Doenghbaez gonq, miz doiq mbauq sau ndeu, daegmbauq 23 bi, dahsau 22 bi, songde daj iq couh doxndiep doxgyaez, song mbiengj gig rox doiqfueng ndawsim siengj maz, majhung le miz aiqcingz cingh, song boux cungj nyienh guhbaenz gvanbaz. Gyoengqde lwnh gij maqmuengh neix hawj bohmeh nyi, roengzrengz ceng’aeu bohmeh doengzeiq. Bohmeh song mbiengj cungj doengzeiq. Ginggvaq habmingh、dinghcaen、gvaqlaex le, sikhaek couh yaek doxaeu lo.

Banh laeuj doxaeu ngoenzhaenx, cingj cib geij congz vunz daeuj gwn laeuj. Daihgya gwn ngaiz、gwn laeuj、gwn noh、gwn byaek, youh caimax guhcaemz, nauhyied dangqmaz, itcig daengz gyanghwnz.

Dang lwggwizmoq haeuj rugmoq seiz, sawqmwh bongj raq rumz ndeu daeuj, daeng cungj deng rumz ci ndaep lo. Doeklaeng, miz duz iugvaiq ndeu cung haeujdaeuj, cigciep cung haeuj ndaw rugmoq bae, rag bawxmoq hwnj, gwed youq gwnz mbaq buet ok rog bae. Bawxmoq buekmingh cak, hoeng mbouj miz maz yungh. Lwggwizmoq caeuq bouxhek daeuj gyaep iugvaiq, hix laengz mbouj ndaej. Lwggwizmoq caeuq gyoengq beixnuengx、bouxhek doxyaeng gietdingh, riengzlaeng bae ra, itdingh aeu ciengj bawxmoq dauqma, mboujnex couh itcig ra roengzbae, ra raen cij sat. Doxyaeng ndei le, caezgya caez okdoengh.

Iugvaiq rag bawxmoq daengz gwnz bya rin liz aenmbanj miz cib lai leix, gyaeng de youq ndaw gamj byonghbya. Ndaw gamj miz aen laeuzrin iq ndeu, cang ndaej gig gyaeundei. Iugvaiq dajsuenq youq gizneix guh rugmoq, haemhneix caeuq bawxmoq doxaeu. Hoeng, bawxmoq deng aemq daengz gizneix le cungjdwg daej, mbouj dingz roengzdaeuj saek di.

Lwggwizmoq、gyoengq beixnuengx caeuq bouxhek gaenlaeng ra daengz laj dinbya, dingqnyi miz sing dahsau daejnga’nga, rox bawxmoq couh youq ndaw gamj byonghbya. Hoeng, goengq byarin hung neix lingqlanglang, bin mbouj hwnjbae, cijndaej comz youq laj dinbya, muenghyawj ndwi, mbouj miz banhfap. Iugvaiq iet gyaeuj okdaeuj yawjraen gyoengq vunz le riu dwk “Ha! Ha! Ha!” Lij sek:“Sou baema ba! Bawxmoq dauq mbouj ndaej lo! De haemhneix couh baenz yah gou lo, youq ndaw rug moq gou ngamq cang ndei gvaq haemh ndeu, gvaqlaeng de couh ciengxlwenx dwg yah gou lo. Ha! Ha! Ha!”

Cingq youq iugvaiq daekeiqvauvau seiz, miz dahsien he youq goengq bya doiqnaj dwk aendomq ndeu hawj bawxmoq, aendomq doek youq gwnz cueng aen laeuzrin, aendomq miz diuz sai he heux youq gwn rin rog cueng. Dahsau gig mbeihung, benzok rog cueng, iet song cik fwngz okdaeuj, yunghrengz gaem diuz sai aendomq, gyod roengz laj bya bae. Lwggwizmoq caeuq gyoengq beixnuengx、bouxhek sikhaek humx bawxmoq hwnjdaeuj, baujhoh de.

Iugvaiq raen bawxmoq buet deuz, heiqhwnj foegfoeg, sikhaek riengzlaeng gyaep roengz laj bya, cung haeuj ndaw vunzlai bae, yaek ciengj bawxmoq dauq. Youq seiz youqgaenj neix, lwggwizmoq doq dawz aendomq dahsien dwk hawj bawxmoq haenx vut coh iugvaiq bae, aendomq fwt bienq baenz ndaek feiz ak ndeu, coemh dai iugvaiq lo.

Gyoengq beixnuengx caeuq bouxhek angq- fwngfwng humx youq henz ndang lwggwizmoq caeuq bawxmoq dauq daengz ranz.

Daengz ranz le, bouxcawj sikhaek dawz laeuj ndei caeuq byaek feih okdaeuj, cingj daihgya gwn siuyeh, angqhoh ciengj ndaej bawxmoq dauqma.

Caezgya cungj angqvauvau, hoeng lij roxnyinh dwglau. Dingzlai vunz nyinhnaeuz: Yienznaeuz iugvaiq ngamq daeuj ciengj bawxmoq deng coemh dai lo, hix aiq miz duz iugvaiq wnq daeuj ciengj bawxmoq dem.

Yienghneix, gwn siuyeh sat le, caezgya doxyaeng gietdingh, cawz hawj lwggwizmoq haeuj rugmoq buenx bawxmoq, caemhcaiq vunz gizyawz lij youq roengzdaeuj, baen baenz 3 cujiq, doxlwnz fuengzre iugvaiq moq daeuj daengz. Vihliux gyagiengz rengz fuengzre, caezgya lij dawz aendomq venj youq gwnz dou, hawj iugvaiq moq daeuj daengz baez raen couh mbouj gamj haeuj ndaw ranz bae. Daihgya doxyaeng ndei le, couh guh hwnjdaeuj lo.

Itcig daengz ranzrongh, yawj mbouj miz maz saeh le, caezgya cij sanq baema.

Doiq mbauq sau neix baenzranz le, vunzlai nyinhnaeuz dwg baengh aendomq bang, gyoengqde cij ndaej vuenyungz. Yienghneix, caezgya couh siuq haujlai aendomq, lij dawz aendomq diuq foux angqhoh, yienghneix couh miz foux domq lo. Mbouj gijlai nanz, dahsau bae ganj hawfwen, caeuq bouxmbauq eu fwen hix daiq aendomq, genj ndei vunz hab’eiq couh dwk aendomq hawj de. Daj seizneix hwnj, gij fungsug dwk domq couh hwnghoengh hwnjdaeuj lo.