Goenglungz:

Ngoenzneix gou ngeix doeng,

Sam nyied daeuj daengz naj,

Gomiuz ceiq deng seiz,

Vunz doengz raeuz nienzbuenq,

Bouxboux vuensubsub,

Raeuz lumj haj nyied byaek,

Mbouj mbaet hix ok reuz,

Nienzgeij baeseuseu,

Vaiq laux youh vaiq reuq.

Liuzsaez:

Yenzlaiz raeuz doengz mingh,

Go couh dwg gofed,

Bya gwn bya couh dai,

Nuengx dwg duz roegga,

Douh nga nga cungj lak,

Yied dek couh yied laeg,

Mingh caeuq mbwn doxhaek,

Ninz mbouj laep hix ninz.

Goenglungz:

Mwngz saet bouxgvan gou dai maex,

Couh lumj cax ngoemx caeuq cax

myaex,

Doengz haemz doengz hoj doengz

siengsim,

Nga faex raek bae lingh ra mbong,

Mbawrong suek faengx cin daihngeih,

Bohsaez raen le naj gag nding,

Buenq loh ndek nuengx bienq

lingzding,

Gag boux dog fwngz dingj aen ranz,

Dang meh dang boh ciengx lwg maj,

Mbouj haq daihngeih baenzlawz

ndaej?

Seizneix biengz ndei seiqgyaiq moq,

Yahmaiq dauqdaej ndaej swyouz,

Gou daengz gwnz loh daeuj caj mwngz,

Couhdwg lwnh mwngz aen dauhleix.

Liuzsaez:

Go bakyouz bakraeuz,

Gangj caen naeuz gangj gyaj?

Raeuz youq laj dinmbwn,

Daeggo aeu naemj ndei,

Ngoenzneix aen seiqgyaiq,

Yahmaiq ceiq nanzgvaq,

Ma haemz boux ndangheiz,

Vunz heiq yahmaiq biz,

Mwngz siengj aeu yahlaeng,

Ranz mwngz couh aeu doemq,

Diemj daeng gwn haeuxcaeuz,

Lwgbawx hat mwngz ndauq,

Gyaep mwngz ok ranz bae,

Muengh mwngz caeux di dai,

Go bingh hix mbouj dam,

Dai mbouj miz vunz hauq.

Goenglungz:

Daengz dai gaeqmeh mbouj rox hemq,

Gaeqboux ngoenzneix haen baez ndeu,

Raeuz dwg bouxdog doiq bouxdog,

Sikhaek couh ndaej bae doxaeu,

Bouxsien raen raeuz miz yienzfaenh,

Cag nding cug din maenh youh maenh,

Mbouj cingj gag bungz doxgyaez hwnj,

Yied gangj yied lai sim doxgyawj.

Liuzsaez:

Mwngz dwg bouxdog gou mbouj dwg,

Donqdonq miz lwg buenx,

Bawx gou bak youh diemz,

Lan gou youh dingq gangj,

Baihnaj daihloh gvangqhoekhoek,

Vihmaz gou daemh deng go’ndoek,

Go dwg gaeqboux caih mwngz langh,

Nuengx dwg gaeqhangh gou aeu

gyaeng,

Go mwngz siengj doxaeu,

Lingh bae cimh dahnuengx,

Lwgmbwk ranz baihnaj,

Gou bae gwn six gonq,

Mbouj rox geijlai nanz,

Mbouj gamj heuh mwngz caj,

Ngoenzneix gangj baenzlai,

Gvaq dah aeu lumz caez,

Ce aen naj doxraen,

Lingh gangj vah gij wnq.

Goenglungz:

Ngoenzneix raeuz doxraen,

Aenndang gag bienq mbaeu,

Yied byaij couh yied vaiq,

Loh lumj gag bienq dinj,

Ngoenz lawz caiq doxbungz,

Caeuq go ciengq sam ngoenz,

Coenzcoenz cungj gaej lumz,

Gawqgawq aeu haeuj sim,

Aeu cimh couh cimh nuengx,

Aeu haq couh haq go.（caengz sat）