6 nyied 10 hauh, Lungzswng Gak Cuz Swciyen Lungzciz Cin Bingzanh Cunh banh conzdungj ciet roigyaj moix bi gvaq baez haenx. Hozdung ngoenzhaenx banh le laeujndei Lungzciz coux bouxhek、 daihhingz cizdij dajndaem、 yenzswnghdai gofoux vanjvei daengj hozdung lai cungj lai yiengh. Haemhhaenx lij miz fanh bog bogfeiz diemj rongh nazmbaeklae Lungzciz dem, hawj guengjdaih ndaw guek rog guek hekyouz yawj dwk da cungj mbouj yaep.

Ciet roigyaj dwg aen ciet conzdungj ndawbiengz cibsam aen mbanj Lungzswng Lungzciz he. Binaengz muengzcungq gonqlaeng, Lungzciz vunz Mbanjcuengh cungj senj ngoenzndei ndeu, banh “ciet roigyaj”.

Ngoenzhaenx, gyoengq vunzmbanj youq nazmbaeklae cizdij ndaemnaz guh hong, doenghnaz yaepyet nyaengq hwnjdaeuj, suengndaem、 roigyaj、 senjgyaj、 ndaemgyaj daengj. Vunzmbanj lij haiguh youq gyang nazmbaeklae gaeb bya、 ciengj gaeq、 dwkciengq naez daengj minzsuz hozdung conzdungj sengdoengh miz yinx dem.

(Banh Cisiengz/潘志祥)