Doengh bi neix daeuj, Sanh- gyangh Dungcuz Swciyen Yangzhih Yangh Gauhlu Cunh baengh gohyoz ndaem gocaz, mboujduenh demlai ndaemganq gocaz mienhcik, comz ngaenz banh mbawcaz gyagoeng- cangj, caemhcaiq yinx haeuj gij giyez gyaeujlungz guhcaz, aeu yienghvunq “hozcozse+ranzgungz- hoj” neix bae hwngfat hong ndaem caz guh caz, hawj “Cazgauhlu” mingzdaeuz engq mizmingz, vunz- mbanj caemh ndaej demlai souhaeuj. Seizneix, Gauhlu Cunh gocaz ndaemganq mienhcik gaenq miz 2000 lai moux, vunz ndaw mbanj moix vunz bingzyaenz cinghsouhaeuj cix daj 2010 nienz 3330 maenz demlai daengz 2015 nienz 6400 maenz, haujlai vunzmbanj baengh ndaem caz guh caz ndaej vut gungz baenz fouq.

Gauhlu Cunh dieg youq baihsaebaek Sanhgyangh, gvihaeuj ranghheiqhaeuh loqhwngq, hoeng- heiq dumznyinh nditndat cukgaeuq, baenz bi fwj mok hopheux gyuem- longz, bi bingzyaenz dohraeuj 18℃, moix bi ok ndit baenz 1400 diemj cung; fwn doek yinz, bi doek fwn bingzyaenz dabdaengz 1500 lai hauzmaex. Gauhlu Cunh miz raemx lai, namh biz, ndoengfaex hoemq- cwlwd dabdaengz 83.6%, doenghgij heiqhaeuh caeuq diegdeih diuzgienh daegbied neix, soengq gij diuzgienh ndei sengcingz “bya ndei raemx ndei ok caz ndei” hawj Gauhlu Cunh, baenzneix couh miz gij lizsij ndaem caz caeuq sibgvenq gwn caz gyaenanz de, caemhcaiq gyoebbaenz le vwnzva caz Dungcuz daegbied gag miz haenx. Vunzmbanj dawz gij gocaz geq goengcoj louz roengzdaeuj haenx yawj guh “faexsaenz”, caemhcaiq cienz gij vahdaengq goengcoj cien bi “lwglan mbouj ndaej raemj gocazgeq, mbouj ndaej aeu gocazgeq maranz coemhfeiz” neix roengzdaeuj.

Vunzmbanj Gauhlu rox ndaem caz caemh rox guh caz, mbawcaz ndei, guh caz caeuq dwk caz hix caemh youqgaenj, gij dinfwngz guh caz caeuq dwk caz goengcoj Gauhlu Cunh cienz roengzdaeuj haenx gaeuq maenhndei raeuh bw. Moix bi ciet- heiq goekhawx gonqlaeng, gyoengq mehmbwk Dungcuz couh bae gwnz gocazgeq ndaw ranz mbaet aeu gij nyodcaz miz sam seiq mbaw haenx, maranz loq cuengqdak saek yaep le, sikhaek gaq rek dwk di youzcehcaz ndeu dwk feiznumq menhmenh fancauj, cauj mbawcaz gienj le doiq feiz oep saek diemj cung baenzneix, doeklaeng dak sauj roxnaeuz cuengq gwnz saeuq gangqiengj sauj bae, mbawcaz bienq ndaemndwt ngaeuz- ngeb, caemhcaiq daiq miz gij ranghom youzcehcaz caeuq heiq singjsien mbawcaz dem, gwn le ndaej gaij hozhawq singj uk, siu naetnaiq nem cawz caepndat、dingj nit re bingh; dwk caz caemh aeu miz dinfwngz ndei cij ndaej, miz ndat raemx goenj、bwnh liuhgyaux、cawj dangcaz、faen caz、gingq caz caeuq gwn caz roek yiengh hong neix, caz cawj baenz le sien gingq vunzlaux gwn gaemz daih’it, riengzlaeng vunzlai cij ciuq itdingh gvigawj ciuq gonqlaeng lienzdaemh gwn caz.

Bak vunz dwk caz, cien vunz diuq fouxdohyeh, fanh vunz cimz gwn caz……Bineix 4 nyied, Gauhlu Cunh banh le gaiq daih’it ciet vwnzva youzcaz, vunzlai dangdieg aeu dwk youzcaz、ngaiz bak ranz、angq mbaet caz、gaeb bya nauh cin、roeg doxdoj、yienjheiq、baijgai mbawcaz doenghgij cietmoeg lai yiengh neix, caeuq gij hekyouz daj seiq fueng bet baih daeuj haenx angqyangz guh hozdung, hawj aen mbanj gaxgonq caembiembiem neix bienqbaenz le rangh rungh angqyangz nauhyied ndeu, caemh hawj gyoengq hekyouz youq ndaw angqyangz mbouj sij biek bae.