Denz: O! Laxlawz dwg yienghneix.

Au: Meh gou laih mwngz? Gou cam mwngz.

Bi’gvaq ngoenz goekhawx,

Meh hawj mwngz fanh maenz,

Haetlaeng miz vunz raen,

Mwngz geiq ngaenz doxok.

Simj:

Bi’gvaq ngamq seng lwg,

Caez vanswd vandiengz,

Angq lan daeuj daengz biengz,

Meh hawj cienz gwn bouj.

Daegbeu cunghgauj baenz,

Ndaej sawj vunz da’byaengq,

Gou sim’angq fwngqfwngq,

Daegdaengq dajciengj de.

Au:

Meh hawj ngaenz hawj mwngz,

Dwg hawj mwngz gwn bouj,

Mwngz cix mbouj rox couj,

Dawz daeuj hawj lingh vunz.

Denz: Daegbeix ha, hawj gou

baenzlawz gangj mwngz cij ndei.

Meh mwngz hawj cienz vunz,

Mbouj lwnz daengz mwngz guenj,

Beixsauj gangj le suenq,

Caih de nyienh hawj byawz.

(cienq coh Simj)

Doxgyaez ndei dangqmaz,

Gvanbaz huz baenz seiq,

Baezlaeng cungj saeh neix,

Yaek geiq ndaej doxyaeng.

Simj:

Doxyaeng mbouj miz yungh,

Fanjcingq cungj doxceng,

Dangq soek faex dauqnyangz,

Sai rengz lai mbouj dij.

Denz:

Daegbeix ha daxsauj,

Sou gaej gauj gaenj lai,

Caj gou gangj daengz byai,

Caengz gaenj sai hauzheiq.

(cienq coh vunzlai)

Mwhgonq gig doxgyaez,

Baezneix cix fanjnaj,

Bwh ndei baenz ruz vah,

Gienq gyaeujyah doxhuz.

(rag Au gvaq mbiengj bae)

Daegbeix ha daegbeix,

Gaej baenghheiq lizvaen,

Saeh gvaq mwngz couh raen,

Byot aen mbanj cix sat.

Meh mwngz bingh naek seiz,

Byawz guh bae fugsaeh,

Beuj nyouh caiq beuj haex,

Mbouj maex mwngz bouxlawz?

(rag Simj gvaq lingh mbiengj bae)

Daxsauj ha daxsauj,

Daegbeix gauq mwngz baenz,

Vunz rog lij hozhaenz,

Naeuz sou caen doxdaengh.

(caengz sat)