Youq Gungjdung Yangh gizdieg baihbaek liz yienhsingz Yungzsuij Myauzcuz Swciyen miz 120 goengleix gyae neix, miz aen mbanj gig miz daegsaek ndeu heuhguh Mbanj- bingzmauj, vunzmbanj 98% dwg beixnuengx Dungcuz, ndaw mbanj giz ceiq miz daegsaek haenx dwg baenz benq laeuzbauq, youq bi 1923 daengz bi 1930 ndawgyang hwnjguh, seizneix miz 12 aen laeuzbauq lij louzce ndaej haemq ndei, gij dinfwngz caepguh de daegbied gag miz, dingzlai dwg yiengh seiqcingqraez caeuq seiq- cingq, baihrog aeu ciensiu caep baihndaw faex benj doqdaep, moix aen laeuzbauq cungj hai miz conghnyingzcungq. Cetbyai aen dem aen laeuzbauq, hawj hekyouz gag miz cungj roxnyinh con haeuj conghmbwn seizgan nei, lumj dauqbae daengz seiz gaxgonq gig nanz gig nanz haenx……

Gaej laihnaeuz cijdan gij laeuz- bauq、roenbenjrin haenx yaenq miz riz bienqvaq lizsij, gij fungcingz minzcuz gizneix hix caemh noengz- nwd naekgywg, moix daengz gvaq ciet gvaq cieng, ndaw mbanj cungj guh boq aenvenz、diuq fouxcaijdangz、roeg doxdoj、ciengq go Dungcuz doenghgij hozdung daegsaek minzcuz neix. Ndawde banh ndaej ceiq hoenghhwd haenx dwg ndwencieng co’ngux hoihbo, ngoenzhaenx daengx mbanj guh beij boq aenvenz sing ceiq gok、diuq foux aenvenz caijdangz caeuq gij hozdung guh’angq lai cungj lai yiengh haenx, ndaw yienh rog yienh baenz fanh hekyouz cungj boux iu boux bae yawjngonz, ciengzmienh hoenghhwd ndeiyawj.

Geij bi neix daeuj, youq baihgwnz mizgven bumwnz haenq- rengz haeujcoengh lajde, aen mbanj neix gonqlaeng roengzngaenz 200 lai fanh maenz guh yiengh mbanj coihcingj cang moq caeuq ranzgaeuq baujhoh, lij naemj yaek comz ngaenz 200 fanh maenz bae coih gij laeuz- bauq ndaw mbanj dem, doengzseiz doenggvaq guh “aenmbanj seuq- cingh”、 “aenmbanj swnghdai” doenghgij hozdung neix, hawj aen mbanj gaeuqgeq caiqlij miz daegsaek minzcuz neix yied daeuj yied gyaeundei, caemh lienzdaemh aeundaej haujlai mingzdaeuz ndei: Bi 2007 nienzdaej ndaej bingz guh “aenmbanj yawjgingj gig ndei Cungguek”, bi 2012 ndwen 12 ndaej senj haeuj buek mingzloeg daih’it aenmbanj cienzdoengj Cungguek, bi 2015 ndwen 4 ndaej senj haeuj Guengjsae raeuz buek mingzloeg daih’it aenmbanj cienzdoengj, hawj Mbanjbingzmauj mingzdaeuz cienz ndaej engq gyae engq gvangq engq yinx vunz lo.