Gaxgonq, miz boux lwggyax Bouxcuengh ndeu, ndaw ranz gungzhoj dangqmaz. De yienznaeuz vunz hoj- ndoq hoeng gig miz ceiqheiq. De cawzliux dajndaem, lij ngoenznaengz laep ok laep haeuj, raemj fwnz bae gai, ndaej cienz bae cawx gyu、youz caeuq cawx baengz daeuj guh buh daenj. De coengmingz lingzleih, naemj vwndiz cungj beij vunz vaiq. De haengj bangcoh vunz, ranz lawz miz gunnanz, de cungj caenhrengz bae bang. Vunzlai cungj doiq de haenhsubsub.

Miz dahsau ranz caizcawj he gig gyaez de, siengj caeuq de guh gvanbaz. Lwggyax hix aenvih de simsienh caemhcaiq youh nienzoiq gyaeundei, ndawsim hawj dajdoengh, nyienh caeuq de baenzranz.

Ngoenz he, lwggyax ra daengz dahsau doxyaeng gij vwndiz doxaeu. Lwggyax naeuz:“Song raeuz cungj nyienh guh gvanbaz, hoeng gienh saeh neix daxboh daxmeh mwngz lij mboujcaengz rox, mwngz baema le, caeuq gyoengqde gangjgangj, ceng- aeu gyoengqde doengzeiq. Gyoengqde doengzeiq le, raeuz couh ndaej banh laeuj lo. Mboujnex, raeuz couh bungz deng gunnanz haemq hung, youq itheij hix ndaej mbouj daengz vunzcaen hohfuk.”

Dahsau han naeuz: “Mwngz gangj ndaej deng. Gou itdingh hawj daxboh daxmeh gou rox, ceng’aeu gyoengqde doengzeiq raeuz doxaeu, vuenheij dwk bang raeuz banh laeuj. Hoeng, daxboh daxmeh gou swhsiengj fungh- gen dangqmaz, muengh gou ra ndaej boux ranz caeuq ranz gou ca mbouj lai, gyoengqde aiq mbouj doengzeiq. Danghnaeuz gyoengqde mbouj doengzeiq raeuz doxaeu, raeuz gaej heiq, itdingh aeu guh baenz gvanbaz.”

Haemhhaenx, dahsau lwnh gij saeh hawj bohmeh de dingq. De naeuz:“Gou caeuq lwggyax ginggvaq duenh seizgan nanz ndeu guhyoux, cingzeiq habngamj, cingj sou doengzeiq dou doxaeu.”

Daxboh daxmeh de dingq le, mboujdanh mbouj doengzeiq, lij ndaq de donq ndeu. Gyoengqde naeuz:“Mwngz dwg ciengim siujcej aen ranz caizcawj, haq hawj boux vunz hojndoq ndeu, mbouj dwg hawj vunz lajbiengz riu ma?”

Dahsau gejnaeuz: “Lwggyax vunz gungz hoeng de miz ceiqheiq. De gaenx guh、mbeilaux、coengmingz lingzleih、vunz ndei, lij laux ra mbouj ndaej gijgwn? Lij lau gou caeuq de gvaq mbouj ndei?”

Hoeng mboujlwnh dahsau baenz- lawz gejnaeuz, bohmeh de nyengh mbouj doengzeiq. Daxboh daxmeh de yousim de caeuq daegyoux caez buet deuz, couh suj de youq ndaw rug iq ndeu.

Dahsau deng suj youq ndaw ranz, baenzngoenz daej, mbouj gwn ngaiz, mbouj gwn raemx, mizseiz daej dwk ngunh bae. Gvaq song sam ngoenz le, lwgda de mboep roengzbae haujlai.

Gyoengq beixnuengx rox le, cungj daeuj yawj de, gig doengzcingz de, bouxboux bae gienq daxboh daxmeh de, naeuz gij saeh dahlwg couh hawj de gag gietdingh, hoeng cungj mbouj miz maz yungh.

Dahsau yaek caeuq boux vunz simgyaez doxaeu, hoeng deng bohmeh gyaeng. Gienh saeh neix hix ndaej daengz dahsien he doengzcingz. Dahsau deng gyaeng ngoenz daihsam seiz, dahsien neix couh naengh youq henz mbonq dahsau doiq de naeuz:“Mwngz siengj caeuq lwggyax doxaeu vunzlai cungj cihciz, maq- muengh neix doeklaeng sou itdingh ndaej saedyienh. Hoeng seizneix mwngz aeu haeujsim ndangdaej, aeu gwn ngaiz gwn raemx. Mboujnex, ndangdaej mwngz bienq nyieg, mbouj baenz lo, couh mbouj yungh bae siengj ngoenzlaeng lo. Aeu geiq- maenh: Ngoenzcog miz duz fungh ndeu daeuj gouq mwngz.”

Ngoenz daihngeih, aen rug dahsau youq sawqmwh lwenq myanz- myanz, ndongqgywggywg, duz fungh ndeu mbin daengz gyaeuj mbonq de, coh de ngaek gyaeuj. Dahsau lwgda baez rongh, gwih hwnj laeng duzfungh bae.

Duzfungh menhmenh mbin hwnj, mbin ok rog, itcig mbin daengz baihnaj ranz daegyoux de cij daengx roengzdaeuj, dahsau roengzdaeuj byaij haeuj ndaw rug bae.

Gvaq yaep ndeu, duzfungh mbouj raen lo, hoeng ce song aen gyaeq duzfungh roengzdaeuj. Dahsau siujsim sisi dwk gip hwnjdaeuj, aeu diuz sujbaq ndeu duk ndei, yo youq gwnz ndang.

Caizcawj daeuj daengz aen rug suj dahsau, mbouj raen dahsau, muengz baij vunz bae ra. De daiq sam boux vunzhoiq, daeuj daengz ranz lwggyax ra, caen raen dahlwg de youq gizhaenx dahraix. Hoeng, de daj dounaj haeujbae seiz, dahsau caeuq lwggyax gaenq daj doulaeng buet deuz lo. Caizcawj ganjgip riengz laeng gyaep hwnjbae.

Songde buekmingh buet, buet dwk hozhawq dangqmaz, hix mbouj gamj daengx roengzdaeuj gwn gaemz raemx ndeu. songde buet daengz henz Dahhoengz, gaenq dwg lohgungz, mbouj miz roen ndaej laebdaeb byaij roengzbae lo, cingzgvang yungyiemj raixcaix.

Dahsau youq seiz youqgaenj siengj ok aen banhfap he, de dawz ok song aen gyaeq duzfungh duk ndei, ce aen ndeu hawj swhgeij, ndenq aen he hawj lwggyax, naeuz:“Song boux raeuz daeuj bungq gyaeq ba!” Lwggyax naeuz: “Ndei!”

Doeklaeng, song boux naj doiq naj, dawz gyaeq doxbungq, geu ronghgim he migmyanzmyanz, song duz fungh daj ndaw gyaeq mbin okdaeuj, gyoengqde doq boux he gwih hwnj laeng duz fungh ndeu.

Duzfungh menhmenh mbin hwnj, mbin gvaq Dahhoengz. Caizcawj cij- ndei ndwn youq gizhaenx, dinghdingh dwk muengh yawj gyoengqde, mbouj miz saek di banhfap.

Duzfungh mbin daengz giz vunzlai mboujcaengz daengz gvaq cij daengx roengzdaeuj. Songde daeuj daengz dieg moq couh baenzranz lo, gvaq hwnj saedceij gig vuenyungz.

Songde buet deuz ngoenzhaenx, cingqngamj dwg liggaeuq sam nyied sam. Vihneix, vunz raeuz vihliux gyaepgouz swyouz guhyoux liux doxaeu gvaq ndaej vuenyungz, cungj youq liggaeuq sam nyied sam ngoenzhaenx, banh hwnj hozdung bungqgyaeq .