Seiznyez miz haujlai saehyinx, seizneix ngeix dauq, roxnyinh mizfeih raixcaix.

Geiq ndaej gou ndaej 10 bi seiz, caeuq gyoengq doengzdoih ndaw mbanj gig maij dwk lanzgiuz. Mbouj miz giuz, couh aeu vaj daeuj gienj guh giuz, ndaej hoengq couh bae dwk. Doeklaeng, dou doxyaeng ndei, youq ngoenzsinghgiz ndeu bae rungh dwk fwnz dawzbae haw gai, cawx ndaej aen giuzgau dauq. Dou angq dangqmaz, baez cuengqhag, couh bae giuzcangz ndaw mbanj dwk giuz. Haemh miz ronghndwen, yawj ndaej raen, mizseiz dwk daengz gyanghwnz. Bouxlaux daeuj ndaq le cij baema ninz. Mizseiz banringz mbouj bae ninz, dwk giuz dwk daengz lumz bae hagdangz. Mizseiz ciengz giuz ndeu dwk haujlai nanz cungj mbouj ndaej haeuj aen giuz lawz. Yienghneix, gou siengj ok aen banhfap ndeu daeuj: Diemj yieng dingh seizgan, ciengz giuz he gvidingh diemj geu yieng he. Miz aen fap neix le, dou youh ndaej dwk giuz, bae hagdangz youh mbouj daengzceiz lo. Doeklaeng, mboujlwnh aeu mbouj aeu bae hagdangz, dou cungj aeu diemj yieng daeuj suenq seizgan. Vunz lai couh geij boux sien dwk, vunz gizyawz couh ninz gwnz dieg cengj gemj cim geu yieng, mingzmingz lij ca didi, gyoengqde couh naeuz:“Daengz lo daengz lo, yieng coemh yaek liux lo, daengz dou dwk giuz lo!” Seizhaenx, dou mbouj baenz bingh gvaq.

Seiz doeg seiq nienzgaep, gou caeuq doengzdaiz cingzcik haemq ndei. Cinz lauxsae son suyoz ban dou. Miz mbat he, Cinz lauxsae hwnj dangz sat le, couh baij cozyez hawj dou guh. De ngamq baij sat, gou caeuq doengzdaiz couh bekfwngz heuh naeuz:“Guh ndaej lo!” Dou gangj sat couh gyau sawbouh hwnjbae. Cinz lauxsae caeuq gyoengq doengzhag cungj gyaengj liux. De fan cozyez dou daeuj yawj, haenh naeuz:“Yo, Cunghdiz caeuq Cunghliuj caen coengmingz bw, cai daengz gou yaek baij daez lawz hawj sou guh cozyez, sien guh ndei.” Dou dingq le, ndawsim gig angq, lumj ndaej gwn dangz nei riuhehe.

Seiz youq Swsanh Cungsim Siujyoz doeg haj roek nienzgaep, mbanj dou liz hagdangz miz geij leix loh, byaijloh siuj hix aeu buenq diemj cung cij daengz. Seizhaenx, daengx mbanj dou mbouj miz aen cung he roxnaeuz aen soujbyauj he. Vihliux bae hagdangz mbouj daengzceiz, gou youq ndaw ranz gyanghongh daengj diuz saux ndeu, yawj ndit dingh seizgan, nanq ngaeuz saux daengz gyawz wnggai bae hagdangz, daengz gyawz wnggai cawj haeux, gou cungj hauh ndei. Miz haujlai baez, ndaw ban gyoengq doengzhag baez raen gou gip sawbit dwk ndaw daehsaw bae, hix ciuq gou guh. Ngamq gip sawbit ndei, aen cung hung hagdangz couh“dangh—— dangh —— dangh——” hongz hwnjdaeuj, roengzdangz lo. Gyoengqde cam gou:“Mwngz mbouj miz soujbyauj, baenzlawz rox yaek daengz roengzdangz?” Hainduj, gou mbouj guh sing, cam lai le, gou cij lwnh hawj gyoengqde nyi:“Ngoenz miz ndit, yawj gij ndit bangx ciengz daj congh vax roh roengzdaeuj, daengz gizlawz roengz dangz daih’it, daengz gizlawz roengz dangz daihngeih, baez yawj couh rox lo, itbuen ca mbouj geijlai.” Gyoengqde dingq le, cungj riu hwnjdaeuj, doiq gou naeuz:“Mwngz caen dwg gvai bw!”

Seiznyez lij miz haujlai saeh mizyinx, seizneix laux lo, nanz mbouj nanz ngeixdauq geij gienh, sij okdaeuj yaeuh caezgya riuriu.