Gaenh geij bi neix daeuj, Fuconh Yauzcuz Swciyen baengh minzcuz、 swnghdai、 ciengxndang daengj gijndei swhyenz, gyavaiq haifat huq lijyouz vwnzva Yauzcuz, hawj swnghdai lijyouz fuzvuyez doidoengh minzcuz ginghci youh ndei youh vaiq hwngfat.

It dwg gungganq swnghdai ciengjxndang binjbaiz. Baengh Fuconh “aen yangh gyaeunanz Cungguek”, doed ok “Yauzcuz gyaeunanz vwnzva”, giethab yw Yauzcuz conzdungj, maeuzveh swnghdai cangqheiq ciengxndang、 cangqheiq ciengxlaux canjnieb, gungganq “gijgwn ciengx- ndang youq Fuconh” cangqheiq binjbaiz. Gyavaiq hwngfat Yauzyangh daegsaek swnghdai lijyouz gijgwn ndei canjbinj, dajcaux Yauzcuz daegsaek gijgwn binjbaiz.

Ngeih dwg gungganq gij doxgaiq reihnaz saekloeg cangqheiq Yauzcuz. Gujli minzcuz giyez gyagoeng makdoengj、 cazyouz bya、 biek Fuconh daengj Yauzcuz daegsaek doxgaiq reihnaz, sonyinx giyez youq gwnz baucang yungh Yauzcuz ciengxndang vwnzva yenzsu, gaenxmaenx cengcaux Guengjsae sanghbyauh mizmingz、 Cungguek sanghbyauh mizmingz.

Sam dwg gyagiengz swnjcienz dinfwngz fwngzguh conzdungj Yauzcuz. Hwnjlaeb “gizdieg swnjcienz deuqva dajsiuq Yauzcuz” “gizdieg swnjcienz bauqva hung Yauzcuz”, dazyinx Siuqyauz、 Manyauz、 bauqva hung Yauzcuz daengj Yauzcuz vwnzva gunghyibinj fwngzguh diengzhong haeuj lijyouz gingjgih, swnghcanj huq lijyouz vwnzva daegsaek minzcuz.

(Dwng Vangzyi/邓黄玉  Vangz Yiyungz/黄玉荣)