Mbouj aeu hawj gij saetbaih ngoenzlwenz hawj maqmuengh daengz- cog doiqsaek!

Baez hoihdaujlun, boux yenjgangjgya gig mizmingh he hainduj mbouj gangj vah lawz, cij raen ndaw fwngz de dawz mbaw 20 maenz ngaenz he.

Doiqnaj de miz 200 lai vunz, de cam gyoengqde:“Byawz siengj aeu mbaw ngaenz neix?” Gaiq fwngz menhmenh yaengx hwnjdaeuj. De youh gangj:“Gou yaek hawj boux vunz ndaw sou he mbaw ngaenz neix, hoeng, gaxgonq hawj gou guh gienh saeh ndeu gonq.” De gangj liux couh nyup mbaw ngaenz neix baenz nyouj he bae, youh cam:“Byawz lij siengj aeu?” Lij miz vunz yaengx fwngz hwnjdaeuj. De youh cam:“Danghnaeuz gou baenzneix guh ne?” De vit mbaw ngaenz neix daengz gwnz namh, caij hwnjbae geij baez. Doeklaeng de gip hwnj mbaw ngaenz neix, mbaw ngaenz neix gaenq youh nyaeuq youh uq. “Seizneix byawz lij siengj aeu?” Lij miz vunz yaengx fwngz.

“Baengzyoux, sou gaenq hwnj liux dangz goq gig miz yiyi. Mboujguenj gou baenzlawz doiq mbaw ngaenz neix, sou cungj dwg siengj aeu de, aenvih gij gyaciz de mbouj caengz bienq noix, de vanzlij dwg 20 maenz ngaenz. Gwnz roen ciuhvunz, raeuz cungj rox bungz daengz daemdengj fouzsoq, aiq saetbaih、deng hangz roxnaeuz dengsieng, seizhaenx raeuz cungj roxnyinh swhgeij mbouj dij saek faen ngaenz. Hoeng, mboujlwnh fatseng maz saehcingz, youq ndaw da mehmbwn, raeuz ciengxlwenx mbouj rox saetbae gij gyaciz bonjfaenh, mboujguenj uq roxnaeuz cingh. Ndigah, mbouj aeu saetbae saenqsim, roengzrengz bae saedyienh gij gyaciz swhgeij ba!”