Hawceih miz boux canghdiet singq Lij ndeu, bineix 40 lai bi lo, gen hung ga mbwk. Yah de dwg vunz Huznanz, bouxvunz gig naen. Daeglij 20 lai bi couh gaen saefouh hag rox dajdiz lo.

Bihaenx, Daeglij gvanbaz ngamq hag rox dajdiz. Miz ngoenz haw he, Daeglij gvanbaz dawz huq diet bae gwnz haw gai, ngamq baij ndei, couh miz song vunz gaxgonq caeuq de cawx liemz gvak baema yungh dauq vuenh aeu gijmoq, ndawde miz boux he yiemz Daeglij naeuz:“Mwngz nienzgeij caengz laux, sien nyinhcaen hag dajdiz. Diz caxliemz mbouj ndei, couh mbouj yungh dwgrengz dawz daeuj baij.” Lingh boux vunz naeuz:“Daeglij diz gvakding, ngaeugvak gvak mbouj haeuj, naengh dawz bae gvak daeuh, dauq haeuj seiq haj conq.” Daeglij saeknaj heu naeuz:“Siengj mbang baenz mbawceij? Siengj raeh baenz daeqdau? Ciengx mou cing bienq lauz, gou lau hix mbouj ndaej.” Gyoengqvunz youq henz dingq le, cungj riu hwnjdaeuj. Hoeng, Daeglij gangj dwg baenzneix gangj, hix hawj song vunz neix vuenh gaiq moq dauqbae lo.

De rox dinfwngz dajdiet swhgeij lij aeu laebdaeb bae daezsang cij baenz, danghnaeuz lij lumj ngoenzneix couh mbouj yungh baengh gai huq diet de diz gvaq saedceij lo.

Daj seizhaenx hwnj, de caeuq yah de ciengz bae cam saefouh, nyinhcaen lienh dinfwngz dajdiz. Ngoenznaengz, fwngz swix de baez daj ndaw loz nep diet ndongq okdaeuj dwk youq gwnz demhdiet, fwngz gvaz couh gingz fagcuiz diz roengzbae. Doengzseiz, yah de hix gig vaiq dwk yaengx hwnj cuiz hung yunghrengz caeuq de itheij diz hwnjdaeuj. Ndaw ranz de sikhaek miz sing “dikdak——dikdak——” lumj singgo nei hongz hwnjdaeuj. Daeglij doq diz doq fan diet ndongq. Yaep he, de youq gwnz demhdiet roq mbat he, yah de couh dingz cuiz lo. Daeglij dwk diet ndaw loz bae, fwngz gvaz couh bengq fungluz hwnjdaeuj, aenluz youh “fizfoz——fizfoz——” ciengq go lo. Seizhaenx, Gvanbaz gwnz najbyak hanh conh liux, naj hoengzgyoengq, gennou Daeglij engqgya gawh lo. Yah de naengh youq henz yietnaiq、uet hanh……

Gij huq diet Daeglij ginggvaq baenzneix ciencuiz baklienh liux, gig ndei yungh, ndigah gig ndei gai. Couh yienghneix, saedceij Daeglij gvanbaz ngoenz doek ngoenz gvaq ndaej ndei, daengz seizneix hix miz cibgeij bi lo.

Bineix, miz ngoenz haw he, Daeglij caeuq yah de bae gwnz haw gai huq diet, ngamq baij ndei huq diet, couh miz geij boux vunz ndwen gonq caeuq de cawx gij huq diet haenx dauqdaeuj heuh de gvaq raemx.

Gyoengqde caez sing ciengq naeuz:

“Daeglij gvanbaz ha,

Sou huq diet caen raeh,

Danhseih byot youh mbang,

Muengh lai dwk di gang,

Mbangj vunz daeuj cawx dem.”

Daeglij gvanbaz hix caez sing heu dap:

“Fagliemz yungh geij bi,

Dou lij gwn gijmaz?

Muz 4 youh muz 5,

Gang yungh gvaq couh feiq.”

Gyoengqvunz dingq le gig geizheih, danq gaemz heiq ndeu, miz boux vunz naeuz:“Baenzneix gangj, miz haujlai vunz caeuq bouxdajdiz doxdoengz bw! Gvaiqndaej seizneix doxgaiq moq cungj mbouj ndaej naih yungh naih dawz. Hei……”