Hai ci bae daengz Mbanjyauz Ginhbauj, ngamq byaij roengz ci couh yawjraen aen ciengzdingzci gvangq- yub ndeu, aen nyenz deugaek hungloet ndeu daengj youq gok ciengzdingzci, aen douhung gig miz daegsaek minzcuz ndeu hamj vang gvaq gwnz roen, caen dwg giz yiengh ndei lajmbanj moq ndeu ha. Ndaw mbanj diuzroen bingzbwd seuqcingh, ranzlaeuz aen dem aen sieng youq ndaw ndoengfaex, gyoengq beix- nuengx Yauzcuz ndaw mbanj simsoh gaenxhong, haengjheiq daih hek……Swhyenz swnghdai sengcingz daeg- bied caeuq fungsug sibgvenq vwnzva lai cungj lai yiengh, hawj hekyouz yawj mbouj rox gaeuq angq haenh mbouj dingz.

Mbanjyauz Ginhbauj dieg youq Lingzyinz Yen Swcwngz Cin Ginhbauj Cunh, liz yienhsingz miz 12 goengleix gyae, ndaw mbanj bya sang faex raemh, hoengheiq singjsien, geij diuz rij daj gij bya seiqhenz mbanj lae roengzdaeuj comz baenz diuz Dahginhbauj yaeng’yaeng con lae gvaq gyang mbanj, bya heu raemx saw, gyoebbaenz aen yangjbah hung sengcingz ndeu. Mbanjginhbauj dwg aen mbanj beixnuengx Lanzdenyauz comzyouq ndeu, gungh miz 60 lai ranz 300 lai vunz, ndaw mbanj fungsug Yauzcuz daegsaek noengz- nwd, baengh gij gingjsaek gyaeundei caeuq fungsug sibgvenq lai cungj lai yiengh de, vih hwngfat hong lijyouz lajmbanj daezhawj diuzgen ndei.

Geij bi neix daeuj, Lingzyinz Yen dawz Mbaujyauz Ginhbauj lied guh swcigih gaep lajmbanj lijyouz diemjguhyiengh caeuq singgaep “nungzgyahloz” cix caenhrengz caux- guh, roengzngaenz gyawj 1000 fanh maenz guhbaenz le ciengzdingzci、ciengzyienjheiq、roenmbaek bin bya 3.5 goengleix、bingzdaiz depraemx、roqluengq yawj gingj、loekraemx、aennyenz hung deugaek、aen loxlez raez deugaek、gak loih aendiengz bingzdaiz caeuq ranz hekyouz gwnz ninz doenghgij lijyouz giekdaej sezsih caeuq boiqdauq sezsih neix, hawj aen gingjgih lijyouz daegsaek Mbanjyauz gig miz daegsaek minzcuz loq baenz yiengh ndeu baijyienh youq baihnaj vunzlai. Doengzseiz, ndaw mbanj yungh ndei gij daegdiemj beixnuengx Yauzcuz gyaez eu fwen haengj diuq foux caeuq gij ndei miz daegsaek vwnzva Yauzcuz noengznwd haenx, haiguh gak cungj gak yiengh vwnzva minzcuz hozdung. Youq ndaw mbanj, hekyouz ndaej yawjraen gij laexsoq couxhek laeuj laengz roen Yauzcuz, ndaej yawjngonz boq loxlez raez、diuq foux nyenz Yauzcuz, bae humx yawj mbauqsau dwkdomq caeuq doiq fwen doenghgij cietmoeg cienzdoengj minzcuz biujyienj neix. “Seizneix, gij hekyouz rox aen mingzdaeuz ndei dou cix daeuj ndaw mbanj youqndwi youzcet cimz gijgwn feihhom daeg- bied haenx ngoenz beij ngoenz lai, ngoenz coumued hekyouz engq lai. Ngoenzlaeng dou cix yaek cungfaen yungh ndei gij gingj gyaeundei ndaw mbanj, heiqhaeuh habngamj vunz- raeuz youzangq caeuq fungcingz fungsug ndawbiengz noengznwd haenx, dazyinx vunzmbanj haenq- rengz bae hwngfat hong lijyouz youqndwi lajmbanj, hawj vunzmbanj souhaeuj lienzdaemh demlai, caez gvaq gij saedceij siujgangh angqyangz vuenyungz.” Cunhcihsuh Mbanjginh- bauj angqvauvau dwk naeuz.