Miz boux daeglwg ndeu gig miz ngaenz, daxmeh de laux lo, heuj vauq caez, de couh hai ci daiq daxmeh de bae hawj canghyw sieng heuj. Baez haeuj yihyen, boux canghyw couh gaisau gak cungj heujgyaj, doeklaeng daxmeh neix senj aeu gij ceiq bienzngeiz.

Boux canghyw neix raen daeglwg neix gig miz ngaenz, doq naihsim caeuq daxmeh neix gangj gij cizlieng heujgyaj bengz caeuq bienzngeiz ca haujlai. Hoeng, daxmeh neix lijdwg genhciz. Daeglwg de youq henz mbouj miz maz hengzdoengh, cijdwg muengz bae guh saeh swhgeij, yaep he okbae dwk denva, yaep he okbae citien, lumj naeuz daxmeh de senj gaiq heujgyaj lawz caeuq de mbouj miz maz gvanhaeh. Boux canghyw neix cij ndaej doengzeiq gij iugouz daxmeh neix.

Daxmeh neix cam boux canghyw gungh aeu geijlai ngaenz liux, couh mbon ok aen ngaenzbau aeu baengz guh, menhmenh hai ok, geq gaeuq ngaenz couh hawj daeglwg de bae bang de gyau ngaenz. Gyau ngaenz ndei, daengz cou laeng caiq daeuj sieng heuj.

Song boux neix baez bae, canghyw gig yawj mbouj hwnj boux daeglwg neix, daenj ndaej gig ndei, yawj hwnjdaeuj hix wnggai miz ngaenz, vihmaz baenzneix ged, cungj mbouj nyienh ok saek faen ngaenz hawj daxmeh de sieng heujgyaj bengz di. Seizneix caen dwg lai faen ngaenz he gij cizlieng couh mbouj doxdoengz.

Cingqngamj boux canghyw neix baenzneix siengj seiz, daeglwg neix youh dauqdaeuj lo. Yenzlaiz gaxgonq de caengz bae gyau ngaenz. De cingj boux canghyw neix caiq hai mbaw dan ndeu, hawj daxmeh de yungh gij heujgyaj ceiq bengz, geijlai ngaenz cungj mbouj youqgaenj, de caiq bae gyau ngaenz. Hoeng, ciengeiz mbouj ndaej naeuz hawj daxmeh de, hawj daxmeh de nyinhnaeuz heujgyaj sieng couhdwg ceiq bienzngeiz couh baenz lo.

Daeglwg neix boh de dai ndaej caeux, ndaw ranz mbouj miz maz ngaenz, cungj dwg daxmeh de mbaet gwn mbaet yungh caemhcaiq gaenx guh hong cij ciengx de hung、soengq de doeg dayoz. Yienznaeuz seizneix de miz ngaenz, hoeng daxmeh de gaenq gvaq saedceij gaenxgiemh gvenq lo, gaij mbouj ndaej. Baez rox de cawx huq bengz couh gig yousim. Ndigah, de mbouj siengj hawj daxmeh de rox. Cijaeu daxmeh de sieng heujgyaj, hawj daxmeh de laebdaeb ndaej gwn van ndoet diemz caemhcaiq angq couh baenz lo.