Gwn ngaiz gvaq le, Dahfung coi gou bae swiq ndang, lij bang ra dauq buhvaq ndeu daeuj hawj gou rieg, naeuz sien ndeindei yietnaiq haemh he, haetcog caiq hawj cienz hawj gou.

Aenvih baeg lai, ngamq 8 diemj lai cung gou couh baiqninz lo, hoeng dou rug lij gven ndaetndwt. Dahfung lij caengz siengj deuz bae. Gou saedcaih dingj mbouj ndaej lo, couh naeuz：“Fung, gou baiqninz lo, mwngz hix bae yiet ba！”

Seizneix, Dahfung fwt coemj gvaqdaeuj got gou ndaetndwtndwt bae. Gou lumj ndaek gyaenghguenh ndeu mbouj rox baenzlawz guh, cij roxnyinh dahde daenj geu buh mbangmbetmbet, ndang de youh unq youh raeuj, nemz dwk gou yaek diemheiq mbouj ndaej bae. Gou simvueng dwk cak bae cak dauq, naeuz：“Fung, gaej baenzneix guh, baenzneix guh deng gvan mwngz rox couh mbouj ndei lo……”

“Ndaek haenx caeux couh ndek gou bae aeu yahnoix lo.” Dahfung raemxda conh okdaeuj lo. “Dangh- naeuz mwngz mbouj yiemz gou uekcuek, haemhneix gou couh youq neix buenx mwngz.”

Baez raen raemxda, sim gou couh unq lo……

Haetlaeng gou hwnqdaeuj, Dah- fung mbouj rox bae gizlawz lo, cij raen aen byuksaenq ndeu cuengq youq aen daiziq gyaeuj mbonq. Gou dawz aen byuksaenq daeuj hai yawj, baihndaw miz 5 bak maenz ngaenz caeuq mbaw ceijdiuz he. Gwnz ceijdiuz sij naeuz：

Haemhlwenz roeb daengz beix

Nuengx haengjheiq lailai

Lumj raemxrongz dongj fai

Maengx yaek dai yaek lix

Dahfung deuz lo, caiq hix mbouj dauqma aen bouqdozhek haenx lo. Gou gvaqlaeng bae aen bouqdozhek haenx ra de geij baez gvaq cungj mbouj raen. Geij bi gvaqbae, de hix mbouj dauq ranz de gvaq. Gwnzbiengz gvangqlangh, vunz baenzyoz, gou bae gizlawz cij ra ndaej raen de ya! Aiq baez doxbiek, couhdwg ciuh neix caiq hix mbouj ndaej raen lo.

（sat）