Menhmenh youq gwnzgai benj- rin hawgeq Dahih byaij, ndaej yawjraen gij bouqdiemq gaeuqgeq song henz gai lij louzce ndaej ndeindiq, dingzlai aeu faex benj doqdaep guhbaenz caemhcaiq gaenq bienqbaenz saek ndingndaem, loh ok gij yiengh gaeuqgeq siliengz geij bak bi cwkcomz haenx; gwnz ciengzsingz、aendiengz、luengqhongh miz gogaeu danghbin rimrwd heuswd, saek seiz lij dingqnyi gij dingding dangdang sing canghdiet dizdub huqdiet haenx daj goxgai laeglwd haenx cienz okdaeuj, caiq miz lengq aen bouqdajsan、bouqhaiznyangj、bouq- ywdoj nem bouqfeigyaeuj gaeuq sieng youq henz gai, hawj vunzraeuz mumjgyumq yawj ok gij hwnghoengh nauhyied gaxgonq de.

Hawgeq Dahih youq ndaw gyaiq Yienh Lingzconh, dep haenzdah baihdoeng Dahlizgyangh, liz gyanghaw Gveilinz 18 goengleix gyae. Dahih roenraemx roenhawq doengrat, engq dwg diegcomzsanq aenhaw gaicawx okmingz ndeu, baihdoeng miz diuzdah moq Cauz- denz, caeuq Dahmax Fuzli doxciep; baihsae swnj Dahsiengswh, doeng daengz Yungjfuz; baihbaek miz Dahlizgyangh conlae gvaq Gveilinz、Hingh’anh、 Yangzsoz、 Bingzloz、Vuzcouh, duenh gwnz doeng daengz Huznanz, duenh laj doeng daengz Gvangjcouh, youq seizgeiz Ciuh- bwzsung couh hwnghoengh hwnj- daeuj, ndawde suenq “hawhaeux Dahih” ceiq okmingz.

Hawgeq Dahih daj Ciuhbwzsung conienz hainduj hwnjguh, daengz Ciuhmingz Ciuhcingh hwnghoengh, seiz Minzgoz ceiq hoenghvuengh, daengz seizneix gaenq miz baenz cien bi lizsij, caeux youq 600 lai bi gaxgonq, Dahih couh baiz youq Guengjsae raeuz seiq aen hawhung (Hawluz Binhyangz、Hawyungz Canghvuz、Hawgiuz Gveiyen) ndawde aen ceiq hung. Mwh Ciuhmingz Ciuhcingh, gwnzhaw hangzbouq gak cungj gak yiengh, gak dieg canghseng’eiq youq gizneix laeb- baenz veigvanj, ndawde Guengj- doeng、Huznanz、Gyanghsih veigvanj nem Cinghcinhsw haemq okmingz. Daengz Minzgoz cogeiz, Dahih gaenq miz bet diuz gai hung, gij mingzhauh bouqdiemq miz “seiq aen hung”、“bet aen rauh”、“ngeihcib seiq aen iq”, yienh’ok gij yiengh hoengh- vuengh seizhaenx.

Hawgeq lizsij gyaenanz, giuzrin gungj dog Giuzfanhgyaeu youq Ciuh- cingh guhbaenz haenx, lij maenhcoek dwk hamjgaq daengz baihnamz diuzdah; gwnzhaw miz Miuhgaucoj、Miuhhanvangz caeuq gij veigvanj Guengjdoeng、Huznanz、Gyanghsih Ciuhcingh hwnjguh haenx, diuz gaibenjrin raez baenz 5 goengleix haenx, gij ranzlaeuz cienheu vaxheu、gij bouqdiemq benjfaex haenx, cungj ndaej guhcingq gij gaeuqgeq aenhaw. Seiqhenz Dahih lij miz Byagoengsix、Byagingjsanh、Byabuenzmuh, baenz bi seiqgeiq faex mwn raemhrwd; Mauzcouh baihsae hawgeq, raemxdah hophumx seiq mienh, gingjsaek gyaeundei; diegneix lij dwg aen suenmak hung ndaem miz makgam、makdoengj、makbugdiengz ndeu, doenghnaz suenmak, gyaeundei lumj veh.

Hawgeq lij miz gij rizdin bouxokmingz, Sunh Cunghsanh daiq bing hoenx bae baihbaek seiz, naengh ruz doenggvaq Dahih caemq- caiq youq henz dah guh yienjgangj gvaq; Lingzconh aen Cunghgung cujciz ceiq caeux de—Cunghgungh Gveilinz Dunghyangh Gih Veij- yenzvei caeuq Cunghgungh Mauz- cunh Cihbu couhdwg bi 1928 ndwen 8 youq Dahih laebbaenz. Denyingj “Liuz Cejsam” caemh youq gizneix goepingj haujlai gingjrog, miz cibgeij bouh denyingj、densigi youq gizneix goep gingjrog gvaq. Lijmiz, gyoengq- vunz gwnzhaw gijgwn miz daegsaek de caeuq gij vwnzva、yizloz、sibgvenq fungsug ndawbiengz lai cungj lai yiengh, caemh hawj bouxhek haengjgyaez cix doxcaeh bae youzcet.

Youq ndaw hawgeq menhmenh youzbyaij, mwngz ndaej roxnyinh gij cwxcaih soengset saedceij vunz gwnzhaw, caemdingh caemhcaiq angqyangz, gyoengqde cungj caez henmaenh faenh cienzgeiz gaeuqgeq satrieng neix……