daxmeh loek,

Ngoenzneix gyaeujhoq aeu uet mug,

Naengh daxhongh bae daej,

Gouz lwg caiq caemciek,

Gou caeuq Goenglungz biek,

Daj neix lumj vunzseng,

Ciuh neix mbouj lienzhaeh,

Mieng dai mbouj caiq haq,

Dauqma buenx lwglan,

Donqdonq buenx bawx gwn,

Mwngz naeuz ndaej mbouj ndaej?

Daegsaez:

Buet raemx ndang gwnz max,

Aeu engq dawz mbouj dauq,

Buzsien caeux couh naeuz,

Yahmaiq baez okhaq,

Raemx uq couh haeuj dangz,

Rangz oiq cienzbouh dai,

Hwet lungz cienzbouh raek,

Haek lwg youh haek lan,

Mbouj dwg mwngz mbouj rox,

Mwngz bwn gaeq byaeu feiz,

Haq bae gaej dauqma,

Dauqma raemxhaex buet.

Liuzsaez:

Lwg gou baenzneix gangj,

Caen dwg siengsim lai,

Gaxgonq lwg gou iq,

Gaj gaeq sien gwn ga,

Lwg gou ceiq lau ma,

7 bi aeu nda aemq,

Lwg gou rox dwkheiq,

Laj geh’eiq raninz,

Lwg gou gaenq 8 bi,

Fei doenghnaz gwn cij,

Lwg gou baez fatremj,

Gou couh gemj 10 gaen,

Lwg gou baez ok roet,

Gou couh muengz buenq haet,

Lwg gou siengj gwn daek,

Gou couh buet ga raek,

Lwg gou siengj gwn meiq,

Gou couh buet duenhheiq,

Ngeix bae youh ngeix dauq,

Couh sauq meh ok dou,

Dwg meh mbouj roxsoq,

Neix coh lwg nyinhloek,

Hawj daxmeh dauqma,

Laeb aen ranz hwnjdaeuj.

Daegsaez:

Mbouj dwg lwg mbouj hawj,

Gwnz mbanj vunz biq myaiz,

Myaiz dumh daengz bakdou,

Mbonq fouz 3 cik sang,

Gou gwnvi mbouj gangj,

Lan doegsaw deng hangz,

Naeuz de lan duzma,

Mbouj hawj de guhcaemz.

Liuzsaez:

Ngoenlwenz gou bae haq,

Ginggvaq yaenq cwngfuj ,

Habfap youh habcingz,

Baenzlawz famh diendeih,

Dujva muengh duzrwi,

Saeceij hix dox riz,

Gorum muengh diemjraiz,

Duzvaiz rox aeufaen,

Vihmaz dog gou vei,

Yahmaiq mbouj dwg vunz,

Go’ngox mbouj dwg fwnz,

Oknyouh deng mbongdinz,

Gou ienq mbwn ienq namh,

Iet ga biek lwglan.（caengz sat）