Veiz Gvanghmingz dwg daeglwg ranz bouxguhhong lajmbanj. Daxboh hawj de an aen mingzcoh neix dwg muengh de baenzmbauq le diuzloh baihnaj de ronghsagsag, ndaej hawj cojgoeng ndaw ranz ceng aennaj.

Veiz Gvanghmingz hix caen dwg yienghneix dahraix, daj de haeuj hagdangz doegsaw daeuj, cingzcik de itcig baiz youq ndaw ban mingz daih- it, mbouj miz haggeiz lawz mbouj lingx ndaej ciengjcang ma ranz. Yienghneix, mbouj gag dwg bohmeh de miznaj dangqmaz, couh lienz gyoengqvunz ndaw mbanj, hix gig hozhaenz de, vunz raen vunz haenh. Caezgya cungj gangjnaeuz, daeglwg neix majhung le, itdingh guh ndaej bae.

Caen dahraix, Veiz Gvanghmingz ndaej 17 bi bihaenx, camgya cungh- gauj, gauj ndaej cunghconh, bae aen nungzyau ndeu doegsaw. Doeg baenz 3 bi saw le, faenboiq ma ndaw yienh nungzyezgiz gunghcoz.

Ngamq daeuj sevei camgya gunghcoz, Veiz Gvanghmingz hix caen buekmingh laemxsim bae guhhong. De roxyiuj, de dwg daeglwg ranz boux- guhhong lajmbanj, de miz ngoenzneix caen dwg mbouj yungzheih. De yaek guh ok di cingzcik daeuj, hoizbauq sevei, bauqdap aencingz bohmeh. De dingqcoengz lingjdauj anbaiz, caenh- sim haeujsim bae guh bonjfaenh, ndaej daengz lingjdauj yawjnaek. Mbouj geij bi, Veiz Gvanghmingz couh daj boux gunghcoz yinzyenz bujdungh ndeu, daezswng hwnjbae guh ban- gunghsiz cujyin lo.

Daj Veiz Gvanghmingz dang cujyin le, de couh lumj bienqbaenz lingj boux vunz lo. De caiq hix mbouj lumh daeglwg ranz bouxguhhong lajmbanj haenx mbaet gwn mbaet yungh lo. Aenvih ndaw fwngz de gaem miz cienz, danhfanz guh yienghlawz de cungj gig gyangjgiu. Lumjnaeuz buhvaq yaek daenj mingzbaiz, citien yaek cit ien bengz, okdou yaek miz ci naengh, lij ciengzseiz haeujok fanden ciujlouz caeuq ding KTV, cungj baijdaeuz de caeuq boux daeuzlaux doxlumj caez.

Veiz Gvanghmingz cungj baij- daeuz neix, bohmeh de yawj youq ndaw da, you youq ndawsim, seiz mbouj seiz daezsingj de naeuz: “Daeggo ha, rox dwg vunz lajmbanj, miz faenh haeuxvuengz gwn caen mbouj yungzheih, mwngz roxhit gag guh bw! Lumj mwngz lingx faenh gunghswh neix, baenzlawz ndaej yienghneix daihsaengq gvaq saedceij ne? Vahsug gangj, siujsim cauh ndaej ruz fanh bi.” Veiz Gvanghmingz dingq bohmeh de yienghneix gangj, mbouj- danh mbouj dawz haeuj sim bae, caemhcaiq nyinhnaeuz bohmeh de vahraemh lai, gaenq gaen mbouj ndaej seizdaih lo.

Gyoengq beixnuengx ndaw mbanj raen Veiz Gvanghmingz cungj baij- daeuz neix, miz boux simndei hix ciengzseiz daezsingj de naeuz:“Gomingz, guh saeh yaek guh doek- daemq di, mbouj ndaej guh ndaej angj lai, yienghneix saedceij cij gvaq ndaej an’onj bw!” Veiz Gvanghmingz dingq le, cij riu mbouj gangj vah, dangq guh rumz biu gvaq rwz, hix mbouj dawz haeuj sim bae, ciuqyiengh maij baenzlawz guh couh baenzlawz guh.

Yienghneix, couh mizmbangj vunz youq baihlaeng laeglemx ngeix- lwnh naeuz:“Gaej yawj de seizneix daekeiq dangqmaz, baujmboujcinj seizlawz de daemjndoet mueb hix mbouj rox bw.”

Gij vah neix doeklaeng cienz daengz Veiz Gvanghmingz gizhaenx, de hix mbouj dawz haeuj sim, de ciuqyiengh caeuq baeznaengz ityiengh daih saengq daih sai, naj rongh naj angj. Doiq gyoengqvunz youq baih- laeng ngeixlwnh de, swt hix mbouj swt saek di.

Youh gvaq song sam bi, Veiz Gvanghmingz mboujdanh mbouj aenvih de daih saengq daih sai saetbae maz, dauqfanj daj ban- gunghsiz cujyin daezswng baenz fugizcangj dem.

Cingq youq Veiz Gvanghmingz lumjnaeuz yawjraen diuz loh ciuhvunz baihnaj ronghsag caemhcaiq gig daek- eiq fwngfwng seiz, daengx guek haiguh fanjdui fujbai caeuq dizcang lenzcwng yindung, Veiz Gvanghmingz deng ndaw yienh gijveij ra bae camvah lo. Dingqnyi vunz gangj, daj seizhaenx hwnj couh caiq hix mbouj raen de gvaq lo.

Aen siusik neix cienz baema daengz ndaw mbanj ranz Veiz Gvanghmingz le, gyoengqvunz ndaw mbanj de cungj danqheiq naeuz:“Mbwn guengz miz fwn, vunz guengz miz hux. Caen siengj mbouj daengz Veiz Gvanghmingz miz baenzneix dungxcaiz, daengz doeklaeng lijdwg ranzrongh lij nyouh dwk vaq ne!”