6 nyied 22 hauh banhaemh, Guengjsae gaiq daeuz siujyoz gyauyuz ciennieb Cuengh Gun song vah saw baetnieb vanjvei youq Guengjsae Swhfan Yozyen Cangzgangh Yaugih banh. Guengjsae Swhfan Yozyen fuyaucangj Lij Yangjci、 Swcigih Minzyijveij fucujyin Veih Yungj- hungz、 Swcigih Gyauyuzdingh Minzgyaucu cucangj Veiz Lanzmingz daengj camgya caemhcaiq yawj le baetnieb vanjvei.

Vanjvei hainduj seiz, Veih Yungjhungz gangjvah cukhoh gyoengq hagseng gaiq daeuz Cuengh Gun song vah saw swnhleih baetnieb, de maqmuengh Guengjsae Swhfan Yozyen gaemndei seizndei neix, cungjgez gingniemh, fatyiengz cingz- cik, coglaeng aeu ban Cuengh Gun song vah saw banh ndaej yied daeuj yied ndei, vih ndawbiengz son’gyauq engq lai habgek lauxsae caeuq vunzcaiz, vanzlij naeuz hagseng baetnieb gaenxmaenx vih Cuengh Gun song vah saw gyauyuz guh gungyen, yungh gij cihsiz bonjfaenh youq hagdangz seiz hag ndaej haenx bauqdap ndawbiengz、 bauqdap Mbanjcuengh,

Veiz Lanzmingz doiq hagseng baetnieb yaek bae gak dieg son Cuengh Gun song vah saw haenx daezok geij diemj maqmuengh: Giendingh saenqniemh caeuq lij- siengj mbouj doenghngauz, giendingh saenqsim caeuq gietsim guh hong Cuengh Gun song saw giekdaej sonhag; laebdaeb hagsib, baujciz gaenx hag, giengzvaq Cuengh Gun song vah saw gyauyuz sonhag suijbingz; caenhvaiq sibgvenq guh hong, gaemmaenh sonhag saedhengz bonjsaeh, vih son’gyauq vunzcaiz saujsu minzcuz guh gungyen.

Baetnieb vanjvei seiz, gyoengq yenjyenz daiqbiuj 78 boux hagseng baetnieb gaiq daeuz ban Cuengh Gun song vah saw hwnjdaiz biujyienj haenx, doenggvaq gangj Vahcuengh、 eu fwen、 diuq foux Bouxcuengh、 yungh Vahcuengh yienj heiq bonjsaw Sawcuengh daengj hingzsik, baijyienj le gij cingsaenz yienghsiengq hagseng gaiq daeuz ban Cuengh Gun song vah saw gaenxmaenx doxhwnj, canghfwen Vahcuengh Luz Cwngsin miz aen cwngheuh “Daegsaenq Mbanjcuengh” haenx hix daeuj camgya vanjvei, yienjciengq go Vahcuengh.

Hagseng camgya baez vanjvei neix dwg hagseng gaiq daeuz ban Cuengh Gun song vah saw Guengjsae Swhfan Yozyen Codaengj Gyauyuz Yozyen 2014 nienz hailaeb ciusou conhgoh siujyoz gyauyuz (Cuengh Gun song vah saw fuengyiengq) ciennieb haenx. Ciuq cam rox, daj bineix hwnj, aen ciennieb neix yaek gaij baenz 3 bi lo, yaek laebdaeb vih gih raeuz son’gyauq engq lai vunzcaiz Cuengh Gun song vah saw, mboujduenh gyalai gij lauxsae ligliengh Cuengh Gun song vah saw gyauyuz gih raeuz.