Hinghbingz ing bya dep raemx, gingjsaek gyaeundei comzcwk, gij ranz ndaw mbanj ciengz hau vax nding, luengqgai aeu benjrin bu ndaej bingzbwd, dwg rangh haenzdah Dahlizgyangh aen hawgeq ceiq gyaeundei ndeu. Ndaw gyaiq hawgeq mboujdan miz Byavehgoujmax、ngaeuz dauqdingq Vangzbu、hoz- siengh naezgu doxraen、gingj ndei Yalungz、goenglaux hen Makbingzgoj、gingjsaek Langsiz、 byaleix venj dat、Byabitsaenz、Byasae doenghgij gingjdenj gyaeundei neix, lij miz aen Mbanjhinghbingz vunz gvai dieg gyaeu yiengh gingj yinxvunz neix.

Hinghbingz Cin dieg youq haenzdah baihdoeng Dahlizgyangh, liz Gveilinz Si 63 goengleix gyae, liz yienhsingz Yangzsoz 27 goengleix gyae, dwg ciuhgeq haenzdah Dahliz- gyangh aen hawsingz ceiq hung ndeu. Mbanjhinghbingz dwg aen mbanj gaeuqgeq ndeu, daengx aen mbanj gaeuq ciemq dieg 1.5 gunghgingj, miz ranzgaeuq cienzdoengj 48 aen, youq gunghyenz 1506 nienz seiz Ciuh- mingz ndawbi Vanliz couh laeb mbanj, daengz seizneix gaenq miz seiq bak lai bi lizsij. Gij ranz ndaw mbanj cien heu vax ndaem, dingj- ranzlingq、ciengzgyaeujmax、yiemh- ranz gungjngaeu、diuzliengz veh veh、aencueng deu va, doxdep doxdaeb baizlele, yiengh gyaqdaep daegbied, daegsaek ranzyouq vunz Gveiqbaek seiz Ciuhmingz Ciuhcingh mingz- yienj, seiq bak lai bi gvaqbae, ginggvaq le gij hoenxciengq Ciuh- mingz Ciuhcingh、ciengz hoenxciengq Cungguek hoenx Yizbwnj、ciengz hoenxciengq gaijfang caeuq vwnzva dagwzming, lij louzce ndaej haemq ndei, saedcaih mbouj yungzheih.

Mbanjhinghbingz naj mbanj Dahlizgyangh hopngomx, baihdah doiqnaj rangh bya daengjdwt sangvid doxing doxdaeb baenz caengz, Bya- byaleix、Byavaxgim、Byayenzbauj、Byacaxgiemq、 Bya’gyaqbit “Byahaj- lwgfwngz” daengj bongh hwnj sang, yienghsiengq aen mbouj doengz aen, hawj vunz yawj dwk simdoengh; Byahozmax、Mbanjraemxmbwn henz- gyawj bya sang raemx saw, gij bya goengq beij goengq geizheih yung- yiemj, hawj vunz caenh siengj bae bin daengz dingj mbat he.

Mbanjhinghbingz dwg aen “dieggviq” ndeu, daj laeb mbanj gvaqdaeuj, moix aen ciuzdaih cungj miz vunz dang hak roxnaeuz fouqmiz. 1921 nienz, goeng daihcungjdungj Cunghvaz Minzgoz seizhaenx Sunh Cunghsanh daiq gak cungj ruz 300 lai aen, daj Vuzcouh nyig raemxdah doxhwnj, yaek bae Gveilinz laeb- baenz aen dabwnjyingz okbing hoenx coh baihbaek haenx, gvaq Mbanj- hinghbingz seiz youq ndaw mbanj yietnaiq haemh ndeu. Youq bi 1998 ndwen 7 ngoenz 2, goeng cungjdungj Meijgoz seizhaenx Gwzlinzdun daj Gveilinz swnh raemxdah doxroengz, daegdaengq bae cunzyawj le Mbanj- hinghbingz, caemhcaiq daj seizhaenx doiq gij ranzcaep gaeuqgeq Cungguek gig miz yinx hwnjdaeuj, gij saeh Gwzlinzdun cunzyawj Mbanjhingh- bingz doenggvaq gwnz seiqgyaiq gij conzmeiz hung haenx baudauj okbae le, aen mbanj iq neix hix engq okmingz lo.

Bae daengz Mbanjhinghbingz, mwngz cawz yawj gingj ndei ra riz geq aenmbanj le, lij ndaej caeuq gyoengq canghdwkbya ndaw mbanj vad ruz roengz dah bae dwkbya, gvaq mbat saedceij canghdwkbya vad aen bez ndeu fouz biu gwnz dah, gyaep roeglaxceiz ndaem roengz laj raemx gaeb bya, caiq cimz gwn gij byadah noh oiqup singjsien feihhom haenx, gij cwxcaih gij angq haenx cix nyoenx hwnj fajnaj ndeiyawj mwngz daeuj……