Gaxgonq, youq ndaw mbanj miz ranz ndeu miz sam boux daeglwg, lwg ceiq iq haenx miz di huk, ndigah couh heuhguh Daeghuk, de cungj deng song daeggo de haephangz.

Baez he, daeglwg hung yaek bae aeu fwnz, daxmeh hawj de daiq bingjgan caeuq laeujmakit bae gwn. Daeglwg hung youq ndaw ndoengfaex bungz daengz bouxlaux ndeu. “Hawj gou gwn bingjgan mwngz gaemz ndeu、ndoet gaemz laeujmakit mwngz ndaej lwi?” Bouxlaux neix gangj ndaej hojlienz lai lo. Hoeng daeglwg hung gig ged, de naeuz:“Hawj mwngz gwn gou lij gwn maz? Deuz gyae bae!” Doeklaeng de donj faex seiz, ndaek gen de couh deng donj sieng lo.

Ngoenzlaeng, lwg daihngeih hix yaek bae ndaw ndoengfaex aeu fwnz, daxmeh hawj de daiq gij gwn caeuq daeggo de doxdoengz. De lumj daeggo ityiengh, saek di cungj mbouj hawj bouxlaux gwn. Doeklaeng de donj faex couh donj deng diuz ga de lo.

Daeghuk hix caeuq daxmeh gangj yaek bae aeu fwnz, meh de hix hawj de daiq bingjgan caeuq laeujmakit. de bae daengz ndaw ndoengfaex, bungz raen bouxlaux caeuq de aeu gijgwn, Daeghuk naeuz:“Danghnaeuz mwngz mbouj yiemz, raeuz caez gwn doxgaiq neix ba!” Bouxlaux gwn sat, doiq Daeghuk naeuz:“Gou aeu bauqdap mwngz. Mwngz bae raemj go faex geq haenx, doxgaiq ndawde couhdwg hawj mwngz lo.” Daeghuk bae raemj, yaep he go faex haenx couh laemx roengz- daeuj, ndawde gawqyienz miz duz hanqgim ndeu.

Daeghuk daiq duz hanqgim neix yaek dawz haeuj ndawsingz bae gai, byongh loh yawjraen aen diemq, de couh haeuj bae ra gwn gaemz raemx he. Boux lauxbanj miz sam dahlwg, gyoengqde yawjraen duz hanqgim neix, couh guhcaeg yaek gaemh ndaek fwed duz hanqgim neix, siengj mbouj daengz gaiq fwngz gyoengqde cungj deng nem youq gwnz ndang duz hanq- gim neix lo.

Ngoenz daihngeih, Daeghuk laebdaeb byaij roen haeuj singz, bae dawz duz hanqgim de seiz cij raen sam dahlwg lauxbanj cungj youq gizhaenx. De cam:“Beixnuengx a, sou youq gizneix miz maz saeh?” Gyoengqde cijndei dap naeuz:“Dou coengzlaiz mbouj raen duz hanqgim gvaq, siengj caeuq mwngz itheij bae ndawsingz, youq gwnz roen bang mwngz umj duz hanqgim neix, yienghneix mwngz mbouj baeg caemhcaiq dou hix ndaej gvaqyinx lo!” Daeghuk hix mbouj ngeiz, couh doengzeiq lo. Doeklaeng sam dahlwg neix couh youq baihlaeng Daeghuk itheij umj duz hanqgim neix hwnj singz bae lo.

Gwnz roen miz boux ciengx vaiz he yawjraen le, yaek aeu cag rag gyoengqde sanq. Hoeng hix deng nem gvaqbae lo. Boux gai noh yawjraen, hix bae rag gyoengqde, doeklaeng hix deng nem hwnjbae. Yienghneix, Daeghuk byaij youq baihnaj, baih- laeng haj boux vunz nem youq itheij umj duz hanqgim he, daeuj daengz ndawsingz lo.

Vuengzdaeq cij miz boux dahlwg he, hoeng de cungj mbouj riu gvaq. Vuengzdaeq couh nem ok mbaw gunghgau he, gangj bouxlawz dangh- naeuz loengh riu gunghcuj, couh hawj gunghcuj haq hawj de. Daeghuk dingq vunz naeuz gienh saeh neix, couh daeuj daengz baihnaj gunghcuj. Gunghcuj baez yawj gyoengqde haj boux vunz nem youq itheij, couh haha dwk riu hwnjdaeuj. Seizneix haj boux vunz fwt sanq lo.

Doeklaeng, vuengzdaeq souj aen hanbak haenx, couh haq gunghcuj hawj Daeghuk lo, caemhcaiq lij cienz aen vuengzvih hawj de dem.