Dahfung ha Dahfung

Beix simnyungq geijlai

Ndiep mbouj ndaej nuengxgvai

Beix dai da mbouj laep

Gou gig gyaez Dahfung, hoeng de cix biek gou bae geij bi mbouj miz saek di yaemsaenq.

Ranz Dahfung youq aen mbanj caeuq mbanj gou doxgyawj, gou daj iq couh ndaej caeuq de guhdoih doegsaw. Seiznyez lij hozoiq, ngoenz hoij van hoij diemz, caez guhcaemz doxriengz, dox yien fwngz guh’angq.

Song dou caemh doeg siujhag、cuhcungh, dahde caen saundei, song mengq raezredred, byaij loh biyedyed, gvaigvetgvet maezvunz. Cuhcungh bizyez le gou bae yienhsingz doeg gauhcungh, Dahfung cix aenvih beixnuengx lai, boh de mbouj miz baenzlai cienz soengq couh mbouj ndaej laebdaeb doegsaw lo.

Youq yienhsingz doeg gauhcungh geij bi, gou ciengzseiz caeuq Dahfung dox doengsaenq gangjgoj. Saekseiz caj haemq nanz mbouj raen dahde miz saenq daeuj, ndawsim gou couh roxnyinh hoengqvangvang, lumj deng doek maz doenghyiengh nei…… Gizsaed, ndawsim gou gaenq laeglemx gyaez hwnj dahde lo. Gou hwnzngoenz doeng ngeix sae siengj, hwnjdangz mbouj miz saek di simgei dingq lauxsae gangjgoq, gij cingzcik gou ciemh ngoenz ciemh doek roengzdaeuj.

Hwnj gauhcungh sam nienzgaep le, hagsib gaenj dangqmaz bae, mbouj rox vihmaz, Dahfung dwk saenq daeuj caemh ciemh ngoenz ciemh noix lo. Sawqmwh miz ngoenz ndeu, de dwk fung saenq he daeuj, gou baez cekhai daeuj yawj, doeksaet yat! Ndaw saenq dwg roix fwen ndeu：

Mwh beix ciep ndaej saenq

Nuengx aiq gaenq haq vunz

Ndaw ranz hoj ra gwn

Boh aeu vunz ngaenzlaex

Nuengx nauh mbouj siengj haq

Bohmeh ndaq yaek dai

Dangq deng dawz bae gai

Byawz cienz lai couh cimh

Daej dwk da cix va

Lae raemxda biek beix

Yaek lumz mbouj yungzheih

Muengh beix doeg baenz saw

……

Gou caiq hix yawj mbouj roengzbae, dinfwngz unqniek, genxhoz raixcaix. Mehmbwn ha, saehcingz vih- maz bienqbaenz yienghneix?

Gauhgauj gvaq le, gou doek- buengj lo, naiqnueknuek dwk dauqma ranzmbanj. Gangj vah lauxsaed, gou lij lumz mbouj ndaej Dahfung, hoeng “Dahfung gaenq haq vunz, ndek beix gwn haemzhoj,” gou cij ndaej “beix ndawsim gag hoh, de itloh vuenyungz.”

Saetlienh dangq maxbag, gaem cag hoj beng ma, ndaw uk luenh dangqmaz, caenh ngeix ra youxnduj. Nuengxgvai ndek beix bae, raemxda lae’byoegbyoeg, daej song da cix foeg, ndaengmug rih langh gangz.

Vihliux ra gwn, gou bae Guengjdoeng ra hong guh. Ngamq bae daengz Guengjdoeng, gou couh dauqcawq bae ra yawj gvangjgau ciugoeng, yawj gizlawz miz hong hab gou guh. Doeklaeng couh deng bang vunzrwix yaeuh lo, gij cienz gwnz ndang deng bok bae seuqsat. Gou lumj boux gaujvaq nei, naiqnueknuek dwk byaij gwnzgai, youh hawq youh iek.

Gwnz gai, vunz lai vunz daih, cihung ciiq baebae dauqdauq, mbouj dingz mbouj duenh, song mbiengj gai doenghoux gai gij gwn haenx seng’eiq nyaengqfwdfwd, heiq hom bongj daeuj hawj gou nyaenx mbouj ndaej ndwnj myaiz nwdnwd, lij miz doengh dah cienmonz fugsaeh vunz haenx cang ndaej gyaeugigi ndwn youq bakdou bouqdozhek riunyumnyum heuh vunz haeuj ndaw bouq bae dozyouq. Gou caen siengj gwn saek vanj ngaiz le haeuj ndaw bouq bae yietnaiq. Hoeng gou gwnz ndang mbouj miz saek faen ngaenz lo, cijndei lumj boux vunzbag nei byaij nwdnwd.

“Gomungz.” Sawqmwh miz sing dahsau ndeu heuh, dwg heuh gou? Gou coh seiqhenz yawjyawj, cij raen aen bouqdozhek gyawj haenx bakdou de miz dah sau lengjlili ndeu coh gou vad fwngz. O! Dwg Dahfung! Gou lumj lwggyax raen meh nei, sikhaek byaij bae coh de.

“Mwngz youq gizneix guh hong?” Gou cam.

“W!” Dahfung ngaem gyaeuj dwk han.

Gou naeuz:“Fung, gou caengz ndaej gwn ngaiz, gwnz ndang mbouj miz saek faen ngaenz, siengj ciq mwngz aeu……”

“Aeya, gangj maz vah.” Dahfung mbouj dingq gou gangj sat, couh rag gou haeuj ndaw bouq hwnj gwnz laeuz, daiq haeuj aen rug’iq ndeu.

Haeuj rug le, Dahfung mbon soujgih daj aen dienhvah ndeu, gangj gij vah dangdieg haenx gou mbouj daih roxyiuj. Gvaq yaep ndeu couh miz vunz soengq hab ngaiz byaek homfwdfwd he haeuj rug daeuj hawj gou gwn.

（caengz sat）